聖水「傳說中的馬鈴薯排骨湯」介紹
聖水洞嘅「傳說中的馬鈴薯排骨湯」真係咁好食？到底值唔值得排隊去食呢？
Hello，大家好，我哋係由韓國人每日提供最新韓國旅行資訊嘅Creatrip。
唔知大家有冇發現，韓國人好鍾意將食物煮成一鍋，除咗有大家所知嘅一隻雞、部隊鍋、泡菜鍋之外，其實仲有一樣佢哋都好鍾意嘅就係馬鈴薯排骨湯啦！對好多遊客嚟講，聖水嘅「傳說中的馬鈴薯排骨湯」最出名，到底係唔係真係咁好食？就等小編誠實咁話俾大家知啦！
聖水「傳說中的馬鈴薯排骨湯」介紹
傳說中的馬鈴薯排骨湯（소문난성수감자탕）
- 地址：서울 성동구 연무장길 45
- 營業時間：24小時
由聖水站4號出口行大約5分鐘就會去到「傳說中的馬鈴薯排骨湯」，佢曾經上過《白鐘元的三大天王》同其他美食節目，無論係韓國人定外國人都一定會聽過，幾時去都係咁多人排緊隊！
小編平日朝早11點左右去到，鋪頭已經坐滿哂人，出面亦都開始大排長龍！
馬鈴薯排骨湯細份（감자탕 소）₩27,000
坐低落完單冇耐，職員就會將馬鈴薯排骨湯放上檯，雖然小編只係叫咗細份，但份量相當驚人！
小編本身都好鍾意食馬鈴薯排骨湯，加上呢度咁出名，難免會有少少期待。不過食完之後覺得佢哋湯底唔夠濃郁、紫蘇葉味道過重，排骨嘅肉同骨比較難分開。雖然味道整體嚟講係唔差，但就有啲失望。
如果同小編一樣鍾意食重口味啲可以試吓點佢哋秘製嘅芥末汁，比想像中冇咁辣，但就可以令味道更高一層次！
炒飯（볶음밥）₩3,000
食完馬鈴薯排骨湯點可以唔叫返份炒飯呢？職員會喺你面前炒，炒飯加咗麻油、紫菜同紫蘇葉，聞嘅時候以為會好入味，點知食落都係覺得有啲淡，有啲可惜。（每個人口味唔同，小編意見只供參考）
「傳說中的馬鈴薯排骨湯」因為開24小時，幾時去都係咁方便！不過對小編嚟講可能食一次就夠，之後應該會試其他鋪頭... 唔知大家之前有冇食過/打算去食呢？歡迎留言話俾我哋知你嘅食評，可以一齊討論！
如果有更多想知嘅內容，都可以隨時留言或者dm話俾我哋知：）
Instagram：creatrip.hk