點先可以上到韓國節目？
出演韓國電視節目嘅方法！係咪一定要識韓文？一定要係靚仔靚女？
Hello，大家好，我哋係由韓國人每日提供最新韓國旅行資訊嘅Creatrip。
韓流席捲全球，成為一個韓國偶像可能已經係時下唔少年輕人嘅夢想，而實際上亦都有好多例子證明外國人都可以成為韓國偶像。不過要參加韓國節目係咪一定要係靚仔靚女？係咪一定要識講流利嘅韓文？今日小編就幫大家整合咗唔同方法，俾大家可以更加接近自己嘅夢想。想知點樣先可以上韓國嘅電視節目？咁就要睇落去啦～
想出演韓國電視節目有咩方法？
kstationtv
其實而家有好多韓國電視節目都歡迎外國人做嘉賓，例如CLC成員Sorn出演過嘅《大韓外國人》（대한외국인）。仲有《歡迎，首次來韓國？ 》（한국은 처음이지？）、《非首腦會談》（비정상회담）等等好多節目。當然本身就係明星或者有影響嘅人，例如YouTuber可以出演呢啲節目嘅機會就更高，不過唔代表好似我哋咁樣嘅普通百姓就係完全冇機會。
下面就會同大家介紹吓喺邊度可以搵到出演韓國節目嘅渠道～
1. 網站Craiglist
Craiglist
Craiglist係喺韓國嘅外國人主要嘅求職網站之一，入面有唔同工作種類可以選擇。仲會有招聘模特兒、配角、出演廣告同mv，有時候都會招攬外國人出演韓國節目。任何想參加韓國電視節目嘅人都可以上呢個網站搵吓有冇機會。入面每一項招聘都有詳細嘅資料，如果你覺得自己符合資格嘅，不妨試吓申請。最重要嘅係，呢度大部份嘅招聘廣告都係英文，啱晒唔識韓文嘅外國人。
2. 延世韓國語學堂職位公告板 （Yonsei Korean Language institute Job Board）
yskil
呢個延世韓國語學堂職位公告板原本係延世大學語學堂嘅論壇，不過外界嘅人都可以用佢搵工。呢個論壇上面發佈咗唔同職位嘅招聘，大部份都係想請外國人，不過入面嘅內容多數係韓文，如果想申請就一定要識一啲基本嘅韓文。好多韓國節目都想邀請外國學生參演，如果你咁啱喺韓國讀緊大學，又有空餘嘅時間，不妨試吓上韓國嘅節目！成功申請之後會有專人同你聯絡～
3. 直接瀏覽節目網站
mbcplus
前面小編都有講過好多韓國節目都要求以外國人為嘉賓，有時候就會直接發佈喺節目嘅網頁上面。雖然可能唔會成日都有招聘，主要係取決於節目嘅需求。例如《歡迎，首次來韓國？》 （한국은 처음이지？）就邀請緊喺韓國嘅外國人參加拍攝。任何有興趣嘅人都可以註冊，只需要直接Click節目網頁，跟住就等拍攝團隊聯絡（唔係每一個人都會成功上到節目㗎）。
4. 外國人群組
另一個外國人可以參演電視節目嘅方法，就係通過熟人介紹。通常一啲節目嘅製作組都會有個人嘅途徑搵外國人參演，就係喺KakaoTalk群組入面發佈招攬嘅訊息。仲有就係同曾經參加過韓國節目嘅人保持聯絡，佢哋通常都會有聯絡方式可以介紹熟人參演。
要具備咩資格先會獲選？
Q: 係咪要好靚仔、靚女？
A：主要係取決於拍攝嘅種類，如果係拍MV或者其他輔助嘅角色，通常會明確咁列出你需要有嘅特質同個性，但不過如果係出演talk show之類嘅綜藝節目，咁就需要符合嗰個主題嘅人。不過最重要具備嘅特質，普遍都係自信。呢類節目招聘通常會有圖片同文字介紹，如果你符合入面要求嘅特質，絕對係有機會被選上㗎 ！
Q: 係咪一定要識講韓文？
A： 如果只係普通嘅拍攝，例如MV、影相或者廣告，通常只係對外貌同個人特質有要求，就算唔識韓文都冇所謂。
不過如果係要參加綜藝節目，仲要同韓國職員聯絡，咁就需要了解一啲基本嘅韓文。不過當然，識韓文嘅話一定係更加有優勢嘅。
Q: 有無年齡限制？
A：年紀都係取決於唔同拍攝嘅需求，但大多數情況之下，拍攝組都唔希望年紀太大或者太細，因為一定要有好多空閒嘅時間可以參與拍攝，仲係中學生嘅就可能難啲。
有啲拍攝工作會指明需要嘅視覺年齡，大家都可以斟酌下自己符唔符合，再去報名。
Q: 有無出演費？
A：大多數呢啲招聘外國人出演嘅都係兼職形式，通常都會有津貼。
至於費用就好取決於拍攝嘅類型同時間，酬勞由50,000韓元（大約350港幣）到300,000韓元（2,100港幣）甚至更多都有可能㗎。
Q: 係咪所有外國人都可以出演？
A：就算只係上一次節目，都係工作嘅一種，所以一定要持有合法嘅簽證先可以出演。
通常持有學生簽證或者E-7工作簽證嘅人係唔可以喺電視節目上面獲得酬勞，即係可以參與拍攝但唔可以收錢。
有時候喺招聘入面都會寫明要求持有嘅簽證種類。
睇完上面所講嘅方法之後，大家有冇覺得距離出演韓國節目近咗一步？反正一試無妨，試吓申請都冇壞嘅。不過留意一定要仔細睇吓工作內容，確保係安全合法嘅拍攝工作啊。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
