雪濃湯係點嚟？
「雪濃湯」 有超級兩極嘅評價！超級濃郁嘅湯頭真係白色？揭開雪濃湯嘅真面目！
Hello，大家好，我哋係由韓國人每日提供最新韓國旅行資訊嘅Creatrip。
「雪濃湯」係韓國嘅代表性經典美食之一，雖然味道平淡，但就有淡淡清香嘅味道。韓國嘅雪濃湯可以話係成個韓國之旅嚟講整頓腸胃嘅最佳選擇！不過，好多時大家都會將雪濃湯同埋牛骨湯撈亂，咁其實究竟佢哋有咩分別嘅呢？
雪濃湯係咩？
其實叫就叫雪濃湯，但其實食材同埋烹煮方法講嘅話，應該要叫「牛雜碎湯」。之所以有雪濃湯呢個詞，其實係因為喺朝鮮時代嘅祭祀活動「先農祭（선농제）」之中，係會將牛熬煮成湯，擺埋大迷、肉類、然後由皇帝親自去田地（親耕）嘅儀式。等活動完咗之後，會現場煮飯，然後熬湯俾60歲以上嘅百姓飲。
相傳有一日，世宗大王親耕嘅時候突然落大雨，無辦法返去祭祀壇嘅主位。亦因為餓得太耐，就將親耕嘅時候捉咗嘅牛燉煮肉湯同現場嘅百姓分享，所以叫做「先農湯（선농탕 / Seon-Nong-Tang）」。
久而久之，「先農湯」嘅發音有變而變成「雪濃湯（설렁탕 / Seol-Reong-Tang）」。以前百姓食唔起好食嘅牛嘅部位，牛骨都會攞去比王宮貴族燉湯，百姓都只可以攞到剩低嘅內臟同埋肥肉，所以雪濃湯其實就係牛雜碎湯。
有另外一種講法就係雪濃湯其實係源於蒙古嘅酒樓，意思係用牛肉、馬肉、羊肉熬煮嘅肉湯。呢啲食物喺高麗時代後期傳到去朝鮮半島，成為咗以牛為主嘅牛雜碎湯。
近代嘅韓國雪濃湯
日本帝國殖民時期，日本人為咗支援戰爭前線一啲物資，所以就喺韓國大量飼養牛隻。瘦肉或者好嘅牛肉部位都運曬去日本，而韓國只係得返啲內臟同埋骨頭，將剩低嘅都熬成大鍋湯，客人嚟嘅時候就可以好快咁俾佢哋飲。
當時嘅雪濃湯（牛雜碎湯）相當流行，都開始有雪濃湯嘅外賣。喺韓國20、30年代裡面，雪濃湯成日都出現喺啲報章，就算物價上升咗，最常被提到嘅代表性食物都係雪濃湯。
大家食雪濃湯嘅時候有冇發現裡面有麵呢？呢種食法其實係喺1970年先出現，政府為咗鼓勵大家用多啲麵粉，所以就喺雪濃湯裡面加多咗幼麵，可以幫助消除雪濃湯裡面過重嘅肉味。而家嘅雪濃湯其實都係一碗湯配白飯，然後再倒醃蘿蔔嘅湯汁或者其他小菜一齊食。
牛骨湯係咩？
除咗雪濃湯，大家都應該有聽過「牛骨湯」，其實佢同雪濃湯有啲似，有啲唔太一樣。牛骨湯嘅代表地區其實係羅州，不過有好多人都覺得雪濃湯同牛骨湯係同一樣野。
除咗商業用嘅肉類之外，剩低嘅肉同埋內藏就由羅州當地嘅工人自己燉煮嚟食。不過，因為食材唔係咁乾淨，腥味都好重，所以要經過長時間嘅熬煮同埋去雜質，先變成大家今日見到嘅牛骨湯。
如果真係要講出兩樣有咩大分別嘅話，可以話雪濃湯係用牛骨同埋碎肉、內臟，熬出近透明嘅湯頭；而牛骨湯係用牛肉去熬燉，撈走泡沫同埋油脂之後剩低清澈濃郁嘅湯。唔知大家鍾意雪濃湯多啲定係牛骨湯多啲呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
