Hello，大家好，我哋係由韓國人話每日提供最新韓國旅行資訊嘅Creatrip。
韓國人同香港人一樣，都有一個希望中六合彩嘅夢。因為中咗好多時都可以即刻嘆世界，唔使再返工睇人眼色，做任何事都可以好自在。韓國有一個講法係只要夢到呢八個夢境，都一定會去買六合彩，當中大家又有冇夢過呢？
夢到呢啲夢要去買「六合彩」？
1. 夢到踩屎或成身都係屎
聽落去可能會覺得好嘔心，不過韓國人認為夢到「排泄物」好多時都係一個好夢。佢哋認為夢到呢啲都係會帶嚟好運，甚至喺廁所執到銀包都係一個好夢，唔通韓國都有個講法屎係「黃金」？
2. 夢到名人嚟自己屋企
喺韓國好多時都會話如果夢到名人係一個好夢，韓國人認為見到佢哋可能係受到恩惠，特別如果係佢哋嚟自己屋企，即係會有財運，可能嚟緊會有好多錢入屋。
3. 夢到屋企火燭
大家可能都會同小編一樣諗「下！屋企著火竟然會係好事？」喺韓國佢哋會覺得火夢即係代表有事業運同有財富，屋企會繁榮同變得有錢，加上係有運嘅象徵。不過如果係夢到山火，咁可能即係國家會有一場災難發生。
4. 夢到豬
豬夢喺解夢嘅文章入面都有同大家介紹過，如果夢到豬即係會有錢入手，想賺錢或者想搵多啲，好多韓國人都希望可以夢到豬。不過亦都要小心，如果夢到豬係逃走緊，即係有可能會唔見錢。
5. 夢到頭被槍擊中
如果夢到頭被槍擊中，可以解釋係有中獎、晉升、合格等嘅意思，同時亦都可以話係一個好運嘅開始，無論做咩事都好，都一定會順利解決。
6. 夢到自己死
夢到死亡可以解釋係「再生」、「復活」嘅意思。如果夢到自己死意味住已經脫離咗而家現況從此踏上新生活，同時喺財富方面睇，可以解釋會有好多錢入手。
7. 血腥嘅夢
血腥嘅夢可能大家都會驚，不過喺韓國有一個講法係夢到血即係願望會達成。血流得越多，賺到嘅錢就會越多，同時喺事業方面可能會有晉升嘅機會。
8. 夢到三胞胎
有新生命誕身即係代表會得到一啲權利同財富，特別係夢到三胞胎，一直以嚟嘅努力都冇白費，會有好嘅成果出現。如果小朋友一直健康成長，咁成就同財運就會越嚟越好。
只要夢到以上八件事，韓國人就會去買六合彩，當中大家又有冇夢過呢？如果夢到不妨下次試下去買六合彩，睇下中獎機會又會唔會大啲？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
