logo

韓國演唱會門票購買方法

韓國高手搶演唱會、公演門票小貼士大公開!到底點先可以快啲買到同搶到好位呢?

Yujin Kim
7 months ago

Hello,大家好 ,我哋係由韓國人每日提供最新韓國旅行資訊嘅Creatrip

大家仲記唔記得上次BTS喺首爾舉行嘅演唱會創下咗最高點擊同最高速銷售紀錄? 呢個現象正正可以睇得出喺韓國買KPOP演唱會飛並唔係一件容易嘅事,除咗要有熱情之外,速度都超重要。

今日小編會大家介紹韓國買飛高手嘅小貼士,話俾大家知必要嘅信息!咁大家都可以成爲KPOP演唱會搶飛達人。


韓國主要演唱會門票售票網

1. Interpark Ticket(인터파크 티켓)

韓國Interpark Ticket

韓國演唱會 Interpark Ticket


K-POP Fans們應該對「Interpark」呢個網站唔陌生!「Interpark」係韓國最大售票網站之一,有分韓文版同國際版(中文、英文、日文),不過要登入韓文網站嘅話就需要先用韓國電話號碼驗證,所以身處海外嘅朋友們就要用國際版網站買啦!




2. YES24(예스24)

韓國YES24


「YES24」都係韓國最大售票網之一,同「Interpark」一樣,韓文版網站需要先做電話號碼驗證先可以消費!呢度除咗演唱會、音樂劇、話劇、展覽門票之外,仲可以買到明星週邊同專輯等等。




3. Melon Ticket(멜론 티켓)

韓國Melon

韓國聽音樂 Melon


「Melon」係最多韓國人用嘅聽音樂平台,每年仲會舉辦韓國主要流行音樂頒獎典禮之一嘅「MMA」!除咗可以聼音樂,大家仲可以去「Melon Tickets」買飛,甚至係加入Fanclub!




4. Auction Ticket(옥션 티켓)

Auction Ticket 韓國演唱會


「Auction」係韓國一個大型網上購物平台,而佢哋都有賣各種演唱會、話劇、音樂會、展覽等等嘅門票!不過可惜嘅係呢個網得韓文版,所以唔識韓文嘅朋友們可能就要揀另一個網買啦!



韓國演唱會買飛秘訣

韓國演唱會買飛秘訣


喺韓國有想睇嘅演唱會或表演,但係成日都爭唔贏其他人?大家只要跟住以下呢幾個小貼士做,成功機率會高好多!




1. 提前註冊會員同Log in

韓國演唱會買飛小Tips


為咗可以比人更快買到飛,記住一定要提前登入,咁就唔洗等到俾錢嗰刻先入資料!如果未做會員,咁就要快啲註冊返個啦!




2. 將電腦時間Set做韓國時間

韓國演唱會買飛小Tips

雖然小編之前冇試過因為時差問題而搶唔到飛,不過網上有好多人都分享過話因為自己所在地區同韓國因為有時差,所以就失敗咗。通常演唱會飛開賣當日,頁面上面會有倒數計時嘅鐘仔,大家可以確認多次呢個時間同自己電腦個時間一唔一樣。




3. 用navyism網站校正時間 + 倒數

韓國演唱會買飛小Tips


因為每個網站嘅時間可能會有少少誤差,所以建議大家搶飛之前可以先入「navyism」呢個網站,輸入你買飛嘅時候要用嘅網站,畫面就會顯示嗰個網站嘅準確時間!大家買飛之前可以亦都可以開住呢個網倒數,咁就萬無一失啦!




4. 事前練習

韓國演唱會買飛小Tips


因為每個網站嘅system唔同,所以建議大家喺正式開始買飛之前要先熟習買飛流程,至少要試到俾錢前最後一個步驟,因為好有可能你部電腦ban咗顯示「彈跳視窗」,咁嘅話俾錢嗰頁就會彈唔到出嚟,最後可能會前功盡廢。




5. 開賣後唔好撳F5重新整理頁面

韓國演唱會買飛小Tips


以小編搶飛嘅習慣,小編會大約喺59秒嘅時候先撳一次重新整理,然後即刻撳買飛,之後排隊嗰頁就會彈出嚟。呢個時候大家千祈千祈唔可以重新整理頁面,要耐心等候,如果唔係就要重新排過㗎啦!




6. 開幾個頁面

韓國演唱會買飛小Tips


根據小編個人經驗,最多開2-3個頁面就差唔多啦(怕開太多會Lag機XD)同時亦都建議大家先Download定售票網站嘅app,亦都要登入埋先,因為有時候太多人用網站買,用app有可能仲會順啲!



韓國演唱會搶飛Q&A

1. 一個帳號可唔可以同時登入幾部機?

韓國演唱會買飛小Tips


INTERPARK、YES24同MELON呢三個網站目前都冇限話一個帳號只可以用一個裝置登入,所以用多幾部機請朋友幫手搶都未嘗唔係一個好方法!




2. 韓國版網站會快過國際版?

韓國演唱會買飛小Tips


好似頭先所講,因為要登入韓國版網站,首先需要用韓國電話號碼驗證,所以如果大家冇韓國電話號碼,就逼不得已需要喺國際版網頁註冊啦!不過其實兩邊搶飛都冇咩大分別,最主要都係要睇大家嘅網速XD 所以如果屋企個WIFI或者部電腦比較慢,建議大家落網吧搶! 




3. 用電腦定係APP搶會比較順?

韓國演唱會買飛小Tips


呢個其實真係話唔埋,因為小編之前試過去網吧搶但失敗咗,最後居然係用手機求其撳一撳嘅朋友幫小編搶到XD 所以建議大家可以電腦同手機並用,搶到嘅機會會大啲!



4. 洗唔洗買Fan Club會員?

韓國演唱會買飛小Tips


最近韓國好多歌手明星都有自己嘅官方Fan Club,無論係開演唱會、粉絲見面會都係會員優先買飛!所以如果大家真係好想好想去嘅話,建議先加入Fan Club,咁就可以優先買到比較好嘅座位!


另外有個好消息!而家透過我哋都可以輕鬆買到大型演唱會飛,有興趣嘅朋友撳我睇啦!

以上介紹咗買韓國演唱會門票嘅方法,唔知大家又覺得有冇幫助呢?希望大家之後都可以成功買到飛啦!




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面 

 韓國代購

熱門文章

LoadingIcon
熱門文章