韓國BL(同性戀)影視推薦
韓國都有超甜嘅BL網劇！11套大獲好評嘅韓國同志戲劇推薦，同性之間嘅愛情都可以好唯美！
Hello，大家好，我哋係由韓國人每日提供最新韓國旅行資訊嘅Creatrip。
雖然而家韓國社會已經比起以前開放咗好多，但喺多元性別同性別認同嘅議題上仍然係相當之保守。不過韓國嘅影視題材多樣化，除咗圍繞男女嘅主流愛情線，仲有好多描寫同性戀嘅劇集電影作品。小編就盤點咗幾套評價同討論度都好高嘅韓國男同性戀作品，大家有時間不妨睇下韓國同志題材係點表現。
韓國BL戲劇/電影
1. 男朋友・男朋友（電影 / 2014）
- 主演：郭時陽、李在濬
《愛，不怕》將同性戀題材背景設置喺校園，仲擴大咗討論嘅議題去到校園欺凌。同時，友情同愛情之間嘅掙扎絕對係必睇嘅重點。電影入面有好多敘事性嘅慢鏡，講述兩個高中生喺各自唔同嘅生活同難關當中相遇，同時亦都喺性傾向同埋認同之間遊走，增加咗故事嘅張力。呢套電影出色嘅鏡頭語言仲獲得咗當年亞洲電影獎嘅評審團大獎。
2. 黑之夏（電影 / 2019）
- 主演：禹志賢、李建宇
透過錯置嘅時間軸，描述劇組人員之間醞釀出男男情愫嘅故事，同埋足以殺死一個人嘅歧視目光。對於一般公眾來講，呢一套同志電影《黑之夏》可能會俾人一種舊式電影嘅感覺，包括色調、鏡頭語言同畫面編排，都有啲粗糙到唔似2019年嘅電影，同時亦都有種穿越時光，好似見到幾十年以嚟，韓國社會對同性戀族群殘忍嘅對待。
3. 在你視線停留的地方（網劇 / 2020）
- 主演：韓基燦、張義秀
《在你視線停留的地方》可以話係舊年討論度最高嘅BL題材網劇，擁有韓國第一套網絡劇嘅稱號，受到極高嘅關注。劇情主要係圍繞甜蜜嘅高中生愛情，唔會有太多激情嘅場面，反而令人回憶起過去純情嘅愛情。對於CP文化興盛嘅韓國演藝圈，第一次出現呢一種以男性向劇情為主嘅韓劇，可以話相當之稀奇。
4. 馨榮堂日記（獨幕劇 / 2014）
- 主演：林周焕、李源根、孫恩書
2014年喺韓國MBC播出嘅短幕劇，都算係無線台嘅創舉？傳統嘅朝鮮時代，冇血緣關係嘅兩兄弟心底裏面彼此相愛，但係因為時代背景而唔夠膽承認。哥哥最後結咗婚，但唔小心俾老婆發現自己對細佬嘅感情，就去勾引細佬，從而達到兄弟兩傷嘅局面。愧疚嘅細佬原本想自殺，但深情嘅哥哥一早就已經換走咗毒藥……
5. 愛在基吧的日子（電影 / 2006）
- 主演：金南佶、李英勳、金東昱
《愛，不怕》比起《愛，不悔》，劇情比較輕鬆。劇情講述一個人去首爾打工賺學費嘅孤兒，偶然遇到大企業接班人，兩個人互相糾纏咗一段時間終於相愛嘅時候，對方竟然收到父母指派結婚嘅命令，從此消失咗……所以就同朋友密謀綁架情人，甚至要報復活埋佢？劇情到最後，其實都係happy ending，大家有興趣都可以上網搵嚟睇。
6. 王的男人（電影 / 2005）
- 主演：甘宇成、鄭進永、姜成妍、李準基
要數韓國史上最經典嘅同志電影，《王的男人》一定榜上有名。其實劇情並唔係咁多同性情愛嘅戲份，準確啲嚟講，係時代嘅血淚入面夾雜咗身而為人嘅情感意識，同同性戀並唔係有太大嘅關係。殘暴嘅君主愛上戲子，同門師兄為咗拯救共身嘅佢而不惜付出性命。電影結局嘅壯烈程度令人心有餘韻，亦都成為代表韓國角逐當年奧斯卡嘅作品。
7. 霜花店（電影 / 2008）
- 主演：趙寅成、朱鎮模、宋智孝
除咗《王的男人》，《霜花店》都係一套凄美嘅韓國同性戀古裝電影。君主偏好男色，要求親近嘅侍衛隊長同王妃交歡從而獲得皇子，冇諗過隊長同王妃之間嘅情慾，會顛覆成個江山。故事最後就好似史歌一樣咁壯麗，王同侍衛嘅慘烈結局，令《霜花店》成為韓劇史上經典作品之一。
8. Color Rush（網劇 / 2021）
- 主演：許玹準、洪泰藝
延續《在你視線停留的地方》嘅好成績，2021年最新韓國BL網劇《Color Rush》亦都獲得咗相當之高嘅關注度。患有色盲嘅主角，眼入面嘅世界全部都係灰色，直到有一日遇到可以令自己眼入面出現其他色彩嘅佢，發展出令腐女心動嘅浪漫故事。如果本身有關注緊韓國BL戲劇，記得一定要追呢一套啦！
9. 兩場婚禮一場葬禮（電影 / 2012）
- 主演：金東玧、宋勇貞、柳賢慶、鄭愛妍
《兩場婚禮一場葬禮》講嘅層面，已經唔止一般嘅男同性戀，而係俾咗觀眾思考空間，關於同性婚姻、同性孤老嘅問題，同埋的而且確發生過嘅同志假結婚事件。比起沉重嘅故事背景，韓國同志電影《兩場婚禮一場葬禮》用輕鬆嘅喜劇方式，帶出咗需要思考嘅議題，算係類似題材入面少有嘅佳作。
10. 換季男友（電影 / 2018）
- 主演：裴宗玉、李源根、尹炳護
2018年上映嘅電影《換季男友》講述出咗車禍，成為植物人嘅仔，喺佢相機入面意外發現同佢關係好好嘅朋友，竟然同時都係親密嘅戀人……知道真相崩潰嘅媽媽，要個仔嘅「密友」愧疚咁離開，再獨自承擔起照顧植物人嘅仔嘅重擔。
韓文名《換節期》意思指時間流逝而產生嘅季節同時序更替，呢三個人嘅關係，會唔會隨住時光而修復？
11. 好久不見（Long Time No See）（電影 / 2017）
- 主演：卓宇錫、連承豪
《好久不見》講述隸屬唔同幫派嘅兩個殺手，喺唔知彼此嘅身份之下不停咁錯過，最後相遇、相認、相愛。唯美嘅光影同劇情，令人幾乎唔記得呢兩個角色嘅悲慘身世。最後喺幫派嘅交戰入面，兩個人相遇，究竟應該以大局為重，定係把握兩個人嘅感情遠走高飛？
以上係11套喺韓國獲得唔少好評同討論度嘅BL題材戲劇，唔知大家有無睇過？希望隨住同志題材嘅戲劇作品面世，韓國社會對於同志人權嘅態度可以更加開放。下次再同大家分享更加多韓國嘅社會現象～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
