5分鐘魚糕湯食譜

Hello，大家好，我哋係由韓國人每日提供最新韓國旅行資訊嘅Creatrip。 

相信大家去韓國旅行嘅時候，一定會見到路邊攤有辣炒年糕同埋一串串嘅魚糕，特別係冬天嘅時候，食一啖魚糕再飲一啖魚糕湯，真係好正！今日小編就想教大家一個超級容易，用5分鐘就可以煮好嘅魚糕湯。

5分鐘魚糕湯食譜

韓國人喺冬天嘅時候，都一定會飲魚糕湯㗎！呢一個5分鐘就可以煮好嘅魚糕湯，唔單止簡單，材料一啲都唔難搵，一齊嚟睇吓點樣整啦！

需要用到嘅材料

呢個魚糕湯嘅材料好簡單！韓國魚糕、大蔥、洋蔥、豉油、公仔麵嘅乾蔬菜包、辣椒（隨個人喜好），只係需要呢6樣材料就可以煮到！

因為要喺短時間入面煮好，所以魚糕一定要切薄啲，同埋切細啲，咁樣煮出嚟嘅魚糕先至會更加入味，另外，洋蔥、大蔥同辣椒都要切細一啲。

準備好所有材料之後，就可以將佢哋一次過放入一個入得微波爐嘅器皿，要喺5分鐘之內煮好，微波爐真係一個最好嘅選擇！一般煮一人份嘅話，水就落兩個紙杯左右嘅份量。如果落得太多水，啲魚糕就會變得好淋，唔好食㗎啦！

豉油嘅份量都可以根據自己個人口味隨意咁樣調整，如果以一人份做標準嘅話，用一茶匙嘅豉油就可以㗎啦！全部都準備好之後放入微波爐度叮就得！

做法係唔係好簡單呢！相信無論係煮嘢食一啲都唔叻嘅「地獄廚神」，都一定唔會失敗！喺凍冰冰嘅冬天，一定要飲一碗熱辣辣嘅魚糕湯。

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購