Hello，大家好，我哋係由韓國人每日提供最新韓國旅行資訊嘅Creatrip。
好多人嚟韓國，一定會搭地鐵，尤其首爾地鐵四通八達，幾乎冇地方係去唔到，只不過係複雜程度令人超乎想像。不過大家又知唔知？首爾地鐵最基本、最多人搭嘅就係1號到9號線呢？早前有人整理出講到首爾地鐵，就會令大家好有共鳴嘅特點整理，唔知大家又會唔會有同感呢？
首爾地鐵聯想？
首爾地鐵1號線（ ）
首爾地鐵1號線係韓國歷史最悠久，如果問到韓國人，佢哋都會話首爾1號線「只有強者先可以生存」。因為1號線最多傳教士、小販，好多站都係老人家成日去嘅地方，好似鐘閣、鐘路等。所以呢條路線被公認為老人多之外，飲醉酒嘅奇怪大叔亦都超多。
整體嚟講，地鐵1號線因為比較舊，成日會有一陣味，班車到站時間亦都唔準。重點係明明仁川、水原、安養都係1號線，不過就要搭唔同車，一唔小心就會搭錯。
首爾地鐵2號線（ ）
講到2號線，第一個會諗到嘅係「環狀線」，而且因為2號線環繞首爾市中心地帶，所以無論幾時搭都好，乘客一樣多，返工放工嘅時候完全可以想像得到有幾恐怖。
首爾地鐵3號線（ ）
首爾地鐵3號線被稱為「較為和平（？）」路線，呢度主要係南北連接路線之外，其他都係聚集住宅區同寫字樓，冇人搭嘅時候，可以真係話好空，但人多嘅時候又真係會令人覺得好痛苦。
首爾地鐵4號線（ ）
4號線大多數都係觀光客（因為會經明洞站、東大門、首爾站），而呢條路線會經過嘅大學亦都有好多，所以唔少人都認為，4號線主要都係觀光客同大學生多。
首爾地鐵5號線（ ）
- 金浦機場、汝矣島、西大門、光化門、鐘路、乙支路、馬場、奧林匹克公園
首爾地鐵5號線普遍都係挖得好深，亦即係話無論係搭5號線定係轉乘，都一定要行好多路同搭好多次扶手電梯。不過普遍嚟講，首爾地鐵5號線內部畀人感覺都好舒服，同6號線感覺有啲似，但缺點就係搭車嘅時候，車入面嘅聲音好大。
首爾地鐵6號線（ ）
- 數碼媒體城、世界盃體育場、望遠、上水、梨泰院、東廟、高麗大
韓國人稱首爾地鐵6號線為「百慕達鷹岩地帶」，因為鷹岩站就喺呢度，延伸過去將會呈現小型環狀車道區域，俾人一種好神奇嘅感覺，而且搭嘅人唔多，亦被稱為相對和平路線。
雖然6號線會經過梨泰院一帶，但最多人經過都只係週末或者凌晨。
首爾地鐵7號線（ ）
- 蘆原、建大、江南區、盤浦、加山數碼媒體城、富平
7號線同5號線一樣都係做得好深，7號線連接好多個轉乘站，所以會俾人一種好逼嘅感覺。同時7號線一帶有好多寫字樓，年齡層同氛圍整體嚟講，都同另一邊大學區域好唔同。
首爾地鐵8號線（ ）
- 蠶室、石村、可樂市場
顏色最可愛、最令人印象深刻嘅就係首爾地鐵8號線，主要連接蠶室一帶，路線好短，只要係返工放工時間，就一定會好多人，只要到咗週末就好靜。
首爾地鐵9號線（ ）
- 金浦機場、堂山、汝矣島、鷺梁津、銅雀、高速巴士站、綜合運動場、松坡渡口
9號線係喺漢江以南區域，完全就好似戰爭一樣嘅存在，甚至有「地獄鐵（지옥철）」之稱。好多人都會專揀（급행）急行列車，只要一到返工放工時間，呢條線真係好恐怖，就連韓國人都驚。
以上係就連韓國人都超有同感嘅首爾地鐵聯想，唔知大定又認唔認同呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
