韓國餐廳點解咁遲先開門？
大多數韓國餐廳由11點開始營業，點解佢哋唔一早開門呢？
Hello，大家好，我哋係由韓國人話你知每日最新資訊嘅Creatrip。
喺香港食早餐可以隨便搵一間茶餐廳入去食個A、B、C餐，不過喺韓國相對就無咁簡單！因為大部分舖頭都係11點先會開始開門。今日小編就帶大家了解下，韓國餐廳點解會咁遲先開舖啦！
韓國餐廳點解咁遲先開門？
1. 韓國人瞓到好晏？
實際上，韓國公司都要9點至10點左右返工，學校都係一樣，所以遲起身應該唔係韓國餐廳遲開門嘅主要原因。2018年嘅統計數據發現，有66.1％嘅韓國人睡眠時間都喺6-8個鐘之間，假設佢哋喺凌晨12點瞓，佢哋都會喺朝早6點到8點左右起身。特別係啲老人家，大部分都係好早就起身。 （𣎴過，如果係放假，每個人都會想訓得耐啲嘅），所以唔關佢哋瞓到好晏事。
2. 自己會整早餐
BTS V Live
早餐係韓國人重要嘅一餐，所以好多韓國人都一定會食早餐，特別係同父母一齊住嘅人。正正就係因為韓國人都會喺屋企食早餐，所以可能係大多數餐廳唔會咁早開門嘅另一個原因。
3. 生活方式改變
應該有好多人都知道韓國人成日咩都好急，每個人都會趕時間去返工或者返學，如果趕唔切食早餐，佢哋就會係飲咖啡去代替。除此之外，喺韓國嘅返工時間大概係9點至10點，距離午餐只係得2-3個鐘，所以韓國人會揀唔食早餐，而係會直接食午餐。亦都因為係咁，大部分餐廳唔想喺朝早開舖嘅原因之一。
4. 鋪頭會開到好晏先閂門
大部分韓國人都傾向係由晏晝開始工作，大家下次嚟韓國可以細心觀察，如果係朝早去，只會見到外國遊客，不過如果係中午出去就會見到好多韓國人。再加上鋪頭通常由上午11點開始營業，有啲仲會做到凌晨2-3點先會閂門，所以都需要一啲時間去管理舖頭再為第二日做準備。
5. 勞動法52小時
至2018年以嚟，韓國修改咗勞動法，將最長工作時間設定為每星期52個鐘，所以韓國餐廳都必須調整營業時間，亦都因為係咁，韓國嘅餐廳必須揀喺高峰時段先開鋪，即係由下午到深夜。
唔知大家有冇發覺到呢？如果覺得仲有其他原因？歡迎大家可以留言話俾小編聽。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
