對韓國人嚟講7大幸運徵兆
對韓國人嚟講7大幸運徵兆，同香港反差超大？香港人覺得唔好，韓國人竟然覺得係好？
Hello，大家好，我哋係由韓國人每日提供最新韓國旅行資訊嘅Creatrip。
相信唔少人都希望人生可以有多啲幸運，韓國人深信發生以下7件事，即係會有幸福降臨，大家睇完又覺得同香港有咩唔同呢？
對韓國人嚟講7大幸運徵兆
1. 耳仔痕
香港人會有一種迷信係打乞嚏即係有人掛住自己，眼眉跳即係有人講緊自己壞話，韓國都有一種迷信係如果有人講緊自己閒話，耳仔或者頸會痕。事實上耳仔痕都要睇係邊一邊，韓國人話如果左邊耳仔痕即係有好事發生。代表係有人討論緊自己優點，甚至可能係同對方關係會有好轉或者更幸福。
2. 領養或養新寵物
小編曾經聽過香港朋友講，如果見到黑色流浪貓，即係會有唔好事嘅發生。不過喺韓國就冇呢個講法，反而係如果有流浪貓或流浪狗跟自己返屋企，代表係幸運即將降臨，或者喺屋企新養寵物，對韓國人嚟講本身就係一件幸福嘅事。
3. 成日會見到數字8
除咗Lucky 7之外，數字8喺好多地方都認為係一個幸運數字。好似香港咁8會諗到係「發」，韓國人都一樣係咁諗。如果地址、優惠券、電話號碼等好多地方都見到8嘅話，即係可能有好事發生。
4. 著衫著反
喺韓國佢哋覺得如果唔小心著衫著反嘅話，即代表有好事發生。如果突然發現，韓國人有時都會唔理繼續照著錯，因為如果再次著返啱 ，運氣就會消失，雖然聽落去有啲怪，但對韓國人嚟講的確係有咁嘅講法。
5. 左手突然麻痺
GUYMIHA
當然成日手痺唔係一件好嘅事，如果成日痺都建議去睇醫生，不過如果係突然之間痺嘅話，即係代表好快就會有現金入手。
6. 中頭獎（雀屎）
相信大家都好驚中頭獎（雀屎），不過喺韓國係一個幸福徵兆，特別係如果中咗喺私家車、單車、屋企都代表係有好事發生。
7. 屋企有常春藤圍住
如果屋出面有好多常春藤，並且係綠色嘅話，咁即係代表你有好多運氣，常春藤唔單止靚，而且對韓國人嚟講，代表有美好嘅未來。即使喺室內種常春藤，亦可以幫助避免厄運。
以上7樣對韓國人嚟講都係幸運嘅徵兆，唔知大家有聽過幾多個呢？同香港比，大家又覺得韓國嘅講法準唔準呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk