13句有趣嘅韓國諺語

字面意思係「唔冒煙嘅飯焦湯更熱」。韓國人喺食完石頭鍋飯之後，會倒湯落去整做飯焦湯，有啲似一味兩食嘅概念。而喺倒湯嘅時候，大家等咗一陣，諗住個湯應該已經冇咁熱啦，但因為石頭鍋存熱嘅效果好好，所以實際上個湯仲係會好熱辣辣，換句話講你俾佢個外表呃咗。暗指比起啲直率，你一眼就知佢諗咩嘅人，我哋會更加小心或驚啲安靜嘅人，因為我哋唔可以透過外表知道佢哋心目中諗緊啲咩。

2. 꿀도 약이라면 쓰다

字面意思係「就算係蜜糖，只要係藥都會苦」。呢個係個好有趣嘅諺語，好多人都會覺得蜜糖係一樣又甜又好食嘅野，不過一旦你定義佢為藥嘅話，佢就唔會再食落咁甜。呢句可以套用落接受建議嘅情況。我哋都唔鍾意接受建議，所以如果其他人講得好好聽，讚我哋嘅話，咁就會聽落好似蜜糖咁甜，但如果佢哋開始想俾建議或者想教導我哋嘅時候，我哋就會覺得好似食藥咁苦啦。

3. 메뚜기도 유월이 한철이다

呢句字面意思係「草蜢嘅全盛期都係得六月」。草蜢雖然破壞力好強，但佢哋壽命亦都好短，喺夏天完結嘅時候，就係佢哋生命終結之時。呢句係用嚟諷刺啲人太過吹噓自己嘅成功，暗指佢哋嘅成功都只係一剎那嘅事，換句話講，姐係教人就算已經到達頂峰，都要保持謙虛。

4. 바다는 메워도 사람의 욕심은 못 채운다

Source: filcker@Meryl Ko

字面意思係「就算填得滿個海，都唔會滿足到人嘅貪婪 」。大海無邊無際，感覺征服唔到亦都填唔滿，但實際上填滿個海或者比滿足人類嘅貪婪更容易。呢個係個好好用嘅諺語，用嚟形容一啲人貪心到就算你為佢做啲咩，都永遠滿足唔到佢，佢哋甚至仲貪婪過個大海，係個無底深淵，大家都要小心呢種人。

5. 아이 보는 데는 찬물도 못 마신다

字面意思係「照顧小朋友嘅時候，連一啖凍水都唔飲得」。實際意思指小朋友就好似嚿海棉，吸收同學習能力都好強，而學習對象往往會係身邊嘅大人。形容喺小朋友面對要注意言行舉止，唔可以令到佢哋學識啲不良習慣。

6. 꿩 먹고 알 먹는다

呢個係「食山雞再食山雞蛋」。姐係一石二鳥嘅韓文版，有時韓國人喺獸獵山雞嘅同時，會食埋山雞嘅蛋，算係買一送一。

7. 구슬이 서말이라도 꿰어야 보배

直譯為「就算有三斗珍珠，都要雕琢過先會變寶物」。類似中文嘅玉不琢不成器，再好嘅idea，都要實踐先可以發揮佢真正嘅價值。

8.종소리가 잘 들리면 비가 온다

直譯意思係「聽到鐘聲嘅話，就代表要落雨啦」。呢句其實就同佢字面一樣，好似啲人話「每當我膝頭哥痛，就代表要落雨」嘅意思。可能你會以為只係普通一句諺語，但其實佢係有科學根據㗎！喺雲層積聚嘅陰天，氣壓會變得唔同，繼而令空氣傳聲嘅能力會變得更好。所以如果你有一日，聽到從遠處傳嚟鐘聲嘅話，就代表嗰邊可能就快要落雨啦。

9. 고래 싸움에 새우 등 터진다

字面意思係「鯨魚打交會令蝦嘅背脊裂開」。因為鯨魚嘅體型好巨大，所以當兩條鯨魚打交嘅時候，會造成巨浪，而呢種強大嘅巨浪會傷害到海入面其他身型較小，好似魚蝦等嘅生物，就好似蝴蝶效應咁。例如國際上，美國同中國嘅對立，會對鄰近其他小國帶嚟負面影響一樣。

10. 개구리 올챙이 적 생각 못한다

呢句意思係「青蛙會忘記自己蝌蚪嗰時嘅記憶」。 簡單嚟講即係忘本，唔識飲水思源嘅意思。只要傷口結焦，就唔記得當初傷口有幾痛。

11. 지렁이도 밟으면 꿈틀한다

呢句係話「蚯蚓被人踩都識掙扎」。蚯蚓係好無害嘅生物，唔會傷害其他人，都冇能力保護自己，但仍然會有人想傷害佢哋，令佢哋會掙扎嚟自教。形容啲睇落幾溫柔友善嘅人，逼得絕頭都會有爆發，反擊嘅一日，有少少似我哋會講嘅「佛都有火」。

12. 하늘이 무너져도 솟아날 구멍이 있다

呢句意思係「就算天塌落嚟，都會有窿俾你捐出去」。其實就同「上帝閂咗一扇門，會同時為你再打開一扇窗」/「天無絕人之路」一樣意思，喺咩時候都要保持一絲希望。

13. 가는 말이 고와야 오는 말이 곱다

呢句意思係「要講好聽嘅話，先會可以聽番好聽嘅說話」，同我哋會講嘅「你點對人，人點對你」類似。

今日介紹咗13句韓國嘅諺語，可以見到就算每個國家都有諺語，甚至有啲意思好相近，但表達嘅方式都好唔同。

唔知大家覺得今日介紹嘅諺語當中，邊一個最有道理呢? 歡迎留意話俾我哋聽！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購