韓國人想同外國人拍拖原因
點解（部份）韓國人傾向同外國人拍拖？同韓國人結婚會令人卻步？
Hello，大家好，我哋係由韓國人每日提供最新韓國旅行資訊嘅Creatrip。
近排香港同韓國嘅天氣都越嚟越清涼，而且臨到聖誕，對於單身人士嚟講真係身心都好需要溫暖！唔知大家有無諗過同韓國人拍拖？其實唔少韓國人都唔抗拒甚至好嚮往同外國人發展，喺韓國就有好多韓國人配外國人嘅夫婦，包括名人同一般人都有唔少例子。今日就會同大家剖析下，點解韓國人會鍾意同外國人拍拖！
韓國人想同外國人拍拖原因
Koreaboo
韓國人好鍾意透過朋友或者親人嘅介紹去認識另一半，包括參加聯誼同相睇，呢啲出pool目的性咁高嘅活動喺韓國非常之常見。部份思想保守啲嘅韓國人就認為，相同種族嘅配搭先係最好，不過而家韓國社會開放咗好多，已經好多人接受到同外國人拍拖！
有啲韓國人甚至表示唔想同韓國人拍拖，雖然未必係社會主流嘅風氣，不過都顯示韓國社會嘅轉變。大家好唔好奇點解韓國人想同外國人拍拖？等我哋一齊睇吓點解呢啲韓國人會選擇搵外國人一齊啦！
1. 個人空間
ELLE
有時候，大家見到啲好甜蜜嘅韓國情侶其實係建基於極高嘅控制慾，就例如要求對方秒回訊息，當然唔係所有韓國情侶都係咁樣啦。韓國人真係好重視覆機嘅速度，而佢哋主要就係用KaKao Talk溝通，經過長年累月嘅訓練韓國人嘅打字速度真係超快。
有啲情侶覺得，覆訊息嘅頻率就代表你愛對方嘅程度（唔係所有韓國人都咁諗），有啲情侶仲要隨時同對方講自己去到邊同埋做緊啲咩，私人時間變得好珍貴。
Yuneoh
另一樣好明顯嘅韓國情侶文化就係出街拍拖，尤其係放假嘅時候。呢啲日子喺街頭街尾都可以見到唔少情侶，出街拍拖當然係維繫感情嘅方法，但有啲人就覺得隨時隨地咁黐住對方會令自己同對方嘅個人時間變得越嚟越少。
不過如果係外國人，尤其係嚟自非亞洲地區，佢哋相對上會比起韓國人冇咁介意呢啲小事，對於追求個人空間嘅韓國人來講，同外國人拍拖就好適合佢哋。
2. 信任
Dramabean
大家自己或者身邊嘅朋友有冇試過同韓國人拍拖？唔知你哋有冇聽講過「千祈唔好相信韓國嘅男人/女人」？可能因為韓國人由相識到拍拖嘅時間非常之短，令人覺得好輕率。一齊得太快嘅唔好處就係對彼此嘅了解唔夠深入，喺之後發現對方同自己嘅想像唔同嘅時候，就好想控制對方嘅行為。小編同一啲韓國女性朋友傾偈嘅時候，佢哋都講過韓國男人喺同一時間可以追緊好多人，當然唔係每一個韓國男人都係咁樣啦。
Dramabean
所以好多韓國人都想同外國人拍拖，因為外國人講嘢比較「直」（當然亦都唔係每個外國人都係咁樣啦）。同外國人拍拖大家之間嘅相處可以好似朋友咁舒服，而外國人都好少會睇對方嘅手機，又唔使隨時報道，會畀比較多嘅信任對方。
3. 韓國社會嘅性別定型
Yonhap News
大家都應該聽講過，韓國社會傳統嘅思想上男人係比起女人優越，所以當一個女人結咗婚之後，佢嘅工作就得番做家庭主婦同服從佢丈夫嘅指令，仲要聽丈夫父母嘅說話。
有啲韓國女人喺結咗婚之後會被要求放棄工作，有啲甚至唔可以返返去自己屋企探父母，如果佢哋真係好想返去，就要得到丈夫同父母嘅批准。可以睇得出喺韓國性別不平等嘅問題有幾嚴重，直到今日都仲係未完全解決，不過當然唔係每一個家庭都係咁樣啦。
Yonhap News
唔少韓國人已經厭倦呢啲不平等嘅狀況，所以好希望可以同外國人拍拖感受唔同嘅文化同時擁有更大嘅自由。
4. 其它壓力
The Korea Herald
喺韓國，如果一對情侶決定咗要結婚，就會面對唔同嘅壓力，講緊嘅壓力唔係父母反對婚姻，而係現實上嘅壓力：生小朋友，儲錢，照顧屋企人等等，甚至好多情侶結咗婚之後都仲要同自己嘅父母一齊住，令另一半覺得好唔舒服。
結咗婚之後仲要承受親戚好高期待嘅壓力，例如要求你事業上要成功或者搵到好多錢，令到好多韓國人都好大壓力，小編有朋友同韓國人結咗婚之後都話覺得好大壓力，因為老公嘅媽媽同埋嗰邊嘅親戚好少畀好說話佢聽。
Blog
可能就係因為呢啲各方面嘅壓力，令好多韓國人都想同外國人一齊，咁就可以避免好多家庭問題。
Soompi
不過同外國人拍拖都唔可以徹底解決問題，因為大家都唔知道結咗婚之後會唔會同自己嘅想像一樣，有啲韓國人就覺得同外國人結婚可以幫到佢哋移民，但其實又係咪想像中咁簡單？大家又點睇同外國人拍拖？
呢篇文章唔係想叫大家唔好同韓國人拍拖，只係想話俾大家聽唔好因為種族或者文化而決定同唔同對方一齊，應該要根據自己嘅感覺同埋同對方嘅相處，最緊要係做自己，始終對方可能係同你對一世嘅人。唔好因為固有嘅印象而錯過咗一個可能係啱嘅人！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
