韓國生活瑣碎事
聽講韓國人係全亞洲最大方？好多嘢原來都可以免費攞走？拆解你可能唔知道嘅韓國生活瑣碎事！
Hello，大家好，我哋係由韓國人話你知每日最新資訊嘅Creatrip。
#韓國人 #韓國文化
#韓國生活瑣碎事
大家對韓國應該唔陌生，但相信如果大家冇喺韓國長住過，可能都未必知道韓國人嘅瑣碎事！
等小編今日同大家分享五樣，喺韓國住咗接近兩年發現韓國人嘅瑣碎事，亦透過呢啲事希望可以畀大家更加了解韓國文化！
✨馬上Follow我哋IG
instagram.com/creatrip.hk
韓國生活瑣碎事
1. 免費紙皮箱
大家以前喺韓國買嘢嘅時候係唔係會買好多袋，多到兩隻手都拎唔晒呢？買太多嘅話仲要畀錢去買好多個膠袋添！
唔知大家知唔知道，其實唔少大型超級市場或者百貨公司門外，都會有好多免費嘅紙皮箱畀大家去拎！
喺香港通常要用紙箱嘅時候都要畀錢買，但韓國就會免費提供畀大家用。
其實咁樣係一個幾好嘅選擇，紙皮箱唔單止可以循環再用，仲可以幫到有需要嘅人。
如果大家下次都有用完嘅紙皮箱都可以整返去呢一啲大型超級市場嗰度留畀下一個用，咁就環保啲啦！
唔單止係購物，唔少韓國人如果要搬屋嘅話都會去呢啲地方拎免費嘅紙皮箱用！
2. 免費提供水
作為香港人，大家去茶餐廳食嘢嘅時候係咪只會飲到熱茶呢？
不過，韓國每一間餐廳都會提供凍水畀大家，韓國人係會擺一部水機喺餐廳裏面等大家想飲幾多就飲幾多！
如果次後香港都可以咁做就好啦～
3. 地鐵巴士班次好準時
唔知大家有冇發現喺香港嘅時候等車通常都會等好耐，又或者經常都會錯過巴士班次呢？
不過其實韓國就好少出現呢啲情況，韓國嘅地鐵同埋巴士站都會有一個牌寫晒班次預訂嘅時間表，然後班次真係會跟住嗰個時間準時咁到達！
正正就係因為咁，唔少韓國人都會喺屋企計劃好晒要搭邊一班車先至出門口，咁就唔需要企喺條街到等車咁慘啦！
4. 免費食品
喺未有疫情嘅時候，其實韓國都會有好多免費試食嘅活動。
無論係喺超級市場裏面嘅大型試食活動，定係喺明洞街頭嘅小檔仔，都會成日搵到一啲免費試食嘅機會。
雖然喺香港嘅超級市場都會有時候有呢啲試食活動，不過通常都係以飲品為主（食物好似越嚟越少）。
韓國呢度係真係會畀你試食牛扒，龍蝦等等，可以睇得出韓國人其實都真係幾大方同埋願意分享㗎 ！
5. 餐廳好少用木筷子
我哋有時喺香港嘅茶餐廳或者大排檔食飯可能都會有用過木筷子嘅情況，但韓國堂食嘅話其實每一間都唔會有木筷子嘅！
因為韓國係一個比較注重環保嘅地方，所以不論係垃圾分類，定係餐廳會用到嘅餐具都係會以環保為目標！
以上五樣就係韓國人都習以為常，但外國人就覺得好詫異嘅五件韓國生活瑣碎事，唔知大家又知唔知道呢？
✨馬上Follow我哋IG
instagram.com/creatrip.hk
| 其他延伸閱讀 | |
 韓國人幸運徵兆 |  韓國紋身文化 |