孔德美食 | 真味食堂
連續幾年都得到米芝蓮推薦嘅醬油蟹餐廳！到底係唔係真係咁好食？
Hello，大家好，我哋係由韓國人每日提供最新韓國旅行資訊嘅Creatrip。
孔德站（공덕역）對遊客嚟講可能會有少少陌生，不過講起「真味食堂」就一定知道喺邊度！呢間醬油蟹專門店連續幾年被選定為米芝蓮推薦餐廳，更加係香港人嚟韓國玩必去嘅餐廳之一！今日就等小編帶大家去睇吓到底有幾好食啦！
冇韓國電話號碼但又想去真味食堂食醬油蟹？🦀
孔德「真味食堂（진미식당）」
- 地址：서울 마포구 마포대로 186-6
- 營業時間：12:00 - 20:00（Lunch Break 15:30 - 17:00）、逢星期日及公眾假期休息
「真味食堂」位於孔德站附近，係韓國數一數二出名嘅醬油蟹專門店！入去之前就已經見到玻璃門上面貼滿米芝蓮嘅貼紙，令小編好期待，到底係唔係真係咁好食呢？
呢度係一間韓國家庭式餐廳，入到去會有一種好似行咗入韓劇嘅錯覺。因為呢度係行預約制，而且枱同枱之間唔算太逼，大家可以食得舒服！
牆上面亦都癡滿好多韓國明星嘅合照同新聞報導，仲有BTS、TXT同NewJeans嘅簽名，由此可見呢度真係好出名！
呢度得一款Menu——「醬油蟹定食」，價錢係₩45,000（2023年11月價錢）。一坐低老闆娘就會根據人頭數幫大家上菜，超快手XD
老闆會幫大家將醬油蟹切好，大家睇吓啲蟹膏幾吸引！
小編自己本身都鍾意食醬油蟹，所以都去過唔少餐廳食，但係「真味食堂」嘅醬油蟹可以話係小編覺得首爾最好食嘅醬油蟹！
鋪頭入面亦都幫大家準備好膠手套，大家可以戴上手套，然後將蟹肉jit出嚟放喺飯上面，再加一羹醬油撈埋一齊食！食落去會感受到蟹肉嘅鮮甜，完全唔會苦澀，亦都唔會腥！
食醬油蟹當然唔少得要將飯放入蟹蓋撈埋啲蟹黃一齊食啦！呢度嘅特製醬油非常惹味，真係勁送飯，唔洗其他小菜都可以瞬間食完一碗白飯！
話明係定食就當然有其他小菜同餐點啦！小菜方面會定期變，小編去嘅時候有辣章魚、涼拌蔬菜、蒸蛋等等，仲有一碗暖笠笠嘅湯~
另外仲有平時喺香港好少見到嘅飯焦湯，韓國人好鍾意食完飯之後飲返碗（不過小編個人就唔太鍾意啦XD）
因為真味食堂一定要預約先去到，所以如果大家都想嚟試，但又冇韓國電話/唔識講韓文嘅話，可以搵我哋幫手預約！
如果有更多想知嘅內容，都可以隨時留言或者dm話俾我哋知：）
Instagram：creatrip.hk