韓國秋冬8款麵包
韓國秋冬季最流行嘅8款麵包！大家試過幾多種呢？
Hello，大家好，我哋係由韓國人每日提供最新韓國旅行資訊嘅Creatrip。
韓國嘅秋天朝早同夜晚都好涼爽，呢個咁爽嘅天氣當然就想食好多嘢啦！呢啲天氣，梗係要食代表到韓國秋冬天嘅街頭小食啦。今次小編就介紹8款喺韓國街頭可以見到嘅包類小食俾大家。
8種韓國街頭麵包
1. 鯛魚燒
呢款街頭小食應該係好多人都熟悉嘅小食，因為佢經常喺電視劇裡面出現。呢款麵包係魚嘅形狀，表面鬆脆，裏面軟腍腍，佢有好多個味，有紅豆、吉士、綠茶等等。一般韓國嘅檔仔只會賣紅豆同埋吉士味，有時平嘅話￦1,000都可以買到4-5舊。
2. 菊花包
呢款麵包同菊花嘅形狀相似，外面鬆脆，裡面有啲紅豆餡。同鯛魚燒唯一唔同嘅地方就係呢款小食比較細，食起上嚟方便啲。一包大概￦2,000，大家一定要趁熱食先，因為凍咗就會變得冇咁好食。
3. 雞蛋包
呢一款就係韓國嘅雞蛋糕啦，蛋糕上面會有一個煮熟咗嘅雞蛋。呢款麵包唔會好甜，但就好香蛋味！一個都只係￦1,000，真係好抵！
4. 糖餅
呢一款糖餅係由麵糰包住瓜子，果仁同埋糖煎炸而成，糖餅嘅款式有好多，喺唔同地方買到嘅味都唔一樣，糖餅一般都係￦1,000一塊。有啲係蔬菜餡嘅糖餅就稍為貴啲， 一塊要￦1,500到￦2,000不等，今日最新款嘅糖餅就係綠茶味啦！
5. 花生麵包
最近喺韓國嘅地鐵站裡面都會見到佢嘅蹤影，次次去轉車嘅時候，經過一啲小攤檔都會聞到呢款烤焗花生麵包嘅香味！通常一包有12粒，大約￦2,000一包。
6. 粟米吉士小蛋糕
粟米型嘅吉士小蛋糕，每次小編只要一去明洞站，都會忍唔住買一包嚟食。佢嘅味係鹹鹹甜甜，平均大約￦3,000有10個左右，新鮮出爐熱辣辣嘅時候係最好食！
7. 合桃蛋糕
呢款合桃蛋糕通常都係一啲路邊攤有得賣。佢嘅形狀就係一粒合桃咁樣，裏面有紅豆，味道唔會太甜，最特別嘅地方就係佢有原粒嘅合桃喺入面！一包有12個，大約賣￦3,000左右。
8. 蒸包
香港人嚟到韓國，一定會好掛住酒樓嘅蒸包。呢一啲就係韓國嘅饅頭啦，但係呢一度嘅麵包皮同香港嘅有啲唔同。佢嘅饅頭皮係比較硬身啲，裡面通常都係紅豆、綠豆、肉類或者吉士餡！通常￦4,000有6個。
以上呢八款就係秋冬季最代表韓國嘅麵包啦！係咁涼嘅天氣食返一啲熱辣辣嘅麵包係唔係好暖呢？唔知大家又最鍾意邊一款呢？一齊留言同小編分享一下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
