Hello，大家好，我哋係由韓國人每日提供最新韓國旅行資訊嘅Creatrip。
近年嚟因為YouTube嘅流行，可以選擇嘅職種都擴大咗好多，亦都有越嚟愈越多人會想以YouTuber為職業，或者我哋身邊最少就會有一個等緊成名嘅YouTuber朋友。韓國都唔例外，眾多嘅YouTuber成功例子，亦都令韓國學生對未來職業嘅選擇產生咗改變添，今日就由小編帶大家睇而家韓國學生最想從事嘅職業係咩啦！
十大小學生嘅夢想職業
| 2019年 | 2020年 | |
| 1 | 運動員 | 運動員 |
| 2 | 老師 | 醫生 |
| 3 | Creator | 老師 |
| 4 | 醫生 | Creator |
| 5 | 廚師 | 電競選手 |
| 6 | 電競選手 | 警察 |
| 7 | 警察 | 廚師 |
| 8 | 法律專家 | 歌手 |
| 9 | 歌手 | 漫畫家 |
| 10 | 美妝設計師 | 糕點烘焙師 |
教育部 2020年中小學生前路教育現況調查
最受韓國小學生歡迎嘅職業就係「運動員」啦！
對於好多韓國嘅小學男學生嚟講，「運動員」呢個夢想職業可以話有動搖唔到嘅地位，而同年嘅女仔嚟講，最多人想做嘅係「老師」。
特別著名韓國足球明星，而家為英超球隊熱刺效力嘅孫興慜嘅成功，就令更加多鐘意足球嘅小學生產生想做足球員嘅夢想啦。
喺2020年最新嘅頭三名入面，「運動員」之後係「醫生」同「老師」，可以見到大部分人，就算只係小學生都係相對偏好社會普遍認為嘅「安穩」職業。雖然小學生夢想可以有好多，但睇嚟好多時都係冇辦法要同現實低頭啊。
YouTuber、 實況直播主等等嘅「Creator」就入選咗第4位！而家幾乎冇人會唔睇YouTube，所以絕對唔係一個意料之外嘅結果。
「平凡的姐弟（흔한 남매）」係由搞笑藝人組成嘅YouTuber，有趣嘅內容令佢哋喺幼稚園生同小學生之間擁有相當高嘅人氣，超過215萬Subscribers嘅佢哋仲推出咗好多書同公仔等等嘅週邊商品添。
而另外一個擁有259萬Subscribers嘅「Hey Jini (헤이지니)」係韓國最受小朋友歡迎嘅YouTuber，高人氣嘅佢曾經推出玩具等嘅商品，亦都有出演電視劇，仲有同藝人合作添，其中佢同EXO嘅Kai嘅合作片就引起咗唔少嘅關注啦。遊戲產業發達嘅韓國，「電競選手」亦都係好多小學生嘅夢想職業，排行第五位。
十大初中學生嘅夢想職業
| 2019年 | 2020年 | |
| 1 | 老師 | 老師 |
| 2 | 醫生 | 醫生 |
| 3 | 警察 | 警察 |
| 4 | 運動員 | 軍人 |
| 5 | 美妝設計師 | 運動員 |
| 6 | 廚師 | 公務員 |
| 7 | 軍人 | 美妝設計師 |
| 8 | 公務員 | 護士 |
| 9 | 電腦工程學學者/軟件開發人員 | 電腦繪圖師/插畫家 |
| 10 | 護士 | 廚師 |
對初中生嚟講，一位「老師」、 二位「醫生」、三位「警察」，呢啲安定嘅職業同樣穩座夢想職業頭三位，連續兩年都冇變。
另外2019年第七名嘅軍人亦都上升到第四名，小編嘅推測應該係同舊年喺韓國Creator界爆紅嘅「虛假的男人(가짜 사나이)」有關。「虛假的男人(가짜 사나이)」係召集一班Creator體驗軍中生活嘅一個網絡綜藝節目，形式同電視綜藝「真正的男人(진짜 사나이)」好似，雖然節目最後因為出演者嘅個人問題而被中斷播放，不過佢嘅爆紅應該亦都令唔少初學生未來想成為軍人。
第九位嘅「電腦繪圖/插畫家」，小編覺得係同只要上SNS就可以接觸到有大量插畫家有關。
喺韓國，DAISO同10X10等等嘅企業會同個人嘅插畫家合作，提供平台俾呢啲插畫家出售自己嘅作品。除此之外，韓國街頭亦有好多文具精品店，有好多俾插畫家活動嘅空間，同時令一般人好輕易就接觸到呢啲產品添。韓國嘅文具控都唔少㗎，市場比想像中大，所以令唔少初中生夢想成為插畫家都唔係件新奇嘅事。
十大高中生嘅夢想職業
| 2019年 | 2020年 | |
| 1 | 老師 | 老師 |
| 2 | 警察 | 護士 |
| 3 | 護士 | 生命•自然科學學者/研究人員 |
| 4 | 電腦工程學學者/軟件開發人員 | 軍人 |
| 5 | 軍人 | 醫生 |
| 6 | 生命•自然科學學者/研究人員 | 警察 |
| 7 | 建築師/ | 電腦工程學學者/軟件開發人員 |
| 8 | 空中服務員 | 美妝設計師 |
| 9 | 公務員 | 醫療•保險相關職業 |
| 10 | 經營者/CEO | 公務員 |
高中生最想做嘅夢想職業就係「老師」啦！
無論初中生定高中生嘅第一夢想職業都係「老師」！ 大概因為老師係平時最近隔離可以接觸到嘅職種，而且呢個社會重視學歷，所以令唔少學生尊敬讀書叻嘅人有關。
而家因為新冠肺炎站喺最前線嘅「護士」同「生命•自然科學學者/研究人員」就得到第二同第三名。好多學生都希望成為社會上最需要嘅人員，想為社會貢獻呢點令人感動。
唔單只係中學生，高中生嘅夢想職業第四位同樣係「軍人」。香港冇軍人呢個職業，或者有唔少人會覺得好陌生。之不過喺韓國，職業軍人退伍之後，可以得到嘅年薪會比一般打工仔都高，所以喺韓國軍人係個好受歡迎嘅職業嚟！而且其實職業軍人都冇想像咁辛苦，所以喺呢個因為新冠肺炎而好難搵工嘅年代，職業軍人嘅人氣就好似變得更高啦。
睇完韓國學生對夢想職業嘅排名，唔知大家又覺得點呢？或者係生活環境競爭大，生活指數都比較高，小編覺得韓國同香港嘅學生對於未來嘅計劃都偏向現實，雖然呢個事實有啲可悲..ㅠㅠ。如果大家有咩其他意見都可以留言話我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
