2024韓國滑雪場總整理
首爾/釜山近郊10個滑雪場！適合初級、中高級都有！
Hello，大家好，我哋係由韓國人每日提供最新韓國旅行資訊嘅Creatrip。
講到韓國冬天，最期待係咪睇雪呢？今日小編幫大家整理咗韓國滑雪場嘅開放日子同滑雪團行程，準備呢個冬天嚟韓國玩嘅朋友們記住save低呢篇blog啦！
韓國滑雪場總整理
1. 百玩地公園 （비발디파크）
- 地址：강원도 홍천군 서면 한치골길 262
- 開放日期 : 2023.11.29 ~
「百玩地公園」位於洪川，因為佢距離首爾都算近，個半鐘車程就會到，所以每年冬天都有超多人會嚟玩！
呢度有成12條滑雪道，無論係初學者定係高級滑雪者都可以嚟，而且滑雪裝備、纜車、雪橇等一應俱全，好多人嚟過一次之後，每年都會再返兜嚟玩！
如果大家唔夠膽滑雪，都可以只係純觀光，或者只係玩雪橇，大人細路都會玩得好開心。
2. 伊利希安江村滑雪場（엘리시안강촌리조트）
- 地址：강원도 춘천시 남산면 북한강변길 688
- 開放日期： 2023.12.01 ~
「伊利希安江村滑雪場」係韓國三大滑雪場之一，論雪質嚟講，呢度可以話係韓國人一致認為最靚嘅滑雪場。加上離首爾只係一個鐘左右，甚至仲可以搭地鐵就去到，相當方便！
「伊利希安江村滑雪場」比較特別嘅點就係好多滑道都比較適合初學者，如果本身唔係好識滑雪，嚟呢度就冇錯啦！
3. 芝山滑雪場（지산리조트）
- 地址：경기도 이천시 마장면 지산로 267
- 開放日期：2023.12.04 ~
「芝山滑雪場」曾經被《亞洲時報》評選為亞洲最佳滑雪場。雖然冇上面兩個咁出名，但仍然都係好多韓國人冬天會去滑雪嘅地方。
就算係初學者，嚟到呢度都唔需要太擔心！因為有專業導師教大家，甚至仲有一個單獨嘅學習場地，唔需要怕同其他人撞到。而且呢度仲有一條韓國最長嘅中級滑雪標準滑雪道，自認滑雪高手嘅朋友們都可以玩得開心！
4. 龍平滑雪渡假村（용평리조트스키장）
- 地址：강원도 평창군 대관령면 올림픽로 715
- 開放日期： 2023.11.24 - 2024.03.17
如果只係講個名大家未必會太熟悉，但如果睇到啲相就會知，韓劇《冬季戀歌》同《鬼怪－孤單又燦爛的神》都有喺度取過景。
呢度有成28條難易度分明嘅滑雪道，而且雪質夠好，大家可以根據自己能力去揀嚟玩！
5. High 1 度假村（하이원리조트）
- 地址：강원 정선군 하이원길 265-1
- 開放日期：2023.12.08 ~
「High 1滑雪場」相對離首爾有啲遠，但係佢初級、中級、高級滑雪道分得好平均，而且佔地面積大，係江原道首屈一指嘅滑雪場之一。
對好多人嚟講，去滑雪場除咗要滑雪之外，當然就係要睇佢哋嘅靚景，呢度就有一個山林生態園區，大家嚟到嘅話，應該都會好難忘。
6. 鳳凰島平昌度假村（휘닉스 파크）
- 地址：강원 평창군 봉평면 태기로 174
- 開放日期：2023.11.24 ~
「鳳凰島平昌度假村」係另一個位於平昌嘅滑雪場，呢度更加係2018年冬季奧運會賽場之一，無論係設施定雪質都有保證！
呢度仲有個森林公園可以去行，享受刺激滑雪嘅同時可以親親大自然！
7. 茂朱德裕山渡假村滑雪場（무주 덕유산 리조트 스키장）
- 地址：전북 무주군 설천면 만선로 185
- 開放日期：2023.12.10 ~
경북일보
「茂朱德裕山渡假村」係全羅道唯一嘅滑雪場，出名自然景靚，每一棟建築同街道都好有歐洲風情，風景如畫。
무주산들애
呢度嘅進階滑雪道非常出名，如果你已經挑戰過大部份韓國滑雪場，今年冬天不妨嚟「德裕山滑雪場」！而且每逢跨年都會有精彩表演，住宿一位難求！
8. 維利希利渡假村（웰리힐리 파크）
- 地址：강원 횡성군 둔내면 고원로 451
- 開放日期：2023.12.01 ~
「維利希利渡假村」位於江原道橫城，呢度嘅滑雪斜坡獲得國際滑雪聯盟FIS認證，係最受滑雪發燒友們歡迎嘅滑雪場！
呢度有20條唔同難度嘅滑雪道，推薦想盡情享受冬季運動嘅朋友們嚟呢度玩！
9. 橡樹谷滑雪場（오크밸리）
- 地址：강원 원주시 오크밸리2길 58
- 開放日期：2023.12.15 ~
相比其他滑雪場，「橡樹谷滑雪度假村」比較少觀光客，不過呢度唔單止有滑雪道，仲有好大個雪橇場！
無論係初學者定係滑雪高手都可以揀到啱自己程度嘅斜坡，一家大細嚟都可以玩得開心！
10. 伊甸園山谷滑雪場（에덴밸리스키장）
- 地址：경상남도 양산시 원동면 어실로 1206
- 開放日期：2023.12.23 ~
唔止首爾附近有滑雪場，其實韓國南部都有㗎！「伊甸園山谷滑雪場」位於梁山一帶，大家可以喺釜山搭車去，或者直接參加一日遊行程！
「伊甸園山谷滑雪場」可以話係韓國南部最值得推薦嘅滑雪場，無論喺雪道同園區設計方面都落咗好多功夫，就算有好多人都可以自由自在咁玩，唔洗同人逼！
咁多個滑雪場唔知你下次又會想去邊個？歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
