韓國街頭小食整理
寒冷嘅冬天最掛住韓國路邊嘅魚糕湯！韓國街頭小食總整理，你最掛住邊種呢？
Hello，大家好，我哋係由韓國人話你知每日最新韓國資訊嘅Creatrip。
＃韓國街頭小食
＃秋冬＃街頭小食
＃路邊攤＃街頭美食
每次嚟到韓國，唔知大家鍾唔鍾意食街邊小食呢？
特別係冬天，天氣咁凍會唔會想食片魚糕，飲啖熱辣辣嘅魚糕湯呢？
今日小編要同大家介紹韓國常見嘅街頭小食，尤其係冬天呢啲小食真係特別吸引，當中大家又有冇食過呢？
✨馬上Follow我哋IG
instagram.com/creatrip.hk
韓國街頭小食
1. 鯽魚餅
韓國街頭小食「鯽魚餅」可以話係國民點心，大家最常見嘅應該會係紅豆餡 、奶油餡。
雖然一年365日都可以食到，但只要一到冬天，就會令人更加想食。
因為太多人買，所以好多時都係即叫即整，有時4~5個都只係1000won，真係超平！
IG@ellie2496
韓國鯽魚餅原本只得紅豆餡，不過最近越嚟越多地方都有奶油餡，甚至係其他口味。
IG@meizsh
而且最近亦都出現咗好多蕃薯味鯽魚餅，同一般嘅鯽魚餅唔太一樣，佢係紫薯同黃薯交織而成嘅新口味，雖然小編仲未食過，但真係好想試下。
2. 糖餅
「糖餅」可以話係韓國街頭嘅代表小食之一，平底鍋上煎出嚟嘅麵餅，入面包住砂糖、肉桂粉、堅果等食材，一啖咬落去，真係令人超級滿足。
不過砂糖喺高溫底下，會融化成好似蜜糖咁嘅質地，因為真係會好熱，大家食嘅時候一定要小心。
另外最近亦都多咗好多新口味，就好似喺綜藝節目入面成為話題嘅蔬菜餅，就係以雜菜取代砂糖，食起嚟更加有飽足感；釜山嘅糖餅就會加咗堅果，食起嚟口感更加好。
3. 蒸包
蒸包雖然對香港人嚟講好常見，但係對韓國人嚟講係幾新奇嘅小食。
除咗有生得好似大饅頭一樣嘅紅豆包之外，而家都有好多其他口味，例如肉餡、泡菜、Pizza、蕃薯等嘅口味。
如果喺韓國街頭見到呢款小食嘅話，不妨可以買一兩個試下！
而且韓國便利商店喺秋冬嘅時候，都會開始賣蒸包，大家又有冇試過呢？
4. 魚糕
加咗海鮮、蔬菜，長時間熬煮嘅濃郁湯入面放咗一串串嘅魚糕，大家係唔係巳經諗返起魚糕嘅味道呢？
喺韓國超級常見嘅街頭小食「魚糕」，永遠係每個人心入面最掛住嘅味道。
唔單止係魚糕，有啲地人仲會有年糕同其他嘅小食，大家都可以試下。
如果係喺釜山想食魚糕，入面通常都會有年糕串，而大邱就會加咗好多大豆芽，每個城市都有唔同嘅特色，大家又試過未呢？
5. 烤蕃薯、糖炒栗子
韓國街頭小食「糖炒栗子」同「烤蕃薯」通常都會係一齊出現，就算係好遠嘅地方都會聞到好香嘅味。
特別係秋冬嘅時候，拎住烤蕃薯喺手即刻唔會覺得凍。
6. 菊花餅
韓國街頭小食「菊花餅」亦都係秋冬常見嘅街邊小食，不過最近就比較少地方可以見到。
韓國菊花餅係會喺麵皮入面加咗糯米同紅豆，食起嚟會好軟。
小編如果見到街上有賣嘅話，好多時已經9秒9去買。
7. 雞蛋糕
呢款韓國街頭小食大家都應該唔陌生，只要喺鬧區都一定會見到，因為佢可愛嘅外型，吸引咗唔少旅客去買。
雞蛋糕嘅餡其實淨係得雞蛋，不過最近亦都出現咗好多有加煙肉、蔬菜等創新口味。
8. 辣炒年糕
既然講到韓國街頭小食，點可以錯過「辣炒年糕」呢？
嚟到韓國冇食到辣炒年糕，就等於冇嚟過韓國，而且辣炒年糕亦都係全韓國最普遍嘅小食，周圍都可以買到。
有啲比較高級嘅辣炒年糕，仲會加蔬菜、魚糕、肉、水煮蛋、麵落去，韓國不分男女老少，都好鐘意食呢款街頭小食。
根據年糕製作材料，仲可以分為用米做嘅「大米辣炒年糕」，同用麵粉做嘅「麵粉辣炒年糕」，小編自己最鐘意食麵粉做嘅年糕，覺得更加煙靭有彈性。
睇到咁多款韓國街頭小食，大家又食過邊種呢？歡迎大家可以留言話俾小編聽。
✨馬上Follow我哋IG
instagram.com/creatrip.hk
| 其他延伸閱讀 | |
 韓國人常用app |  韓國冷知識整理 |