Hello，大家好，我哋係由韓國人每日提供最新韓國旅行資訊嘅Creatrip。
大家有冇聽過「果汁相」呢個字呢？睇到生得好似水果嘅藝人，韓國人會稱之爲「果汁相」，亦因為咁令到韓國有段時間好流行「果汁相妝」！呢種擁有呢種果汁相嘅藝人笑嘅時候，都好似有果汁滴出嚟咁，今日就同小編一齊去睇下擁有果汁相藝人啦。
水密桃相
水蜜桃相係果汁相入面最先流行嘅類型，特點係好似BB嘅塊面上面加咗粉紅色嘅胭脂咁。佢嘅魅力就係令人睇住就覺得好甜，同時亦係咁多款水果中最流行，咁有咩藝人係水蜜桃相呢？
f(x) 雪莉
事實上，「水蜜桃相」一開始係因為前f(x)成員雪莉而發明嘅，佢嘅笑容真係充滿住清爽甜美感，由佢出道開始，白淨嘅皮膚同佢粉紅色面頰真係同水蜜桃一模一樣！
설리 인스타그램
雪莉嘅好朋友IU仲為咗雪莉創作咗一首名爲《水蜜桃》嘅歌㗎。
BTS Jimin
充滿反轉魅力嘅智旻都係粉絲挑選出嚟嘅水蜜桃相，再加上佢之前染過粉紅色頭，令佢更加似水蜜桃！
金多美
베네피트
大家仲記唔記得電視劇《梨泰院Class》入面嘅「趙以瑞」呢？佢平時同劇入面嘅形像好唔同，係會散發住好可愛嘅感覺，就連面型都好似水蜜桃，亦都因為咁金多美成爲咗Benefits桃色胭脂嘅代言人。
EXO SuHo
EXO嘅隊長SuHo都係出名嘅水蜜桃相之一，佢嘅皮膚真係白得發光，多得佢咁白淨嘅皮膚，就顯得佢粉紅色嘅臉頰更加明顯，EXO-L都叫呢個做「蜜桃光」。
車厘子相
臉又圓又可愛，而且同紅色系顏色好襯嘅人，就會被稱爲車厘子相！咁又有邊個藝人係以車厘子相出名呢？
TWICE 娜璉
果汁相嘅代表人物之一TWICE嘅娜璉，每次笑得好燦爛嘅時候，圓圓嘅顴骨同紅色嘅唇膏係娜璉嘅魅力點！
本月少女 Chuu
如果係K-POP粉絲的話，一定都有聽過「咬咬愛心」，創始人就係本月少女Chuu！成日都笑咪咪，活潑得嚟又可愛嘅Chuu令人一望住就諗起車厘子，大家又覺得佢可唔可愛呢？
Oh My Girl YooA
以車厘子相出名嘅Oh My Girl YooA，佢厚厚嘅紅唇就會令人諗起車厘子！
BTS 柾國
BTS嘅柾國都係車厘子相新崛起嘅強者，佢染咗紅色頭髮嘅時候，ARMY都叫柾國做「人間車厘子」。雖然柾國無論染咩顏色都好啱，不過佢嘅紅色頭髮真係令佢好顯眼，同佢超級襯！
蘋果相
講到蘋果相係唔係就會諗起白雪公主呢？白淨嘅臉頰，加上充滿活力嘅臉蛋係佢最大嘅特徵，而且畀人有一種超有魅力嘅感覺，咁蘋果相又有啲咩藝人呢？
Red Velvet Joy
Red Velvet嘅Joy就係蘋果相嘅代表偶像，對於又可愛又性感嘅佢嚟講，呢個外號係唔係超啱呢？特別係爲咗《Red Flavor》活動嘅時候，染咗紅色頭髮真係超級靚！
其實Joy出道初期嘅外號係青蘋果，以韓國年齡19歲嘅年紀出道嘅JOY當時係有種清純嘅魅力，而且佢嘅象徵色亦都係綠色，笑嘅時候帶有少少怕醜嘅青澀感，真係同半熟嘅青蘋果一樣。
秀智
充滿魅力嘅秀智都係以蘋果相而聞名嘅藝人，由10年前作爲偶像出道到而家做演員，真係展現咗好多樣嘅面貌。由清爽到迷人嘅樣，都係好似蘋果，特別係秀智嘅蘋果色紅唇真係好啱佢，所以佢每次搽紅色唇膏嘅話都會成爲熱門話題。
VERIVERY 岡旻
VERIVERY嘅岡旻對大家嚟講可能有少少陌生嘅偶像，佢哋係Jellyfish娛樂公司2018年出道嘅新人男子組合。其中「岡旻」係K-POP粉絲之間以顏值出名嘅成員，亦都因為同Red Velvet嘅IRENE好似，所以喺韓國都係好出名，佢塊面有少少泛紅，所以就會令人諗起蘋果，所以亦都被粉絲揀佢係蘋果相之一！
檸檬相
清新嘅最強者 - 檸檬！檸檬相係指一啲擁有好似檸檬咁清爽魅力同活潑可愛魅嘅人。檸檬相又有邊啲藝人呢？
Somi
한국 코카콜라
以清爽魅力同完美實力獲得PRODUCE101第一季拎第一嘅Somi就係檸檬相嘅代表藝人。佢由I.O.I開始到而家以Solo歌手身份活動，一直都展現出活潑可愛嘅魅力，亦都因為咁拍攝咗清新嘅芬達廣告！
Red Velvet Yeri
Red Velvet嘅Yeri都係檸檬相藝人嘅代表，雖然睇落個樣好高傲，但係只要一笑就變得好清爽嘅樣真係同檸檬一模一樣！金髮都好啱佢，係名副其實嘅檸檬相！
臉紅的思春期 安智英
以Mnet競賽節目《Super Star K》爲契機出道嘅臉紅的思春期，主唱安智英都有檸檬相嘅魅力，檸檬色嘅亮金髮係佢嘅代表性標誌。喺舞台上用佢獨特嘅音色唱歌，真係迷到一班粉絲。
EXO XIUMIN
喺早排退伍嘅XIUMIN都係檸檬相，雖然係EXO嘅大哥，但係比任何人都可愛同清爽嘅笑容就會令人諗起檸檬！呢個就係望住就會令人心情變好嘅笑容！
布冧相
夏季水果布冧係深紅色同紫色之間奇妙嘅紫色，布冧相俾到人可愛清爽嘅感覺，而同時亦都俾人一種奧妙嘅感覺！
Oh My Girl 效定
除咗瞓覺之外就一直笑嘅Oh My Girl隊長效定，心情唔好嘅時候，只要一望到效定好似布冧咁嘅爽朗微笑，一定會得到治癒。
IVE 員瑛
由第一次登場嘅瞬間開始就以驚人嘅外貌成爲話題，最終喺Produce 48中獲得第一名嘅IZ*ONE張員瑛！因爲佢可愛又有多種魅力嘅外貌，所以韓國網民都成日討論佢到底生得似啲咩水果。喺音樂節目《the show》公開嘅視頻入面，員瑛話自己嘅花名係「布冧」，所以之前WIZ*ONE都會叫佢做布冧㗎！而家再由IVE出道，希望佢可以一直行花路！
Lovelyz出道 Kei
充滿魅力笑眼嘅Lovelyz主唱Kei都被粉絲叫佢做布冧，雖然係塊面圓圓哋，但因為下巴比較尖，所以同布冧真係好似呢？
IG (@_____yjy_____ )
雖然塊面生得好似布冧，但事實上Kei被叫布冧嘅契機就係Lovelyz編舞家嘅IG post，講到Kei喺上輔導堂嘅時候突然入去，將兩個布冧塞咗喺編舞家隻手，然後就走咗。然後編舞家喺個po都寫「因爲生得似布冧...」，而呢篇文章就喺LOVELINUS之間成爲熱門話題。
柑桔相
最後，我哋就嚟了解下又甜又清爽嘅柑桔相藝人啦。
姜美娜
前I.O.I成員兼前gugudan成員姜美娜都係因為柑桔相而出名，佢由出演《PRODUCE 101》開始就以可愛嘅果汁相出名，直到而家就被稱爲柑桔嘅代表。
Seventeen 勝寬
Seventeen主唱兼機靈鬼勝寬喺粉絲入面都因爲生得似柑桔而出名！喺音樂節目上班路仲分柑桔俾記者，真係好可愛！
事實上，姜美娜同勝寬被稱爲柑橘相仲有其他原因，就係因為佢哋兩個都係濟州島出身！位於韓國南部嘅濟州島係柑桔種植量比較多嘅島嶼，喺韓國佢哋覺得「濟州島=柑桔」，所以姜美娜同勝寬就係咁被稱爲柑桔相！
我哋今日瞭解咗由水蜜桃到柑桔，生得好似水果相嘅藝人。望住佢哋心情都會特別好，唔知大家仲知唔知其他有果汁相嘅藝人呢？不妨留言話俾小編知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
