韓國Oppa嘅表白方式
點樣表白先最特別？點先唔會俾人拒絕？嚟睇吓韓仔嘅表白方式啦！
Hello，大家好，我哋係由韓國人每日提供最新韓國旅行資訊嘅Creatrip。
每次睇韓劇都覺得好浪漫，唔知大家有冇幻想過同韓仔拍拖係點嘅呢？今日小編就想同大家分享下韓仔嘅表白技巧！到底點樣表白可以提高成功率？大家一齊繼續睇落去啦！
韓國OPPA嘅表白技巧
1. 捉緊時機
9 Brick Hotel表白都要睇時機？呢個係常識啦！咁到底幾時先係時機啊？根據韓國Oppa相傳嘅版本，要表白成功，「第三次單獨出街」就係最好嘅時機。大家有無聽過韓國嘅聯誼「소개팅」？雖然相睇呢件事喺香港好老土，不過喺韓國唔少年輕人都會參加呢啲相睇嘅場合！通常相睇之後如果大家都對對方滿意，之後就會再約出嚟見面，但如果唔滿意對方，咁喺第一次見面就完結啦。
Koreandramaland咁點解會係第三次見面？因為如果第一次見面就即刻表白好容易會嚇親人，甚至令人唔夠膽再同你見面，而第二次就係用嚟確認彼此都有意思願意繼續見面。第三次係最佳嘅時機，肯定大家互相想繼續發展之後就可以開口，如果拖得耐對方又有可能會改變心意，因為佢可能覺得你冇心一齊。所以大家記得呢個「第三次法則」啦！
2. 面對面表白
Naver而家科技發達，交流方式越嚟越多樣化。喺香港大家鍾意用WhatsApp，不過喺韓國就比較多人用KaKao Talk。無論你鍾意用Facebook、Instagram、LINE定其他社交軟件，Oppa都絕對唔建議大家用網上通訊軟件表白！
Oppa解釋：「唔係話唔可以喺網上表白，不過成功嘅機率可能會大打折扣。因為用通訊軟件表白可能會俾人感覺唔夠誠意、冇禮貌，要考慮吓到底應唔應承好。」
始終唔係面對面表白嘅話好難可以100%傳達到自己嘅感情俾對方，大家儘量都係避免用社交軟件表白啦。
咁大家都明白面對面表白嘅精髓就係在於傳達自己嘅真心同埋重視啦？最重要嘅係，面對面表白可以一方面俾對方感受到你嘅心跳，另一方面自己都感受到對方嘅情緒，仲有等待答案嘅緊張感都會成為彼此之間美好嘅回憶！
3. 注意細節
한국일보當然，表白嘅語氣係最重要嘅，以誠懇嘅態度表達自己嘅感受，就算兩手空空咁表白都仲有真心搭救。不過根據韓國Oppa嘅建議，佢哋就覺得要「有一份特別嘅禮物」嚟代表佢哋嘅誠意，用嚟打動對方。
Oppa話:「98%韓國女性收到鮮花都會有深刻嘅印象，又或者冬天嘅時候送杯溫暖咖啡等。」等對方欣賞你窩心嘅表現，表白嘅時候就會大大加分！
如果想再提高成功率，Oppa建議大家喺見面之前嘅時候，就留意對方講嘅嘢或者其他細節，瞭解對方鍾意或者需要乜嘢，喺表白嗰日預備好送俾對方，咁就更加十拿九穩！
4. 唔好俾太大壓力
Ohfun其實好多人都有意圖要表白，不過有時候就係因為抑制太耐，到開口嘅時候就會俾太大壓力對方。Oppa就提到，一個好嘅表白唔應該係有壓抑嘅氣氛，應該要俾對方喺輕鬆冇壓力嘅情況吓考慮答案。
如果你嘅表白令對方覺得太大壓力或者太嚴肅，即使對方應承咗你，可能都唔係出於自願嘅。因為唔知點拒絕而接受，呢段關係都好難可以維持得耐。最好嘅表白方式就係「做自己」，冷靜咁用真誠嘅態度打動對方，就算唔會提高表白成功率，至少一定唔會扣分！
inspiremekorea 最後，大家記得愛情係冇得勉強，如果佢係鍾意你，就算你咩都唔做佢都會鍾意你，祝大家好運，希望大家可以表白成功！
睇完上面韓國Oppa嘅表白技巧，大家有冇偷到師？如果你係苦惱緊點樣表白，不妨參考下上面嘅方法～
如果有更多想知嘅內容，都可以隨時留言或者dm話俾我哋知：）
Instagram：creatrip.hk
