Hello，大家好，我哋係由韓國人每日話你知最新韓國旅行資訊嘅Creatrip。
早排再三發生虐待領養/繼養兒童嘅事件！原來韓國曾經有段「嬰兒送養潮」，係一段好多韓國人極力想撇清、想遺忘嘅歷史。
韓國海外送養兒童嘅歷史
625韓戰引發悲劇
625韓戰之後，韓國處於戰後恢復期，好多失去咗家人嘅小朋冇辦法獨自生活，所以被送去政府集中嘅育幼院照顧。加上戰後民不聊生，唔係個個家庭都養得起小朋友，連政府都能力提供福利、資助，只好將呢啲小朋友送養去海外。
韓戰之後最艱辛嘅50年代仲未係高峰期，到80年代韓國送養兒童去海外嘅數目有增無減，單係1985年就有8,837名小朋友遠離自己嘅家鄉，接受國外嘅家庭領養。
1985年後，海外送養潮開始減少，但減少嘅速度相當緩慢。直到2011年，海外送養嘅人數先第一次跌到千名以下（916名）。
根據韓國保健福祉部嘅正式統計，50年代開始有17多萬名嘅韓國小朋友接受海外領養。呢個只係官方嘅資料，有人話如果加埋美軍進駐朝鮮半島時期，透過美軍直接領養嘅混血兒（同韓國女性所生嘅小朋友），或者透過海外機構、法人領養，人數應該超過20萬名。
造成韓國嬰兒送養潮嘅原因
除咗啱啱提到，韓國經歷戰爭之後，經濟環境非常差，唔係每個家庭都養得起小朋友，加上重男輕女嘅觀念，運氣好啲嘅，就留低BB仔繼後香燈，BB女就直接拎去送養。
對於十月懷胎嘅媽媽嚟講，要送養自己個小朋友呢個決定真係唔容易，但係當時連養自己都難，為咗生存，只好犧牲小朋友。另一方面諗到送小朋友去到國外，有更好嘅生活同教育，對佢哋嚟講都係好事。
可能你會問，唔通就冇一啲係比較富裕嘅家庭咩？佢哋又冇諗住要收養啲小朋友？韓國人唔係好重視「群體」觀念咩？
正正因為呢個「群體」概念，令韓國收養率非常低。根據統計，只有4%左右係由韓國人夫婦直接喺韓國進行收養，而呢4%之中，大部分嘅韓國夫妻都淨係收養啱啱出生冇耐嘅BB，因為可以製造自己懷孕產子嘅假象。
雖然都係大韓民國嘅人，但佢哋同時好注重倫理、血緣、親屬關係，一個完全冇血緣關係嘅小朋友顯然唔屬於佢哋嘅「群體」，自然有「排外」嘅心理，唔願意收養呢啲小朋友，咁都解釋咗點解韓國家庭收養嘅大部分都係BB，而唔係長大到一定歲數嘅小朋友。
西方國家對於血緣冇東方社會咁執著，加上當地嘅社福概念同領養風氣相對成熟，所以過去有無數膝下無子嘅歐美父母，越洋過海嚟到韓國，認領呢啲被韓國父母放棄嘅小朋友，令韓國負上「嬰兒輸出國」嘅名稱。
送養兒童之中嘅「混血兒」
另外，韓國仲有一班小朋友，喺戰爭結束後嘅50、60年代被人當波咁踢嚟踢去。
美軍長期駐守韓國，同唔少韓國女性留下後代，但因為父親係外國國籍，就算係同韓國國籍嘅母親生嘅小朋友，一直係韓國生活，講一口流利嘅韓文，都唔可以攞到大韓民國嘅國籍。除非父親放棄原有國籍，或者有人收養呢啲小朋友，佢哋先可以喺法律上叫做「韓國人」。
根據統計，1955年就有439名混血兒、1957年355名、1958年701名、1959年1,023名、1960年1,075名，人數不斷上升，而佢哋大多數都係冇國籍，加上五官望上去就同韓國人長相好唔同，政府都唔接納呢啲小朋友。原本打算喺韓國境內隔離收容，但未能實施。當局出面積極遊說海外領養，成為咗當代嘅悲劇之一。
「2198+α」及送養制度化
雖然送養小朋友係時代悲劇，無可奈何嘅決定，但後人攻擊政府當局太輕易將小朋友送去海外。1988年漢城奧運前三年嘅送養高峰期，被國際戲稱韓國係「嬰兒送養國」，更被實行社會主義嘅北韓大作文章。
以前針對送養兒童方面冇太明確嘅法規，好多都係好似貨品一樣咁進行領養，送出海外之後就唔會跟進落去，嗰20萬名小朋友如今變成點？至今仍然無從得知。
由於政府受到強烈批判，韓國當局開始立法，喺1976年12月制定委託收養嘅規例，1995年時再度修例，直到2011年先正式改名為《收養特例法》（입양특례법）。
之所以制度化，係因為喺1956-1972年之間，有近30次包機，總共有「2198+α」名韓國孩子送海外領養。點解係「2198+α」2,198人係已知嘅最小數字，因為喺嗰16年裏面有幾年冇記錄到詳細人數，只有「人數+α」嘅寫法。
二戰過後，歐洲大批嘅戰爭孤兒轉移至美國，而美國亦通過咗臨時性嘅《難民救助法》，制定接收外國人同協助更換國籍等法律程序。某種程度上，韓國當時算係急住將呢啲韓國孩子送去美國（第三方組織），搶喺《難民救助法》失效嘅1956年年底前，透過大規模包機，將啲小朋友當係聖誕禮物咁送去美國嘅養父母身邊。
呢啲小朋友就好似貨物一樣咁被運送，韓國內部未對呢種行為作出批判同制裁，引起國際上強烈反對，美國部分州份甚至出現咗禁止收養嘅法案，成為呢種透過第三方協調、包機收養消失嘅原因。
韓國開放旅行之後，收養方式由包機變成「護送服務」（에스코트 서비스），由留學生、背包客由韓國帶送養嬰兒至海外，喺機場同養父母面交。咁樣嘅方式，唔只被批評係買賣嬰兒，亦都係對小朋友同護送者，造成一輩子難以撫平嘅傷痕。
呢啲護送嘅人多數冇撫養小朋友嘅經驗，被領養機關以「成全大愛」之名，協助幾個小時嘅護送。有唔少護送嘅人喺陌生嘅機艙入面，同小朋友產生巨大嘅情感。連大人都會咁，更何況係離開韓國嘅小朋友呢？因此過去出現過被送養嘅小朋友，喺目的地機場抗拒同護送者分離，令護送者大感唔忍心、覺得自己好羞愧嘅情況。
今日韓國嘅送養政策
스마일게이트 희망스튜디오
韓國為咗洗去自80年代開始出現嘅「孤兒輸出國」（고아수출국）污名，積極加強兒童社福同相關法規限制，更喺2007年引進《海外領養配額制》（해외입양 쿼터제），希望每年減少10%嘅海外領養兒童人數，同時實行「五個月保留制」（5개월 유보제），領養小朋友前五個月需以（韓國）國內領養為主，如果搵唔到養父母，先會介紹去海外領養。
雖然極力洗白，但韓國養父母領養兒童嘅數量冇太大嘅變化（2006年1,332名、2007年1,388名、2008年1,306名、2009年1,314名），反而係海外領養數量一直下跌，配額制似乎成為海外父母想領養兒童嘅絆腳石。
政策實行之後，副作用亦隨之增加。
연합뉴스
由於孤兒被領養前大部分都係喺委託家庭生活，但受到政策影響，海外領養所需要嘅時間變長咗，無力承擔照顧小朋友嘅事例越嚟越多，導致領養兒童被送去臨時保護設施嘅情況越嚟越多。另外，小朋友越等，自己就越大個，唔容易被挑中領養，成為另一個問題。
專家指出，一味限制海外領養唔係最好嘅政策，政府應該透過獎勵金，改善兒童委託照顧嘅支援，甚至透過宣導，改變韓國人「血緣」為中心嘅觀念，先係改善送養小朋友至海外嘅正確作法。
身份認同
呢啲小朋友喺海外長大，擁有新嘅姓名同身分，但其實佢哋一直搞唔清邊度先係自己真正嘅家。雖然對原生父母嚟講，將小朋友送走係無可奈何嘅決定，但事隔多年之後，唔係每個人都願意再見到自己早已送養海外嘅親生骨肉。
近幾年，呢啲小朋友積極返去韓國，想尋找自己身世嘅祕密，但多數嘅親生母親都選擇避而不見。呢啲望落係韓國臉孔，但唔識講韓文，亦都冇韓國國籍嘅「外國人」相當傷心。
《我是遺物整理師》
《明天不要來》
Netflix劇集《Move To Heaven：我是遺物整理師》就提到返韓國搵親生媽媽，但不幸病死嘅劇情，成為韓國近年來少數提到當年呢段慘痛回憶嘅作品；同樣係Netflix劇集《明天不要來》，男主角設定為被領養至海外嘅韓國小朋友，返韓國讀書嘅身分。
以上係韓國過去相當沉重嘅送養兒童嘅黑暗歷史，唔知大家有冇對韓國領養兒童嘅情況多咗了解呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
