韓國明星又靚又有意思嘅紋身
由小清新嘅文字到自己愛嘅人，韓國明星嘅紋身到底有啲咩意思呢?
Hello，大家好，我哋係由韓國人話你知每日最新資訊嘅Creatrip。
喺10至20年前，韓國有紋身嘅藝人並唔多，不過最近因為紋身去展示自身價值觀同個性嘅藝人越嚟越多，唔少粉絲都開始跟住去整返個！今日小編就想同大家介紹下，因為紋身好靚而成爲話題嘅藝人同佢哋個紋身嘅意義。
1. 少女時代 - 太妍
將小巧可愛嘅紋身印喺身體各個地方嘅太妍！一直都持續咁紋文字同迷你紋身。
UV 紋身
太妍喺食指上面刻嘅UV紋身，呢個係平時睇得唔清，淨係會喺黑光照明底下先會見到， 感覺會喺party度成爲焦點嘅紋身。
頸後紋身
太妍咁多紋身之中，令人印象最深嘅就係頸後面嘅「purpose」文字圖案。
佢對於紋身嘅意義表示話：「唔想毫無意義咁生活落去，所以刻咗purpose呢個單詞。」 可以感受到平時太妍嘅價值觀！
2. BTS - 柾國
柾國由以前開始就巳經對紋身充滿熱愛，會用紋身嚟刻自己鐘意嘅嘢。
手背紋身
柾國手背上面嘅紋身唔單止係BTS成員，就連A.R.M.Y都會感動，驟眼睇好似係只係得A.R.M.Y，但仔細一睇A冇咗一橫「-」，喺無名指上而加咗「J」，包含咗成員嘅第一個字母。再加上紫色愛心同BTS嘅標誌，就可以感受到柾國對組合同粉絲嘅愛。
名言紋身
柾國本來就有好多紋身，其中印象最深嘅紋身就係刻住關於「熱情」嘅2款文字紋身。
「make hay while the sun shines（有機會嘅時候要捉住）」，「rather be dead than cool（寧願死都唔想冇熱情）」
呢啲句子係由出道初期就被認爲係柾國嘅座右銘，雖然出道已經有9年，但仲想要保持住呢份熱情嘅柾國真係好叻！
3. BTS - Jimin
同柾國一樣，Jimin都有好多又有型又有意思嘅紋身。
印字紋身
Jimin腰部嘅「NEVERMIND」文字圖案，雖然唔清楚係紋身定係水印貼紙，但因爲好出名，所以就列埋入今次呢個紋身介紹入面。
唔單止係粉絲，連普通人都知道Jimin呢個肋骨紋身，係令佢喺舞台上嘅魅力倍增嘅因素。
數字紋身
數字13係Jimin平時最鐘意嘅數字，係佢嘅生日（10.13），亦都係出道日（6.13），係一個好有意義嘅數字。
4. 泫雅
泫雅嘅紋身係出曬名好襯佢！ 可以睇到佢身上大大小小嘅紋身，呢個亦都係泫雅特有嘅風格。
膊頭紋身
泫雅最出名嘅就係膊頭紋身，只要著露膊衫嘅時候就會露到，所以喺韓國都有好多人都有紋呢款膊頭紋身㗎！
佢博頭嘅紋身係「媽媽係令我活着嘅心臟」，爲咗唔好忘記母親嘅愛而刻上呢個紋身。
微笑紋身
簡單可愛嘅微笑形狀紋身，淨係佢嘅彩色紋身就巳經成爲焦點，即使唔戴飾物都有華麗嘅感覺！
5. 李孝利
李孝利有好多復古風格嘅紋身。
印字紋身
李孝利因爲佢嘅環保行爲而備受矚目，右臂後面都刻住「Walk lightly in the spring, Mother earth is pregnant.」嘅字樣。呢個係迎接所有生命甦醒嘅春天，將地球比喻爲孕育生命體「母親」嘅印第安俗語。
圖案紋身
李孝利嘅膊頭上面印有佛教嘅「曼陀羅」圖案，曼陀羅意思係擁有所有德行，無需執着喺世上嘅一切。
6. Zico
ZICO都係以多紋身而出名，特別係作爲Rapper，令佢寫到歌詞嘅相關紋身有好多。
世宗大王紋身
作爲說唱歌手，爲咗表達對世宗大王創造韓文嘅尊敬之情，所以就紋咗世宗大王喺手臂內側。
媽媽紋身
ZICO著短袖或者無袖都可以睇到呢個紋身，佢細個就因爲心臟脆弱而做過心臟手術，所以佢喺左胸前紋咗媽媽年輕時嘅樣，想記住媽媽嘅愛心。
7. WINNER 宋旻浩
宋旻浩都係用紋身去記住自己嘅價值觀同想法嘅明星之一。特別嘅係同其他藝人相比，宋旻浩係以韓文紋身比較多而出名。
韓文紋身
宋旻浩嘅韓文紋身都好有意思，有好多獨特而有個性嘅紋身。
膊頭後面嘅「端正姿勢」、「明朗精神」、手上仲有「做得好好」嘅印章紋身！其中「做得好好」嘅紋身係WINNER 5週年嘅紀念紋身，係佢最珍惜嘅紋身。
天氣紋身
好多人都模仿過嘅天氣紋身！ 簡單可愛又突顯個性嘅設計。沿住鎖骨線條紋咗閃電、太陽、雲、雨天嘅形狀。 宋旻浩經常根據當日嘅天氣喺上面畫一個紅色圓圈。
8. TWICE - 彩瑛
彩瑛最近沉迷咗紋身！雖然未知紋身嘅意思係啲咩，不過好多都好小清新！
迷你紋身
佢有幾個小巧可愛嘅迷你紋身，由士多啤梨、蕃茄、紅蘿蔔等，仲有啲獨特嘅圖案等等，即使平時唔戴飾物，都可以成爲可愛焦點。
除此之外，韓國嘅偶像，演員都有好多都紋咗有意思嘅紋身！ 如果大家知仲有邊個嘅話，不妨留言話俾小編知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
