近期熱議嘅韓劇
14套熱播中或者即將開播嘅韓劇！未有劇追嘅朋友快啲嚟mark低佢啦！
Hello，大家好，我哋係由韓國人每日提供最新韓國旅行資訊嘅Creatrip。
2021年轉眼就嚟過咗一半，要講今年年初最受歡迎嘅就非《驅魔麵館》、《哲仁王后》、同《女神降臨》莫屬啦。仲有近期嘅《怪物》、《黑道律師文森佐》、《如蝶翩翩》都有唔少討論而且成績都唔錯，大家又睇咗幾多套呢？
受歡迎嘅已經播完，一啲劇嘅第二季又未開播，究竟嚟緊2021年仲有啲咩劇值得追呢？今日就等小編同大家介紹吓啦！
2021韓劇推薦
1. 模範的士（모범택시）
- 主演：李帝勳、李絮、金義聖、表藝珍
- 時間：2021年04月09日起每週五、六
- 平台：SBS、friDay影音、Viu
《模範的士》改編自同名漫畫，講述喺韓國社會入面，有啲人遇到不公義嘅時事，又冇得用正規方法去伸張正義嘅時候，地下組織「彩虹運輸」就會幫呢啲人報仇嘅故事，但公權力都同時默默關注佢哋動向，係一套犯罪動作電視劇。
故事入面亦有加入唔少真實嘅社會案件，例如係N號房同趙斗淳事件等等，雖然呢套劇喺開播之前就因為配角APRIL嘅李娜恩嘅霸凌事件而要換角做表藝珍，但仍然受到好多網民嘅支持，係最近討論度好高嘅劇集之一。
2. Law School（로스쿨）
- 主演：金明民、金汎、柳惠英、李姃垠
- 時間：2021年04月14日起每週三、四
- 平台：jtbc、Netflix
呢套劇以係一間法學院入面發生咗一件殺人事件，而法學院嘅教授被認為係兇手為背景，隨住故事嘅發展，講述呢間學院嘅學生點樣喺法律同正義之間掙扎嘅故事。
3. Undercover（언더커버）
- 主演：池珍熙、金賢珠、鄭滿植、韓高恩、金秀珍
- 時間：2021年04月23日起每週五、六
- 平台：jtbc、friDay影音
《Undercover》改編自英國BBC同名電視劇，講述隱瞞自己特務身份嘅丈夫，同懷疑佢身份嘅律師妻子之間嘅故事。
呢套劇嘅主演池珍熙同金賢珠係繼《金小姐打造十億韓圜計劃》同《我有愛人了》嘅再次合作，令人好期待佢哋今次呢種敵對嘅夫妻關係又會引起點樣嘅花火。
4. 大發不動產（대박부동산）
- 主演：張娜拉、鄭容和
- 時間：2021年04月14日起每週三、四
- 平台：KBS、愛奇藝、friDay影音、LINE TV、Viu
呢套係講鬼怪同轉世嘅韓劇，由張娜拉同CNBLUE鄭容和合作嘅劇集，更加係鄭容和時隔四年，退伍後嘅第一部作品，令唔少粉絲都好期待。唔知大家又有冇追呢？
5. Mouse（마우스）
- 主演：李昇基、李熙俊、朴柱炫、景收真
- 時間：2021年03月03日起每週三、四
- 平台：tvN、friDay影音、myTV SUPER
《Mouse》係李昇基同時隔三年回歸螢幕嘅李熙俊一齊合作嘅韓劇，呢套動作懸疑劇喺開播之後就得到好高嘅討論度，而且亦會喺最近播大結局。
正直地方巡警鄭巴凜同一心以惡治惡嘅刑警高武治，就算兩個人都係警察，佢哋卻會走上完全唔同嘅路。
6. Oh！珠仁君（오!주인님）
- 主演：李民基、Nana、姜敏赫
- 時間：2021年03月24日起每週三、四
- 平台：MBC、愛奇藝、myTV SUPER
呢套劇雖然喺開播之前受到唔少關注，但開播之後收視成績慘淡，更加成為MBC韓劇收視嘅最低記錄0.9%，唔少韓國人都表示，最近三大電視台嘅作品已經不如以前，不論係觀眾定係演員都更加集中關注喺tvN或者jtbc等嘅有線電視台嘅韓劇上面。
7. 黑洞（다크홀）
- 主演：金玉彬、李浚赫
- 時間：2021年04月30日起每週五、六
- 平台：OCN、tvN、愛奇藝、friDay影音
《他人即地獄》編劇嘅新作《黑洞》，可以話係有電影質素嘅韓劇。《黑洞》講述人類接觸到神祕黑洞冒出嘅黑煙，令佢哋成為失去自身意識好似喪屍一樣嘅人類，仲幾乎俾佢哋控制全世界。
呢部係用電影規格拍嘅高質素劇集，令佢喺播出之前就得到唔少關注，雖然收視普通，但鐘意呢類題材嘅朋友，不妨可以追吓呢套韓劇。
8. Okay！光姐妹（오케이 광자매）
- 主演：尹柱相、洪銀姬、全慧彬、高媛熙、金景南、李甫姬、李炳俊
- 時間：2021年03月13日起每週六、日
- 平台：KBS
《Okay！光姊妹》講述一對老夫妻進行離婚訴訟嘅時候妻子意外身亡，而令全家人被指控為嫌疑犯嘅懸疑喜劇。呢套從開播就有20%嘅高收視，大家不妨睇吓啊。
9. 五月的青春（오월의 청춘）
- 主演：李到晛、高旻示、李相二、琴世祿
- 時間：2021年05月03日起每週一、二
- 平台：KBS、friDay影音
最新播出嘅《五月的青春》以1980年代民主化運動嘅光州為背景，內容係近代少數提及嘅80年代民主化運動，令《五月的青春》更加引人入勝。
值得一提係，《五月的青春》由《Sweet Home》嘅兄妹李到晛同高旻示主演，兩個人更加係第一次擔任無線電視台劇集嘅男女主角添！
10. 綁匪－盜取命運（보쌈-운명을 훔치다）
- 主演：丁一宇、權俞利、申譞洙
- 時間：2021年05月01日起每週六、日
- 平台：MBN、friDay影音
故事背景係朝鮮時代光海君時期，講述身為「傳愛綁匪」嘅男主角誤綁架了公主之後，兩人喺過程之間努力奮鬥嘅愛情故事。而呢套劇嘅一大看點除咗丁一宇嘅演技之外，女主角更加係少女時代嘅Yuri添，令呢套劇受到唔少嘅關注。
11. Move to Heaven：我是遺物整理師（무브 투 헤븐: 나는 유품정리사입니다）
- 主演：李帝勳、唐俊尚、李宰旭、池珍熙、洪承熙
- 時間：2021年05月14日
- 平台：Netflix
Netflix原創韓劇《Move To Heaven》將喺05月14日喺全球播出，一共10集。講述患有亞氏保加症嘅少年喺爸爸過身之後，同好耐冇見嘅叔叔，一齊做遺物清理工作嘅故事。喺過程當中，提及好多死者嘅人生故事，可以預計呢套劇將會係今年最感人嘅劇集之一。
12. 某一天滅亡來到我家門前（어느 날 우리집 현관으로 멸망이 들어왔다）
- 主演：朴寶英、徐仁國、李洙赫、姜泰伍、申度賢
- 時間：2021年05月10日起每週一、二
- 平台：tvN、愛奇藝、Viu
《某一天滅亡來到我家門前》係一套愛情劇，講述令萬物消失嘅「滅亡」，同就快死嘅女主角簽署生命合約，兩個人喺最後100日入面一齊搵生命同人生嘅意義。
呢種帶有哲學感嘅愛情故事，加上好有CP感嘅男女主角，唔知《某一天滅亡來到我家門前》又會唔會得到好收視呢？
13. 我的上流世界（마인）
- 主演：李寶英、金瑞亨
- 時間：2021年05月08日起每週六、日
- 平台：tvN、Netflix
接檔《黑道律師文森佐》，喺五月初首播嘅《我的上流世界》，聽聞又係一套狗血劇！由實力派演員李寶英同金瑞亨主演，《驅魔麵館》嘅女惡鬼亦都會出演，被網民稱為係《天空之城》與《Penthouse》嘅合作劇。
14. 我的室友是九尾狐（간떨어지는동거）
- 主演：張基龍、李惠利
- 時間：2021年05月26日起每週三、四
- 平台：tvN、愛奇藝
又係一套九尾狐嘅韓劇，呢套劇由經典漫畫《心驚膽跳的同居》改編而成，而且會喺五月底開播。主角張基龍同惠利都為呢套劇做咗唔少宣傳，就例如上面充滿CP感嘅畫報，令網民都大叫柳俊烈唔好睇，仲話全國民都要睇柳俊烈眼色，唔可以表現到太鐘意呢啲畫報添哈哈。不過都的確令好多人更加期待呢套劇嘅播出啦！
以上就係近期開播咗或者即將開播嘅韓劇啦，大家又最期待邊套呢？歡迎留言同我哋分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk