Hello，大家好，我哋係由韓國人話你知每日最新韓國資訊嘅Creatrip。
＃韓國新聞＃首爾市長
＃性騷擾＃記者會
日前自殺身亡嘅首爾市長朴元淳被控性騷擾一案，被害人發表立場。
聯合韓國女性電話事務處長同常任代表、性暴力諮詢所所長同副所長、法務律師等人，13號下晝召開記者會，說明朴市長嘅加害方式，並發表立場。
被害者同律師早喺2020年05月已經見面，並交代具體嘅受害內容，準備起訴；7月8號，首爾廳接獲起訴書。
由起訴受理到隔日（9號）嘅凌晨兩點半，該名被害者（A某）接受陳述調查，第二日下晝，就傳出涉嫌加害者（朴）失蹤，最後身亡嘅消息。
✨馬上Follow我哋IG
instagram.com/creatrip.hk
受害者發表立場
來源：동아일보首爾市職員A某以性騷擾嫌疑起訴已故首爾市長朴元淳。
A某今日下晝透過律師團隊發表立場。
韓國性暴力諮詢所所長指出：「朴元淳市長利用自己嘅權力對秘書性騷擾。」
受害者對律師團隊表示，自己無法拒絕同抵抗市長嘅情況下，喺工作同非工作時間內被多次性騷擾，包括不必要身體接觸、傳送不雅相等等，前後持續咗四年。
好多人質疑A某，點解當時唔即刻投訴加害者，而要等到依家呢？
性暴力諮詢所所長指，雖然A某曾向首爾市內部尋求幫助，但得到嘅回答係「市長唔係呢種人」、「秘書嘅任務就係要幫助市長」等等，試圖將事件淡化。
朴元淳（來源：news1）加害者會send自己著住內衣嘅相，同埋淫穢嘅短訊畀受害者。
即使喺受害者申請調職之後，加害者仲一直私底下聯絡受害者。
經過調查同審判，加害者要受到應當嘅懲罰，而被害者亦應該要回歸正常生。
不過，調查期間，加害者（朴）得知自己被控告性騷擾，就即刻做出極端選擇，但被害者就要承受世人目光，忍受痛苦。
呢單案件係典型嘅性騷擾案，但因為被告死亡，唔可以繼續刑事訴訟。
不過，團隊強調：「真相唔會就咁被埋沒。」
朴市長係對女性人權非常關心嘅社會領袖。
加上，Me Too運動、前忠南知事同埋前釜山市長等人都因性騷擾案件黯淡退場，佢（加害者）應該知道自己會有點嘅下場，但就冇即刻向被害者道歉同停止性騷擾。
來源：연합뉴스
團隊指，無論以任何形式，加害者都應該向被害者道歉，但就只留底「對唔住所有人」嘅遺言，就好似已經向受害者道歉，自己再無責任，將心理壓力加諸喺受害者上。
案件起訴嘅同時向加害者轉達調查情況，正正反映喺首爾地位高嘅人，喺調查正式開始之前就有毀滅證據嘅機會。
呢種情況下，仲有邊個可以相信國家嘅法治系統呢？
韓國性暴力諮詢所副所長，喺記者會上代讀A某嘅親筆信件，以下係全文：
╔
以為可以隻手遮天。係我太傻。我真係好後悔。無錯，第一次（被性騷擾）嘅時候我就應該要大聲呼叫、喊出嚟，然後報警。
咁做，依家嘅我仲會唔會自責、會唔會不停後悔呢？長時間沉默下，我一個人好攰、好辛苦。
我唔係想要生活喺更好嘅世界，我只係想過返人過嘅生活。
喺巨大嘅權威前，我想要令無能、軟弱嘅我得到公正、平等嘅法律保護。
我想喺安全嘅法庭上，向佢講「唔好」；想喊住講我真係好攰；想原諒佢。
想在法治國家韓國接受法律的審判、想接受有人性的道歉。
鼓起勇氣交出起訴書，連夜接受調查時，傷害我尊嚴嘅人竟然主動放棄自己嘅尊嚴。
死亡，呢兩個字係我喺嗰段痛苦嘅時光都無法講出口嘅字。
我冇信心傷害愛我嘅人，所以至今都唔想相信。為故人祈求冥福。
因為擔心會傷害好多人，所以我猶豫咗好耐，但即使有50多萬位國民請願（反對市葬），仍冇改變現實，再次令我感受當時（朴）嘅權威有幾大，大到令人窒息。
面對歪曲事實、各種猜測嘅世界，我懷住恐懼同沈重嘅心拎起筆（寫信）。
我以後要點生存落去呢？我係人，我係活生生嘅人。希望我同我嘅屋企人，都可以脫離苦痛，回復安全嘅日常生活。以上。
╝
| 其他延伸閱讀 | |
 釜山市長落台 |  朴元淳自殺身亡 |
