韓國人氣餐廳排隊/訂位攻略
一場嚟到韓國當然要食盡佢！教你點樣可以輕鬆去到最近韓國超hit嘅餐廳食飯！
Hello，大家好，我哋係由韓國人每日提供最新韓國旅行資訊嘅Creatrip。
眾所周知韓國有勁多成日都要排長龍，甚至係要提早好多book枱嘅餐廳，唔知道大家嚟韓國玩嘅時候會唔會專登安排去呢啲地方呢？到底點樣先可以容易啲成功食到？如果要訂位又有咩要注意？今日小編整理咗一連串嘅攻略，大家下次飛韓國之前可以參考！
韓國人氣餐廳排隊/訂位攻略
1. 死死地氣去現場排隊
토속촌
大部分韓國餐廳喺食飯時間都需要排隊，特別係平日中午打工仔放飯時間，或者喺weekend嘅lunch同dinner時間去觀光區/最近超受歡迎嘅景點附近餐廳嘅話通常都要等一段時間。如果餐廳冇得現場撳飛或者用app攞籌嘅話，大家就要跟住條龍排隊啦。不過呢種餐廳通常都有個特點，就係客人好快就會食完，多數好快就會輪到你，只要俾少少耐性就一定會入到去！
2. 寫資料等位
經過疫情之後，韓國餐廳等位方式都有改變。而家好多餐廳都會叫你留低名、人數同電話號碼，到你嘅時候就會打電話/send SMS或者KakaoTalk俾你。不過如果要咁做，首先就需要一個韓國電話號碼，所以建議大家記住嚟韓國玩之前整返張有電話號碼嘅Sim卡！
不過如果大家只係嚟玩幾日，覺得冇必要因為咁而買Sim卡，呢個時候就只能夠直接搵職員幫手啦！同職員講自己係外國人，冇韓國電話號碼，佢哋可能就會俾籌你，或者叫你喺現場等。
3. 事先網上訂位
韓國其實有好多餐廳都會接受網上預約，而家亦都多咗好多餐廳訂位app，例如Catch table、Tabling同Yesir等等！除此之外，Naver亦都係另一個韓國餐廳會選擇用嘅訂位system。大家喺Naver搵到想去嘅餐廳之後，好多時候都可以直接book枱！不過Naver帳號需要先進行身份認證，而且一定要識韓文先睇得明，對遊客嚟講都幾唔方便。
最近Creatrip推出咗代客訂位服務，無論係大家嚟韓國都必去嘅真味食堂同大瓦房，定係其他超人氣餐廳，全部都可以透過我哋book枱，成件事就方便得多啦！
4. 搵韓國人幫手
如果大家有韓國朋友，都可以搵佢哋幫手book枱！有時候民宿職員都可能可以幫你打電話訂位，咁就唔怕因為冇電話號碼或者唔識韓文而book唔到枱/要去排長龍啦！
5. 睇吓可唔可以買外賣拎走
중앙일보
如果去到發現full曬、要等勁耐，或者嚟唔切book位，大家都可以考慮買外賣返住宿食！韓國外賣文化非常發達，所以好多餐廳都會提供外賣服務~ 大家去到可以睇吓餐廳有冇寫住「포장（外賣）」呢個字，或者直接問職員「포장 가능한가요?（Po-Jang Ga-Neung-Han-Ga-Yo，“可唔可以外賣”嘅意思）」，亦都可以直接講「Take Out」，韓國人都會聽得明。
시정일보
有時候有啲鋪頭叫外賣反而會有優惠添！大家如果想食到呢啲人氣餐點，但又唔想排隊，買返住宿食都係一個唔錯嘅選擇。
6. 餐廳外賣服務
好似頭先所講，韓國外賣文化真係非常發達，有好多餐廳都有進駐各種外賣平台，無論你人喺邊都可以輕鬆叫到外賣！所以建議大家可以去check下自己想食個間餐廳可唔可以叫到外賣。
不過因為呢啲外賣App都需要先通過本人身份認證先用得，對遊客嚟講都幾唔user-friendly... 不過大家唔需要擔心，Creatrip有提供代叫外賣服務，無論係炸雞、部隊鍋、豬腳、辣炒年糕，甚至係生魚片同人參雞湯等等嘅韓國美食都可以order到㗎！
想去韓國人氣餐廳食飯，唔可以話好難，但對遊客嚟講都唔易。不過大家只要記住上面呢幾個小Tips，就一定可以去到想去嘅餐廳，盡情享受韓國美食！
如果有更多想知嘅內容，都可以隨時留言或者dm話俾我哋知：）
Instagram：creatrip.hk