跟住車銀優足跡去打卡
跟住車銀優足跡去打卡，一齊同小編去17 pizza同《女神降臨》出現過嘅漫畫店啦！
Hello，大家好，我哋係由韓國人每日提供最新韓國旅行資訊嘅Creatrip。
自從車銀優拍完《女神降臨》人氣一直急升，小編之後再睇完佢出演過嘅綜藝，真係搞到日有所思夜有所夢哈哈，雖然因為疫情好難真正去追星，不過都可以跟住佢去過嘅地方打卡，今日小編就會同大家介紹兩個地方，係AROHA嘅你之後會唔會都想去呢？
跟住車銀優去打卡
1. 17 Pizza
營業時間：每日11:30 - 20:30、逢星期日休息 （材料賣曬會提早閂門）
地址：서울 동대문구 회기로21길 22
小Tips：由回基站1號出口行11分鐘，或者可以喺1號出口搭小區01號巴士喺第一個站落車，見到7-11直行大約1分鐘就會見到17 Pizaa㗎啦。
大家之前去回基好多時都係去慶熙大學賞櫻，不過喺附近其實都有唔少美食，今日想同大家介紹號呢間17Pizza。
喺韓國綜藝節目《白種元的胡同餐館》第54集出現過，當時銀優仲同白老師一齊去探訪添！當然小編都唔可以錯過，要同大家直擊去試吓佢嘅味道！
鋪頭店面唔大，入到去只係得4張檯，小編當時去到坐滿曬人，大約等咗30分鐘就有位（等嘅期間拎飛要入電話號碼，之後可以去附近地方行吓，收到message再去餐廳，如果冇電話號碼可能就要喺門口等）。
雖然店面唔大，不過每一個角落都裝修得有好心思，好有風格。
呢度總共有7款Pizza、6款意粉，同埋8款飲品俾大家揀，而且重點係每一款價錢都唔貴。
去之前小編都有做足功課，睇吓銀優同白老師食咩Pizza跟住一齊叫。
不過可惜嘅係小編去到以上四款只係得返一款（明太子芝士Pizza）。
落完單之後，大約等10分鐘左右Pizza就會上檯，真係戴住口罩都聞到香味，小編最後叫咗明太子芝士Pizza同辣肉腸芝士Pizza，小編見到附近檯嘅人幾乎好多都會咁叫，大家亦都可以按照個人口味再加辣椒醬或芝士粉。
明太子芝士Pizza (₩9,000)
第一款係銀優同白老師都有一齊食過嘅明太子芝士Pizza，一上檯已經覺得好香，佢嘅餅皮唔算厚而且好脆，同所有材料一齊食真係好夾，不過因為好熱，大家食嘅時候要小心啲。
辣肉腸芝士Pizza (₩6,000)
呢款口味雖然成日都可以食到，不過以₩6,000呢個價錢食到咁大份Pizza真係第一次，佢好濃味，不過小編覺得如果大家食得辣，可以再加啲辣椒醬，食落會更加惹味！
同一開始講到，因為鋪頭店面比較細，所以大家都好難揀到想坐嘅位，不過如果可以揀，梗係坐銀優坐過嘅位啦
2. YN ANIMA (와이앤아니마)
營業時間：12:00至19:00、逢星期一休息
地址：서울 종로구 윤보선길 31
小Tips：由安國站1號出口行2分鐘就會到。
大家記唔記得喺《女神降臨》入面修豪同朱靜都好鍾意去呢間漫畫店呢？其實佢就係位於安國站附近嘅「YN ANIMA」，不過當時淨係借咗佢嘅門口嚟影，內景係喺其他地方到拍攝。
電視劇入面雖然係一間漫畫店，但其實真實係一間賣皮革嘅鋪頭，裡面有好多皮錶、皮袋等賣。
為咗可以更加有返當時拍劇嘅感覺，小編仲去咗附近嘅租借校服店借校服扮吓朱靜 ，唯一可惜係隔離冇修豪
如果之後大家嚟都想試吓借韓國校服著都可以揀同我哋合作緊嘅梨花校服，喺嗰度由一般校服到Produce 101嘅校服都有，大家都可以著住嚟打卡。
鋪頭每個角落都好適合打卡，之後嚟韓國你又點可以錯過呢？
今同大家介紹咗兩個銀優去過嘅兩個地方，唔知大家之後嚟度會唔會都想跟住都去打卡呢？如果有想睇其他藝人嘅打卡景點，歡迎大家可以留言話俾小編聽！
如果有更多想知嘅內容，都可以隨時留言或者dm話俾我哋知：）
Instagram：creatrip.hk