Hello，大家好，我哋係由韓國人每日提供最新韓國旅行資訊嘅Creatrip。
相信大家有追韓星嘅話都可能會試過幫偶像刷音源！又或者睇音樂節目嘅時候，都會見到有一項分數係音源嘅分數。大家又知唔知韓國人係用乜嘢音樂平台去聽歌㗎呢？而家就等小編而家話俾大家知啦！
韓國音樂平台有邊啲？
香港人好多時可能都會用KKBOX、Spotify、iTunes等等嘅App去聽歌，但係其實韓國人都唔係用呢啲App去聽歌㗎！好多粉絲都會特登用返韓國嘅音樂app去聽歌，就係為咗幫偶像刷音源。
音源成績好嘅話佢哋就可以喺人氣歌謠、Show Champion、M! Countdown、Music Bank等等嘅音樂節目入面攞獎，甚至喺年末嘅音樂頒獎禮上面得獎。
咁而家就等我哋一齊嚟睇吓佢哋會用啲乜嘢App啦！
韓國人會用嘅5個聽歌App
1. Melon
相信最多人聽過嘅韓國音樂App就係呢一個啦！佢亦都係最多韓國人會用嘅音樂平台。而家Melon成為咗KakaoTalk嘅一部份，仲可以連接KakaoTalk嘅帳號去聽歌添！
因為佢可以連接去KakaoTalk，所以如果有KakaoTalk嘅朋友都可以將呢隻歌放喺自己Kakao嘅簡介上面，等其他人都可以一齊聽！就好似以前嘅MSN咁樣！ (小編年紀暴露XD) 不過呢個程式要本人實名認證先可以開始用，所以外國人用呢個App嘅時候都會有啲唔方便。
2. Genie
Genie就係另一個會喺音樂節目入面計分嘅App，呢個App獨有嘅特點係比其他App更加多元化。因為佢嘅月費計劃比起其他App有更多選擇同埋平啲！
喺Genie呢個App入面仲會有「Genie TV」。透過呢個功能仲可以喺app入面睇到M! Countdown或者Show Me The Money等等唔同嘅節目。 Genie呢個App嘅優點係，佢喺登記嘅時候唔需要認證，就算係外國人都可以用。
3. Bugs
Bugs係韓國小眾知名嘅音樂平台，呢個App都係唔需要實名認證就可以登記，所以都好適合外國人用。
不過如果想用App入面嘅優惠券，就需要韓國嘅要實名認證啦！
4. Soribada
相信有追星嘅朋友對呢個大家都唔陌生，Soribada由2017開始就有舉辦韓國音樂頒獎典禮「Soribada最佳音樂大獎」。不過好可惜因為COVID-19嘅影響，為咗縮小社交距離，觀眾嘅數目都控制喺一半以下。
佢同其他App嘅功能都差唔多，不過佢入面冇其他額外嘅功能或者廣播節目等等，所以相對都比較少人用。
5. Naver Vibe
Naver Vibe係由NAVER Music開發嘅App，佢最特別嘅係有「NAVER Radio」，大家如果用呢個App嘅話都可以免費喺入面聽電台。呢個電台每一日都會做廣播，而且係由韓國嘅Idol輪流去做DJ添！
如果係外國人嘅話都可以請韓國嘅朋友幫大家去申請，偷偷話俾大家知，佢仲會有一個月免費嘅體驗添！
以上五個就係韓國人最常用嚟聽歌嘅App！大家又有冇用過？睇完之後又有冇對韓國嘅音樂App多咗了解呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
