大時大節最怕聽到嘅說話
就到新年，韓國人最怕三姑六婆問呢啲？同香港又有幾相似？
Hello，大家好，我哋係由韓國人每日提供最新韓國旅行資訊嘅Creatrip。
就到新年相信大家都會有唔少家庭聚會，原本諗住一家人開開心心過日子。不過....總有一刻係大家想避都避唔到，呢一刻就係三姑六婆問話嘅時候啦！韓國職場人、大學生，準大學生最怕俾人問啲呢，大家又覺得同香港似唔似呢？
職場人大時大節最怕聽到嘅說話
1. 年薪有幾多？而家草到幾多錢？
只要一踏入社會，大家一定有固定嘅收入，唔少人可能都會30%係生活開支，30%俾家用，40%可能用嚟草起。小編覺得草幾多都係個人意願，唔需要話俾人知，不過大時大節親戚都會最鍾意問。
2. 邊個邊個賺幾多喎
問完賺幾多錢，好多時就會開始有比較。譬如三姑六婆就會開始講：「邊個個仔而家搵緊年薪4,000萬韓won，你都要努力下啦！」其實.....喺呢個時候應該要答三姑六婆：「仲有工返到已經好好啦....」
3. 覺得繼續留喺呢間公司有冇希望？
有邊個人唔想入大企業，邊個人唔想做老闆？ 有時想輕輕鬆鬆返份工，講真個句又邊有咁容易。返工有壓力係一定，有冇前景真係好難預知，只要俾心機做好，相信老闆總會獎賞自己。
4. 有冇男/女朋友啊？
三姑六婆最鍾意就係問：「而家有冇男/女朋友啊？、有嘅話幾時諗住帶返嚟？一齊食餐飯啊！」
5. 有冇考諗吓結婚啊？
問完有冇男/女朋友之後，好多時下一句就會話：「你哋年紀都唔細啦，一齊咗都咁耐，係時候要考慮吓結婚啦喎！」好多時小編聽得最多嘅答案就係：「會結㗎啦，結個時會再同大家公佈。」
6. 係時候要管理下身體啦
有時候返工真係會做到冇停手，時間不知不覺間會不斷走。飲食方面更加會唔定時，肚餓嘅時候可能都係食快餐去解決，呢啲時候好易就會變肥。不過....三姑六婆可能唔會太明，就會講：「做咩肥咗好多啊？係時候要管理吓啦。」
7. 幾時諗住生仔啊？
喺韓國，結婚年齡慢慢越嚟越後，唔少長輩成日都會催結婚。結完婚之後，好多時就會係催生仔，不過小編覺得呢啲事都係要順其自然，越急反而越唔得。
大學生/準畢業生大時大節最怕聽到嘅說話
1. 今年幾歲啊？
더쿠
雖然每年都見，不過都係難免會被問到「今年幾歲啊？」不過聽韓國朋友講，好似女仔會比較少問到，多數都係問男仔多，因為好多時男仔喺大學期間會去當兵，有兩年期間唔會讀書，所以畢業嘅時候年紀都會俾人大兩歲（喺韓國係好正常嘅一件事）。
2.讀緊邊間大學話？
同樣地「而家讀緊邊間大學話？」可能俾人問嘅次數都會有好多次。不過小編相信，如果係讀比較出名嘅大學，好似首爾大咁，三姑六婆一定會記得，而且唔會再問。
3. 幾時開始搵工啊？
其實喺韓國，小編聽過唔少韓國人佢哋只要入到大學，喺Year1嘅時候就會開始準備就職，所以其實小編覺得三姑六婆真係唔需要替佢哋擔心。
4. 搵唔到工，係咪你眼角太高啊？
正所謂「人揀工，工都會識揀人。」有時唔係唔想快啲返一份工，只係咁啱啲工都唔適合自己。
5. 邊個邊個好似搵到份新工
當自己仲好俾心機搵緊工嘅時候，就會聽到三姑六婆講：「邊個邊個搵到份新工，你準備成點啊？」其實每次聽到呢句，唔少人都會覺得好大壓力同有負擔，心理都會有唔少傷害。
6. 咩工都試吓啦
「而家搵工難，有機會就去試吓啦，唔好再拖啦！」呢個說話唔知大家又聽過幾多次呢？不過都係個句啦...「人揀工，工都會識揀人」，有時勉強的確係冇幸福。
7. 明明以前好靚好聰明㗎，係咪要減吓肥啦？
其實外貌評價真係一句好傷人嘅說話，唔少年青人聽到其實都會好受傷同唔開心，好似覺得肥就係＝醜。
以上嘅問話，其實真係會令人帶嚟唔少無形嘅壓力。小編覺得，比起問對方可能會受傷或不安嘅問題，反而講啲鼓勵或稱讚嘅說話會更加好，希望大家今個新年都可以過得開開心心：）
如果有更多想知嘅內容，都可以隨時留言或者dm話俾我哋知：）
Instagram：creatrip.hk
