10位韓國娛樂圈最有錢嘅明星
韓國娛樂圈富豪名單大公開！G-dragon都只係排第3？
Hello，大家好，我哋係由韓國人每日提供最新韓國旅行資訊嘅Creatrip。
有無諗過韓國娛樂圈嘅首富係邊個？今日小編就想同大家分享10個韓娛圈最有錢嘅藝人，等我哋一齊睇落去啦！
10位韓娛圈最有錢嘅明星
Top 10 - Dara
估計資產淨值：2500萬美金（大約1億9千萬港幣）
2NE1解散之後，Sandara Park嘅個人事業獲得咗好大嘅成功。除咗參加唔同嘅娛樂節目或者做知名品牌嘅代言人，佢仲投資咗大量嘅股票、房地產同埋餐廳，甚至仲推出咗自己嘅香水系列，叫做“With Love from Dara”。
Top 9 - BIGBANG T.O.P.
估計資產淨值：2500萬美金（大約1億9千萬港幣）
BIGBANG雖然已經好耐未試過出現喺公眾場合，不過依然有一定嘅廣告或者地產收入，T.O.P.就擁有韓國最貴嘅樓同埋位於阿根廷嘅葡萄園。
Top 8 - BIGBANG 太陽
估計資產淨值：2500萬美金（大約1億9千萬港幣）
又一位Big Bang嘅成員上榜！太陽寫嘅歌曲多達30幾首，仲有一間價值810億嘅樓，另一間建築物價值1620億 ，同埋持有唔少YG嘅股份。多才多藝又有錢嘅代表人物，太陽喺2018年已經封盤同演員閔孝琳過緊幸福嘅婚姻生活。
Top 7 - 李孝利
估計資產淨值：2500萬美金（大約1億9千萬港幣）
國民妖精李孝利，大家都知道佢非常之有個性，2013年，李孝利就同李尚順結咗婚，仲喺濟州過緊佢嘅婚姻生活。雖然唔係太多人知，但係李孝利嘅音樂人老公李尚順好似都擁有相當之巨大嘅財富。
Top 6 - IU
估計資產淨值：2500萬美金（大約1億9千萬港幣）
國民妹妹IU喺呢一個韓娛圈富人榜當中高居第6位！作為韓國知名嘅個人女歌手同埋作曲家，由出道開始已經受到好多人嘅關注同喜愛。IU就參與過50幾首歌嘅製作，仲擔任過50幾個牌子嘅廣告代言人，年紀輕輕身家絕對唔少。
Top 5 - Super Junior 始源
估計資產淨值：4500萬美金（大約3億5千萬港幣）
爸爸係韓國知名企業嘅會長，始源嘅家庭背景已經係一個公開嘅秘密。作為娛樂圈含着金鎖匙出世嘅代表，始源喺歌手同演員發展上嘅成功絕對冇靠自己屋企嘅背景。Super Junior嘅成員仲成日講笑話如果始源想，可以買起SM。
Top 4 - Rain
估計資產淨值：5500萬美金（大約港幣4億3千萬）
作為唔少韓國女性嘅理想型，唔單止因為Rain嘅外表，仲係因為佢開朗嘅性格。同韓國純天然靚女代表金泰熙結婚之後，一齊住喺清潭洞價值4200萬美金嘅豪宅。
Top 3 - BIGBANG G-Dragon
估計資產淨值：5500萬美金（大約港幣4億3千萬）
G-Dragon有錢我諗大家都知，截至目前為止，佢已經擁有多達180首歌嘅版權，足夠為佢帶嚟可觀嘅收入。GD仲同Nike，現代等等嘅大公司簽咗廣告合約，代言費金額多到難以想像。除咗係藝人，佢仲喺餐廳、酒店同埋地產等等嘅範疇進行咗唔少嘅投資。GD有幾有錢？佢係Black Honda Card Black Card嘅極少數持有者之一（得0.05％嘅韓國人口擁有呢張卡）。
Top 2 - PSY
估計淨資產：6000萬美金（大約港幣4億6千萬）
大家對於PSY嘅印象多數都係嚟自「江南Style」，但其實佢嘅家庭背景絕對大有來頭。爸爸係公司負責人，媽媽就係江南唔少餐廳嘅擁有者。佢自己都喺歌曲，演唱會同埋投資當中賺咗唔少錢。
Top 1 - JYJ 金在中
估計資產淨值：8000萬美金（大約港幣6億2千萬）
曾經係東方神起嘅主唱同埋門面擔當，金在中就以佢喺首爾嘅大量地產擁有權，價值不菲嘅名車收藏，日本嘅連鎖Cafe同埋清潭洞嘅服裝品牌，當之無愧咁佔據咗呢個榜單嘅第一名。
以上就係韓娛圈富豪榜排名前10嘅藝人！唔知大家覺唔覺得意外？可以喺下面留言同小編討論㗎～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
