韓國大學生拍拖文化
韓國大學生情侶去邊到拍拖？玩足全日兩個人都只係300蚊？
Hello，大家好，我哋係由韓國人話你知每日最新韓國資訊嘅Creatrip。
＃韓國文化 ＃大學生
＃大學生嘅拍拖行程
無論喺香港定韓國，唔少人嘅目標都係要喺大學生涯入面「出pool」。
韓劇入面大學生拍拖嘅劇情真係好甜，令人對愛情充滿幻想，不過其實拍拖都有好多現實嘅考量。
每一次出街都要諗去邊，想安排好似韓劇咁嘅拍拖行程，但係食飯邊個畀錢呢？
當小編讀大學嘅時候，成日都會苦惱點先可以有一個經濟實惠又行程豐富嘅約會日。
大學生嘅收入多數都只係靠返兼職或者係屋企人畀零用錢，好難負擔到大支出嘅拍拖行程。
淨係食同住已經需要唔少洗費，到底韓國大學生點樣用有限嘅預算拍拖？
就等我哋研究下韓國大學生普遍係點樣用又平又抵嘅價錢計劃拍拖嘅行程啦！
✨馬上Follow我哋IG
instagram.com/creatrip.hk
韓國大學生拍拖文化
1. 韓國大學生情侶常見嘅約會路線
喺韓國，拍拖嘅時候，無可避免都係不停重複食飯-去咖啡店-睇戲，食飯-睇戲-去咖啡店，睇戲-食飯-去咖啡店......呢啲程序。
韓國嘅大學生都係同一般人一樣重複住呢啲程序，但係同上班族唔同嘅地方就係——性價比！
為咗唔好浪費咁辛苦兼職賺翻嚟嘅錢，韓國大學生會參考朋友嘅建議同埋網上嘅評論，揀性價比最好嘅地方。
除咗會比較價錢，韓國大學生都係同職場人士一樣，拍拖嘅行程基本上都係食飯同去咖啡店食甜品，仲會去網吧、戲院、展覽等等嘅地方玩。
- 食飯
넥스트이코노미
同香港嘅大學生情侶唔同，韓國大學生主要集中喺自己學校附近嘅地方玩。
大學路同其它地區相比，因為主要客群係學生，所以物價都會跟返學生嘅標準，食嘢都係平靚正㗎。
- Cafe
韓國嘅大學生雖然負擔唔到太高昂嘅拍拖費用，不過都會去幫襯Cafe。
最近韓國嘅人氣Cafe買一杯美式咖啡價錢大概喺4000-6000韓元，如果計一人一杯飲料同蛋糕，埋單都要20000韓元以上。
咁點解大學生會去呢啲唔算低消費嘅地方hea時間呢？
其實去Cafe都係貪個氣氛同埋想影相打卡。
比起單純係去飲咖啡或者食蛋糕，感受咖啡店嘅氣氛同感性嘅氛圍，先係值得畀錢嘅部分。
喺靚靚嘅Cafe入面影相傾計，2、3個鐘時間話咁快就過，所以韓國情侶都好鍾意去咖啡店㗎！
- 去玩
韓國雖然有好多展覽、逃出主題嘅咖啡店、攻防戰體驗等等情侶可以一齊去嘅特色拍拖場所，但係不過每次出街都去呢啲地方，支出都真係好大負擔。
不過，韓國大學生就發掘到啲平價嘅娛樂方式，拍拖嘅時候有更加多嘅選擇，例如可以同男女朋友去投幣式K房同埋玩紙牌類遊戲嘅Cafe渡過拍拖嘅時間。
投幣式K房1000韓元可以唱到大約4首歌，呢個咁平民嘅價錢吸引好多大學生情侶去拍拖，令韓國嘅K房成為咗拍拖聖地之一。
玩紙牌類遊戲嘅Cafe都係一樣，以每小時計算，一個鐘大約係2000韓元一個人，有野飲又有得玩紙牌遊戲，所以都好受韓國大學生嘅歡迎。
講到韓國最受大學生歡迎嘅約會地點，點可以少得漢江公園。
每一個韓國大學生都會有嘅浪漫憧憬，就係喺景色咁靚嘅漢江公園同男女朋友一齊飲罐啤酒。
喺漢江公園同自己鍾意嘅人坐喺蓆上面，一邊傾計一邊食碗漢江嘅便利店獨有嘅拉麵，唔需要咩入場費、使用費就可以完成到一次完美嘅約會！
monthlychosun.com
去漢江點可以唔試下踩韓國嘅共享單車 （따릉이）。
一個鐘都只係1000韓元，仲可以喺超過2000個租借站隨時接還車，非常適合情侶一齊踩單車增進感情。
2. 制定拍拖路線嘅方法
韓國大學生係點樣制定拍拖嘅路線？
大部分都係喺社交媒體例如Facebook、Instagram到搵呢啲資訊。
同香港人一樣，韓國情侶都好鍾意喺貼文下面留言tag自己嘅男女朋友，叫佢哋同自己一齊去，又或者cap圖畀佢哋睇。
仲會用Instagram儲存貼文嘅功能，記低自己想去嘅地方。
所以到底主要去邊個地區？韓國大學生情侶比起去單一地區，更加偏向以社交媒體上面熱門嘅地方為中心制定拍拖嘅路線。
所以IG上面介紹嘅拍拖好去處嘅帳號、又或者電視入面介紹靚地方嘅節目都係好有人氣。
透過呢啲方式雖然係好難直接知道詳細位置、營業時間同餐牌等等嘅資料，不過大家知道咗呢個地方之後都會自己去用Naver地圖Kakao地圖搵詳細資訊制定拍拖嘅路線。
LIFEPLUS/데이트팝
除左社交媒體，仲會用唔同嘅手機應用程式搵拍拖嘅地點。
喺韓國國內有好多呢類型嘅平台，推介適合朋友、情侶去嘅場所，仲會講埋營業時間、餐牌、價錢、食評等等嘅資訊，雖然唔夠社交媒體上面推薦嘅場所豐富，但係都值得用來參考。
3. 拍拖費用嘅負擔
韓國嘅大學生大部分都會返兼職或者有父母畀嘅零用錢，基本上唔會無收入來源。
雖然係咁，但出去拍拖基本上都要洗3-5萬韓元一個人，就算一個禮拜見兩日，咁一個月嘅拍拖洗費都要30至40萬韓元。
所以比起由一個人畀曬，更加偏向AA制或者一個人畀曬另一個人就埋單之後轉帳畀佢，即係好似香港每次食完飯都會有人話「Payme你」咁。
因為呢種埋單文化嘅出現，韓國國內甚至出現「約會戶口」 （데통）嘅文化，「데통」就係「데이트통장」嘅縮略語。
因為AA制或者次次都要過數好麻煩，所以唔少韓國情侶都會開呢種戶口。
每個月大家一齊入錢入呢個戶口，拍拖嘅時候就用呢個戶口張卡畀錢。
好處係真係好方便可以解決到畀錢嘅問題，但係壞處就係分手之後都幾唔好意思，要解決戶口嘅問題。
亦都有情侶係由有能力嘅一方畀曬先，另一方就等有閒錢嘅時候再畀。根據各自嘅財政狀況，互相體諒同承擔拍拖嘅洗費。
4. 韓國大學生成日去嘅拍拖場所推薦
上面就介紹咗韓國大學生嘅拍拖文化，咁小編而家就同大家介紹埋韓國大學生嘅約會路線啦！
韓國大學生用最平嘅價錢可以享受到點樣嘅拍拖日程？
大家睇完呢篇文章之後，就可以參考吓下次嚟韓國可以點樣「窮游」。
1.望遠洞漢江公園約會（總費用2人43000韓元）
餐廳：망원동 호계식
呢間餐廳位於地鐵6號線望遠站附近嘅地方，可以食到雞肉湯飯。韓式嘅食法就係用清湯泡飯嚟食，係性價比高而且味道爽口嘅一餐。
價錢：雞溫盤 兩個 8500韓元
@ danginbookplant
Cafe ：망원동 당인리책발전소
呢個地方係結合咗書店同埋咖啡店，可以喺安靜又溫暖好似圖書館咁嘅氣氛入面，睇書，傾計同埋嘆咖啡。
價錢 ：美式咖啡 5000韓元、抹茶Latte 6500韓元、朱古力布朗尼 4500韓元
精品店：말랑상점
望遠洞入面有好多售賣貼紙，鑰匙扣，手機殼等等物品嘅可愛嘅小飾品店。
價錢：日記裝飾用貼紙 5000韓元
散步：望遠漢江公園
首爾有11個漢江公園，其中望遠漢江公園喺望遠洞附近，交通便利，方便去散步。
喺呢到可以見到好多一邊飲啤酒一邊欣賞漢江嘅夜景嘅情侶。
價錢：2罐啤酒 大約5000韓元
2. 三清洞美術館約會（總費用2人47500韓元）
kocis.ko,kr
地點：國立現代美術館 首爾館
喺國立現代美術館可以欣賞到出色嘅現代美術作品，，係首爾代表性嘅美術館。因為連BTS（防彈少年團）嘅成員RM都成日去呢到睇展覽，令呢間美術館最近更加出名。只需要4000韓元嘅低廉價格就可以體驗有文化氣質嘅生活，未滿24歲仲可以免費入場，所以未滿24歲嘅韓國大學生情侶一定會去呢到拍拖。
價錢：門票4,000韓元
Cafe ：이채
呢間咖啡店位於三清洞嘅小巷，喺韓屋街散步嘅時候可以順便去埋呢間咖啡店。
喺韓屋入面飲咖啡同食蛋糕，可以感受到更加特別嘅氣氛，推薦大家一定要去！
價錢：五味子汽水7000韓元、雲呢拿Latte 6000 韓元、摩卡蛋糕 6500韓元
餐廳： 남도분식 북촌점
麵類食品普遍價錢比較平，而且味道都唔差，所以好受大學生歡迎。
尤其呢間南島麵食，有可愛嘅氣氛同裝修，而且餐牌仲有韓國南部地區嘅特色食物，相當受歡迎。
價錢： 乾菜葉炒年糕 6000韓元、紫菜包飯 9000韓元
投幣式K房
投幣式K房喺首爾好多地方都可以搵到，唱4-5首歌都係1000韓元，計返一個鐘都係5000韓元，喺一個獨立嘅空間可以舒服咁唱歌，係又平又可以玩得開心嘅代表性場所！
價錢：一個鐘大約5000韓元
今日就向大家詳細介紹咗韓國大學生嘅拍拖文化仲有路線，唔知大家又有無經驗想分享？都可以下面留言同我哋講㗎！
✨馬上Follow我哋IG
instagram.com/creatrip.hk
其他延伸閱讀 | |
 韓國人理想型 |  韓國人特徵 |
