韓國人壓力太大嘅時候有咩症狀
聽講韓國係一個非常高壓嘅國家？韓國人壓力太大嘅時候會出現咩症狀？
Hello，大家好，我哋係由韓國人每日提供最新韓國旅行資訊嘅Creatrip。
大家都知道韓國人工作好大壓力，佢哋唔單止要為想入到好嘅公司而不斷進修，入到一間好嘅公司又要為咗可以升職加人工而奮鬥，所以其實唔少韓國人都好大壓力！近日有一個專講韓國文化嘅IG帳號：all.about.seoul.trip 就用漫畫嘅形式，分析咗韓國人一好大壓力嘅時候會有啲乜嘢症狀！等小編一齊同大家分享一下有邊六大症狀啦！
韓國人大壓力嘅時候有咩症狀？
1.不斷甩頭髮
唔知大家有冇試過大壓力嘅時候突然間會甩咗好多頭髮呢？會甩頭髮係因為壓力產生咗荷爾蒙，令頭皮都容易出油，所以脫髮嘅情況就會更加惡化。如果唔想成日甩頭髮嘅話，就一定要好好保養頭皮之餘，仲要係適當嘅時候放鬆自己，令到荷爾蒙唔好失調。
2. 經常便祕
如果做嘢經常太大壓力嘅時候唔單止會做到大腸收縮，仲會令到腸道阻塞添！當你好大壓力嘅時候糞便就會喺腸道之中停滯，水份都漸漸被吸收，因為糞便變得僵硬嘅關係所以就好難排出，造成便秘嘅問題。
3. 好鍾意食甜嘢
唔少韓國人都話一大壓力嘅時候食返啲甜野就可以暫時減壓，因為壓力大嘅時候血糖都會低咗，大腦嘅能量都會唔夠。如果呢個時候可以食返多少少糖分嘅話，就可以令壓力迅速舒緩！不過大家都要記得唔好食太多，如果唔係就會造成肥胖嘅問題！
4. 成日都唔記得嘢
大壓力嘅時候好多時都會因為心情唔好而冇曬心機，韓國人就話當佢哋冇心機處理所有事嘅時候，就會有好多瑣碎事都唔記得，例如唔記得啲嘢放咗去邊，又或者唔記得自己約咗人唔覺意放咗人飛機等！
5. 成日發惡夢
壓力其實係嚟自你想像中嘅生活同現實有落差，好多時可能係因為現實當中發生咗啲唔如意，又或者係唔合你心水嘅事先會咁。好多時都會想諗下點樣可以解決個問題，所以久而久之就變咗日有所思夜有所夢，發夢都夢到你擔心嘅事。
6. 成日都肚痛
韓國人成日都話一大壓力嘅時候就會肚痛，其實原因係因為當你大壓力嘅時候大腸運作嘅自律神經就會因為太過緊張而引起腸道痙攣。如果想避免呢個情況嘅話就要有均衡嘅飲食，平時飲少啲碳酸飲品同埋酒都有幫助㗎！
以上呢六樣嘢就係韓國人喺返工太大壓力嘅時候會遇到嘅情況，唔知大家又有冇試過呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
