喺香港生活過嘅韓星
喺香港生活過嘅韓星，有位韓星仲稱香港係佢嘅「故鄉」？原來我哋同偶像嘅距離都可以咁近？
Hello，大家好 ，我哋係由韓國人每日提供最新韓國旅行資訊嘅Creatrip。
唔知大家知唔知原來有韓星細細個都喺香港生活過嘅呢？甚至有啲仲係喺香港讀過書添！另外有啲係因為係港韓混血兒嘅關係所以就有喺香港生活過一段時間，亦有啲就係因為屋企人嘅關係而要嚟到香港，佢哋喺香港生活都有超過起碼一年以上嘅時間，而家就等小編話俾大家知有邊個啦！
喺香港生活過嘅韓星
Brave Girls - 侑廷
미디어리퍼블릭
近期因為《Rollin’》逆行而大爆紅嘅Brave Girls成員侑廷，被網民發現原來佢以前喺香港留過學。嗰位網民好眼利咁喺侑廷嘅ig度搵到佢有po過幾張喺香港影嘅相，而其中一張仲寫住：「我好掛住故鄉香港，應該用眼晴去記錄更加多 #prayforhongkong。」，不過呢段文字就己經俾佢delete咗，可能係因為怕「#prayforhongkong」會引起太多爭議。
原來佢喺讀書時期同大佢3歲嘅姐姐一齊嚟過香港生活過，就讀香港嘅國際學校，有興趣嘅朋友，大家都可以去佢嘅IG@braveg_yi度睇吓佢喺香港嘅生活照㗎！
U-KISS前成員 - Alexander Lee Eusebio
BNT뉴스
曾經紅遍亞洲嘅男團U-KISS成員Alexander，原來喺一位港韓混血兒，喺香港出世再喺澳門成長。佢之前接受訪問嘅時候，被問到有冇掛住香港，Alexander就用廣東話講：「其實我之前聖誕就返過香港，已經食晒自己想食嘅嘢！」佢仲講笑話：「嘩，我嘅廣東話真係好好！」。果然係港韓混血兒，廣東話真係超級流利。
Wonder Girls - 惠林
마이데일리
之前小編寫過嘅識3種語言以上嘅韓星入面都有講過，前Wonder Girls成員惠林係精通韓文、英文、普通話、廣東話。佢由2歲起至16歲都係喺香港生活，當時喺屋企講韓文，喺學校就用英文、廣東話同普通話。曾就讀保良局陳守仁小學同地利亞（加拿大）學校。總共喺香港生活咗足足14年，係喺香港生活得最耐嘅韓星嚟㗎！
CLEO - 蔡恩貞
헤럴드pop
大家可能對佢呢個名唔係太熟悉，不過都應該有聽過李孝利嘅偶像團體組合Fin.K.L？其實佢就係Fin.K.L出道成員之一，出道一個月前因爲個人原因由出道組中退出咗。 嗰個時候急忙入蔡恩貞位置嘅就係李孝利。
之後佢就以CLEO成員出道，而佢2009-17年間就喺香港生活過。佢喺某綜藝節目中公開自己去香港嘅原因，就係為咗男朋友。 當時拍緊拖嘅男朋友突然提出分手，而蔡恩貞表示當時冇接受分手，爲咗捉住男朋友嘅心先會去香港。
THE BOYZ - 周鶴年
엑스포츠뉴스
周鶴年都係港韓混血兒，所以都喺香港生活過一段時間，不過大概幾耐就唔係太清楚。雖然佢爸爸係香港人，𣎴過佢喺韓國嘅生活始終係多啲，所以佢啲廣東話就唔係太流利，只係識講啲基本對話。
大家睇完之後有冇覺得好神奇呢？原來我哋同偶像嘅距離都可以好近，大家知道仲有邊個偶像係喺香港生活過的話，都歡迎留言話俾小編知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk