Hello，大家好，我哋係由韓國人每日提供最新韓國旅行資訊嘅Creatrip。
韓國喺進行城市更新嘅同時，都會加入流行元素，藉此結合觀光同在地文化。「世運商街」係有40年以上歷史嘅電子零件商街，位於中路3街，同清溪川都好近，原本係好舊嘅商場，但2017年重新改造、再生，將呢度同文創產業融合，令世運商街有全新嘅面貌。呢度仲好適合睇風景，就連而家播映緊嘅《女神降臨》，都有喺呢度拍攝！
大家睇吓小編喺下面寫嘅探訪記錄，以後嚟到韓國，記得一定要嚟世運商街！
世運商街
세운상가
- 地址：서울 종로구 청계천로 159
- 時間：10:00 - 18:00；九樓天台10:00 - 22:00
由鐘路三街站12號出口直行，向前走就會抵達世運商街嘅入口，或者係由清溪川行過去，都可以見到世運商街嘅後門。
大家嚟到呢度，可以發現世運商街嘅舖頭大部份都係電子業，好似電子零件、燈飾、工具、家店等等，都可以喺呢度搵到，有好濃嘅在地同傳統感覺。
世運商街有好多入口，是但搵條扶手電梯都上到去，而且範圍仲好大，不過因為基本上都係喺同一個地方，唔洗驚當失路。
行上第二層，呢度已經設計成一條平坦嘅路，雖然高度唔高，都可以遠眺鐘路區一帶嘅風景。
結合現代、歷史、文創等等嘅元素，世運商街嘅設計已經唔係當初嗰個又舊又殘嘅商場，而係注滿咗年輕同活力，重新令呢個地方重生。
而呢條路，都係拍攝《女神降臨》嘅場景之一，係書竣俾人追殺嘅時候跑到過嚟嘅地方。
另外，喺樓梯可以上一層嘅部份，就係朱靜同書竣一齊企嘅地方（上去嘅話記得注意安全）。
喺2樓嘅通道可以一路行過去清溪川後面嘅建築，非常方便，大家可以當散步咁行，體驗一下首爾鐘路區休閒嘅氣息。
喺世運商街入面仲有一條街賣好多咖啡、餐飲、文創嘅商品，雖然舖頭面積唔大，細細間但人氣都好高，大家可以嚟呢邊行吓。
你以為世運商街咁就行完？梗係唔係啦！喺呢度嘅頂樓，仲有超靚嘅景觀同天台，絕對係好少觀光客會去打卡嘅冷門地方。
要點上去呢？大家記得行返去一開始由鐘路三街站12號出口出嚟，直行到達世運商街嘅入口嗰到，有條電梯可以上去，直接搭到九樓就係。
入口電梯
開放時間：10:00 - 22:00 （唔準帶外賣上去）
搭緊電梯上9樓嘅時候，大家可以喺電梯望出去遠眺韓國嘅世界文化遺產之一「宗廟」。上到9樓之後，就可以放鬆咁欣賞成個鐘路區嘅風景。
呢度做到好似一間好靚嘅天台Cafe咁，日頭同夜晚嚟嘅感覺都唔同。小編日頭去嘅時候因為霧霾有啲嚴重，所以好可惜。一陣小編就會同大家睇吓夜晚嘅景色。
想喺首爾睇夜景？唔使去人迫人！喺呢條世運商街可以欣賞到一般遊客好難發掘到嘅風景。
日頭嚟到都好靚，大家可以參考instagram上面喺呢到打卡嘅相，影返一輯自己風格嘅相。
就算係喺舊區，都可以有全新嘅轉換，喺世運商街見到嘅首爾，同大家想像當中進步、繁華嘅首爾雖然有啲落差，但反而係更加真實，一點一滴改變緊嘅首爾。
備註：鐘路區雖然有好多風格年輕嘅店舖，但呢到嘅住戶多數都係老人家
唔知大家睇完小編嘅探訪，有冇更加了解呢個地方？
呢度算係首爾一個比較新嘅景點（ 2017年開放），人潮都唔算多，不過喺呢度就可以見到首爾唔一樣嘅面貌。
平時如果會去鐘路、宗廟、清溪川、乙支路一帶附近嘅朋友，不妨嚟世運商街感受吓唔一樣嘅首爾氛圍。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
