韓國居家運動YouTube channel介紹
疫情之後肥咗好多？除咗金鍾國，仲可以跟住佢哋甩肉！
Hello，大家好，我哋係由韓國人每日提供最新韓國旅行資訊嘅Creatrip。
疫情之後，留多咗係屋企，之前嚴重嘅時候仲home office，搞到大家都變확찐자！（取自韓文「確診者」嘅諧音，意思係「暴肥」！）所以YouTube上面嘅居家運動影片就越嚟越紅。講到健身，大家應該即刻諗起早幾日晉身YouTube界嘅鐘國oppa！
金鍾國由6月17號開始個人YouTube頻道，消息一出，仲未有上傳影片已經即時超過8萬人訂閱！開台嘅第5日（21號）喺9:50pm 左右就達到100萬訂閱，而第一條片只係介紹自己嘅channel，已經有810萬次觀看，27萬個like（截至6月24號），可見人氣相當強勁。
不過始終鍾國Oppa健身多年，唔係個個都可以跟到佢做咁高難度嘅運動。今日等小編介紹5個韓國好紅嘅運動YouTube channel俾大家啦！
韓國居家運動YouTube Channel介紹
1. Thankyou BUBU
「Thankyou BUBU」累積有287萬人訂閱，喺韓國運動YouTuber中最出名之一。佢哋係一對韓國夫婦一齊拍嘅運動影片，主要係帶氧嘅運動，低強度、高強度運動、拉筋都有，特別適合初學者跟住嚟學！有訓練身體唔同部位，時間由10分鐘到40分鐘嘅都有，大家可以按自己需要揀嚟跟住做。
2. Allblanc TV
「Allbanc TV」累積咗170萬人訂閱，主要為冇時間做運動嘅打工仔而設嘅4分鐘運動影片，佢哋嘅影片好多時都係一班練到好有肌肉，線條好靚嘅型男型女一齊喺gym room度拍，邊睇邊做嘅話，更加有感覺！除咗4分鐘嘅片之外，仲有唔同時間嘅居家訓練、Tabata等多種運動影片。特別嘅係除咗運動，仲有旅遊同K-pop嘅內容，都幾多元化！
3. 힙으뜸
「힙으뜸」目前為止有98萬人訂閱，本身係一名pilate教練，佢嘅運動影片都幾多種類，有設計為期1-4個星期嘅運動計劃，亦都有10分鐘運動、每日100個深蹲挑戰、Tabata等等，適合鍾意做pilate嘅人，或者想喺屋企簡單做運動嘅人邊睇邊學。最近仲有同其他當紅嘅韓國YouTuber合作拍片，越嚟越受歡迎！
4. 핏블리 FITVELY
「핏블리 FITVELY」呢個channel最近人氣急升，已經累積咗超過82萬人訂閱。佢除咗同其他運動YouTuber一樣會上傳運動影片之外，仲有分享食譜俾想減肥，增肌嘅人參考，而且佢哋運動片仲有分適合男仔同女仔，大家都可揀啱自己嘅片嚟跟住做。本身經營健身室嘅佢，上年因為疫情而暫時關門大吉，受打擊之後拍咗自己自暴自棄，食、炸雞、炸芝士波、炒年糕等高卡食物嘅影片，吸引左過百萬人點擊！造就之後佢開始拍食完高卡食物再做運動消耗嘅影片。
5. 강하나스트레칭_stretching
如果想做多啲拉筋運動嘅話，可以揀「강하나스트레칭_stretching」呢個channel，10年間累積咗超過57萬人訂閱。佢嘅影片有設計俾運動初學者至高級人士，喺星期一至日，唔同日子做唔用部分嘅伸展，亦都有5分鐘運動系列。唯一一個小缺點係冇英文字幕，不過對學緊韓文嘅朋友嚟講，可以邊做運動，邊練韓文！
以上就係小編介紹俾大家5個韓國居家運動嘅youtube channel，希望大家鍾意啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk