Hello，大家好，我哋係由韓國人每日提供最新韓國旅行資訊嘅Creatrip。

話咁快今個sem已經過咗一個月，今年因為疫情嘅關係好多國家都轉咗喺網上教學，就連韓國嘅大學校園氣氛都無過往咁濃厚。韓國同香港一樣都係9月開sem，不過9月已經係佢哋嘅第二學期，至於sem break嘅時間就同香港差唔多。

唔知大家有無考慮過去韓國升學或者交流呢？韓國嘅大學生活充斥住校慶、MT、club，仲有大學生獨有嘅棒球褸文化，到底又有咩象徵意義？等小編同大家介紹下啦～

韓國大學生文化

1. 韓國大學棒球褸

大家嚟韓國旅行嘅時候，尤其喺大學附近，應該都見過好多著住棒球褸嘅大學生。呢啲棒球褸可以話係韓國大學生嘅「校服」，幾乎每間大學都有出自己專屬嘅棒球褸俾學生買。

其實棒球褸嘅前身係一個校徽，因為以前韓國大學嘅錄取率低，大學生嘅社會地位好高，為咗凸顯自己嘅身份，當時嘅大學生就會將校徽扣喺件衫上面。直到而家韓國大學嘅數量比起以前多咗好多，越嚟越多大學轉做設計自己嘅棒球褸作為自身學校嘅代表。

韓國人出名民族意識強，「團結」對於佢哋嚟講好重要，所以大學生統一著住代表自己學校嘅棒球褸就係一種團結意識嘅表現。

喺韓國，如果有校際比賽，一定會見到觀賽嘅學生全部都著住自己學校嘅棒球褸，一嚟可以增加氣勢，二嚟提醒佢哋代表緊學校要注意自身行為。

因為棒球褸嘅代表性太強，唔少名牌大學生就算唔使返學都會著住自己學校嘅棒球褸出街曬吓命，行喺條街到都覺得威啲。而棒球褸上面嘅數字其實仲有特別意義，就係入學年份。所以著棒球褸嘅好多都係新生，當完兵之後復學或者就嚟畢業嘅老鬼反而對棒球褸會有少少抗拒。

*不過最近好多為咗配合學生需求，而家嘅棒球褸唔會再有入學年份，只會有係咩系同名*

2. 韓國男大學生畢業平均年齡

韓國男人要當兵相信大家都知，佢哋好多時都會揀讀到一半休學去當兵。

因為韓國嘅兵役長1年10個月，如果等到year4先去服兵役，分分鐘會錯過搵工嘅時間同埋實習之後轉正職嘅機會。唔單止會影響畢業搵工，就連拍拖都會影響，因為當完兵就意味唔會有2年嘅空白期，亦都代表你個人經歷完軍隊嘅洗禮變得更加成熟。所以好多韓國嘅男大學生會讀year1熟悉完環境之後，year2休學去當兵，兩年後再復學。

不過韓國人畢業之後好多都會讀埋大學學院（대학원）嘅課程，或者係讀埋碩士、博士，加上入伍退伍嘅時間都未必啱啱好銜接到新一個學年，所以好多男大學生正式脫離大學校園生活嘅年紀可能已經去到26、27歲。呢啲「老鬼」復學之後都好少會著棒球褸，費事暴露自己嘅入學年份。

3. 韓國Year 1文化

喺韓國Year 1學生被稱為「새내기」（新生），而家因為疫情影響，佢哋都未有機會可以正式喺大學上堂，希望疫情快啲好，可以俾佢哋感受一下大學生活。不過冇疫情前，Year 1學生係點過嘅呢？

Orientation（OT）＋ 新生入學教育（새내기 배움터）

入咗大學之後，新生好多時都會參加OT或者新生入學教育嘅大型活動，呢個活動大部分都係新生參加，仲有一啲Year 2、Year 3學生同教授一齊，所以喺呢個時候可以識到好多人。

因為參加嘅學生人數都多，所以經常會安排去大型度假村，可能係過2日1夜或者3日2夜。 喺第一日新生會同教授、前輩一齊傾吓偈，佢哋會為之後喺大學生活嘅大家提供一啲意見，甚至會分組玩小遊戲。

불교공뉴스불교공뉴스

食完晚飯之後，就會睇由大學唔同社團或學校啦啦隊準備嘅各種表演。

OT嘅最後一晚，就係想大家再互相了解多啲，同學們會約喺宿舍入面一齊邊飲酒邊食零食，甚至會玩酒game玩到凌晨。

直到最近，因為一啲唔太飲酒嘅學生，因為周圍嘅氣氛或者係前輩壓力所逼，飲太多而過世  因為韓國有一種文化係，只要係大過自己，前輩叫你飲係冇得拒絕，只可以頂硬上。

因為有呢啲事發生，前輩都意識到問題嘅嚴重性，自願取消強制飲酒文化，而家即使唔太飲酒嘅朋友，都可以用其他飲品去代替，唔需要再睇眼色，可以同身邊嘅同學一樣玩得咁開心。

不過有另一個問題發生就係好多時因為飲太多，大家太high會出現一啲性騷擾，為咗防止呢啲事發生，有啲前輩係擔任監督工作人員角色，會好好控制場面。

飯局（밥약）

因為要開學，對於新生嚟講，可能仲未熟悉周圍環境，唔知學校附近有咩好嘢食，所以就會同前輩約飯局。

好多時飯局會同前輩約食Lunch或者Dinner，喺邊食飯嘅過程中，除咗可以再互相了解多啲之外，前輩仲會分享好多學校附近有咩好食，第一餐多數都係前輩請，因為佢哋想關心後輩，而後輩多數都會約喺下個月食多餐然後再請。雖然而家因為疫情冇咗呢種文化，希望下年再有返啦！

打完卡偷走（출튀）

相信中學咁俾心機讀書，入到大學當然會想放鬆啲，間唔中想hea吓，韓國有一種출튀文化，喺上堂嘅時候，老師都會逐一點名，喺點完名之後就會偷偷走人，之後就同同學去學校草地食外賣，或者有時可能去遠啲嘅地方去玩。

愚人節文化

4月1嘅係愚人節，喺呢一日韓國大學生會專登著中學校服返學，大家再約埋一齊影相留念，喺呢一日喺街上特別會見到好多著校服嘅學生，而重點係就算著住中學校服，夜晚都可以同朋友堂堂正正咁去食飯飲番杯！ 

聯誼文化

喺韓國大學生活，已經可以體驗到聯誼文化，通常都係三男三女約喺餐廳或者酒吧，一齊傾吓偈同互相了解一下，另外多數約會對象喺同其他唔同學校學生，或者同學校唔同科嘅人聚埋一齊。

通常聯誼都會有一個中間人去負責搞活動，佢哋會喺群組打「邊個想同XX大學XX系（例如經濟學）男/女聯誼？」如果想去就要快啲send message俾搞手，因為好多時係以先到先得形式，聽講尤其係喺三、四月最多人參加，有時甚至唔使1分鐘就俾人搶哂啲位。

雖然一開始會好尷尬，大家都只係問吓對方問題，之後要玩吓酒game大家先會熟落啲，如果大家對對方有好感，可能仲會成為情侶關係，不過都唔一定係成功，出去嘅時候，抱住一種想識吓新朋友嘅心態，咁樣反而仲好。

3. 韓國大學生嘅MT文化

MT即係Membership Training，唔止韓國大學會有，喺公司同學會之間都好流行，其實就係類似香港嘅Ocamp。MT就係成班唔熟嘅人會一齊出去玩、過夜。

同全校參加嘅OT唔同，MT多數係同系或者同一個社團嘅人一齊去，通常10至20人參加。 去嘅時間同地點每個系都會有唔同，主要都係去租一間渡假屋燒吓肉同飲酒，加深大家嘅友誼。因為MT係大家本身已經識，所以去嘅時候都比OT舒服。 

酒Game

當仲喺新生嘅時候，喺OT時已經可以喺前輩身上學識玩好多酒game，喺每年嘅3月同9月，新學期開學之際，喺餐廳經常會見到大學生聚埋一齊玩。

酒game除咗有一直由以前大學生傳落嚟嘅game之外，一啲綜藝出現過嘅都會玩到，因為每年都會有唔同熱門game，今日小編想同大家介紹幾個即使過咗咁耐，仍然仲有多人玩嘅！

士多啤梨Game（딸기 게임）

如果大家有睇《Runningman》應該都知點玩，主要係睇節奏，一開始第一個人可以由1至8揀一個數字，之後再指定一個人，被指定嘅人之後就要數啱再指另一個人，一直玩速度都會慢慢變快。

動物王國（동물의 왕국）

一開始大家先諗扮一隻動物，之後每個人諗好之後，就要做一個同你諗嘅動物有關嘅動作，大家喺做嘅過程中要記住對方嘅動作，由第一個人開始先做自己動物＋再加其他人（一個人），之後被指嘅嗰個人，同樣要自做自己動物再去攻擊其他人。呢個遊戲唔想輸，最好一開始做啲難啲嘅動作令人難記啲，如果太易就會成日被人攻擊  

記憶力遊戲（레코드 게임）

呢個game好簡單，一個人先開始講一位歌手，之後其他人要唱出關於講出歌手嘅歌詞其中一句，如果到自己唱唔出，或者唱其他人一樣嘅歌就會被淘汰，呢啲時候如果係自己鍾意嘅偶像就會特別有利，不過玩呢個game嘅時候，真係會諗返起唔少回憶。

訓民正音遊戲（훈민정음 게임）

玩呢個game多數會喺限定時間內（15-30分鐘）唔可以講英文只可以講韓文，如果講咗就要飲酒，雖然聽落好似好簡單，但喺日常生活中，我哋不知不覺都會講好多英文。如果呢個game再加埋啱啱嘅記憶力遊戲，Kpop好多時用到嘅英文就要飲超多酒啦！    

4. 韓國嘅大學學費超級貴？

根據韓國喺2020年嘅一項調查，私立大學平均一年嘅學費係717萬韓元（大約4萬8千港幣），同香港其實差唔多，不過私立大學嘅醫科一年平均學費可以去到1027萬韓元（大約7萬港幣）。韓國SKY三大名校入面，延世同高麗大學都係出名學費貴嘅私立大學。

韓國嘅公立、國立大學一年學費平均係408萬韓元（大約2萬8千港幣），雖然相對上平好多不過對於學生嚟講都係一項沉重嘅負擔。好多人唔單止會休學當兵，仲會休學去做嘢，儲夠學費再繼續讀書，所以大學附近嘅餐廳有好多空堂去做兼職嘅學生，起碼補貼下平時嘅生活費。

5. 大學有未成年人？

韓國人年齡嘅計法唔知大家有無混淆過？除咗出世計1歲同每年嘅1月1日都加1歲之外，仲有一樣年齡嘅文化就係「早年生（빠른년생）」。早年生就係指喺嗰年1月至2月出世嘅人，同舊年3月至12月出世嘅人會視為同年，會一齊3月入學。

例如你係2001年嘅1月出世，就會當係同2000年3月至12月出世嘅人同齡，大家都係2019年3月讀大學一年級。不過早生年嘅人就只係得18歲（韓國年齡19歲）唔可以飲酒落club。因為2000年出世嘅人喺2019年已經係韓國年齡嘅20歲，所以就可以去club飲酒。

係咪計到頭都大埋都諗唔明自己韓國年齡幾多歲？好彩呢個制度因為太易造成混亂，而且成班人去飲酒都好難逐個逐個確認成年未，所以韓國喺2009年已經廢除咗早生年制度，同年出世嘅人就一齊入學。

成日喺韓國見到未滿19歲禁止食煙飲酒，但韓國偶像又慶祝20歲成年？因為韓國年齡20歲即係實際上已經過咗19歲生日；早生年就算係20歲，不過實際上就只係18歲因為未過19歲生日。

6. 韓國大學嘅校慶

韓國大學一年一度嘅校慶內容都係非常豐富，除咗會有當紅嘅偶像歌手上台表演，校園入面嘅慶典氣氛同埋周邊熱鬧嘅商圈更加係重點。每年將近5月校慶嘅時候，每間大學嘅學生會都會諗辦法聯絡各大經紀公司，希望邀請到最出名嘅偶像明星來表演。

已經畢業嘅學生都會趁呢個時候重返校園，同師弟妹聚下舊、探下仲未畢業嘅同學，呢個時候嘅大學校園簡直係充滿住青春洋溢嘅氣息。

不過因為唔同大學之間會互相比較，成日會有人問「點解舊年請到xxx，今年請唔到？」、「點解隔離大學請到xxx，我哋就無？」。

為咗陣營上唔輸蝕學生會喺校慶上嘅經費都越嚟越唔手軟，甚至可以高達幾億韓元，所以近年都有人提倡校慶開支合理化、預算要透明嘅理念。

唔知以上呢啲韓國大學生文化、年齡、團結意識等等，有無令大家了解多咗韓國？韓劇入面見到嘅大學生形象其實同現實差唔多，分別唔大，都算係韓劇呈現得最真實嘅韓國文化之一。睇完之後大家仲有無去韓國讀書嘅念頭呢？

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購