Hello，大家好，我哋係由韓國人每日提供最新韓國旅行資訊嘅Creatrip。
有追韓流都知，「退貨遠征隊」喺出道teaser中完美呈現「強勢姐姐」風格，單曲〈DON'T TOUCH ME〉更係超有人氣，傳遍大街小巷。如果有留意teaser，係唔係都覺得好有港味呢？佢哋其實係喺江南站Art Monster（藝術怪物）度取景，想知有咩特別咁就要繼續睇落去啦！
Art Monster藝術怪物
아트몬스터 강남역점
- 地址：서울 강남구 테헤란로1길 28-3
- 營業時間：平日17:00 - 01:00、星期六15:00 - 01:00、星期日15:00 - 23:00
除咗大家成日會去嘅弘大、梨大、明洞之外，大家又會唔會去江南呢？江南係首爾人嘅Hot Place，無論係平日定係週末都好多人去蒲（疫情之前），今日小編就想帶大家去近期韓國打卡熱點之一嘅Art Monster，門口有寫住「藝術怪物」所以好好認。
大家睇到呢啲霓虹燈，係唔係都覺得有少少香港feel呢？
Art Monster雖然喺首爾各地都有分店，江南店係港式風格、益善洞分店打造韓屋風格、聖水洞分店係廢棄工廠風格，每一個地區都展現咗唔同嘅特色。
牆上仲貼咗退貨遠征隊嘅相，呢條路就係四位強勢Onni嘅伸展台！好多人嚟到都會跟住打卡。
因為呢度主要係賣酒類，入場之前都會確認出生日期（未成年禁止入場），所以大家去之前記得要帶護照或其他身份證明文件。入到去之後職員會畀一個手環你（有啲似係汗蒸幕嗰種），每一次落單或拎啤酒只要用佢嘟一嘟，最後再畀錢就可以，係唔係好新奇呢？
Art Monster招牌菜單主要係Pizza、炸雞、薯條、辣炒年糕等等，因為機器上有附相、英文同價錢，所以大家都可以睇得好方便。（提提大家記住落單時要用手環感應）
啤酒同樣都係用手環去感應，啤酒等級唔同、價錢都會唔一樣。最特別嘅係呢度啤酒唔係以支、杯去計，而係倒幾多就畀幾多，平均價格大概10ml約₩200（港幣1.4）。
小編覺得呢種方式都幾唔錯，每款都可以試少少，最後揀出自己最鍾意嘅一款。
Among Pizza（피자 아몽）₩15,900
小編叫咗Among Pizza，上面灑咗4種乳酪，配上新鮮蔬菜、紅酒醬真係一道非常適合同啤酒一齊食嘅下酒菜。
半半炸雞（반반치킨）₩18,900
半半炸雞（原味+辣醬油/麻辣/BBQ三揀一），小編叫咗辣醬油味，佢嘅辣真係超乎大家想像……如果唔太食得嘅朋友，真心建議大家可以食原味。
畀錢嘅時候係以感應手環確認當日消費金額，如果飲品要AA制都好方便。
大家之後嚟韓國去開江南，不妨都都去「Art Monster」打個卡啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
