雖然對韓國人嚟講韓文係母語，但大家都知，就算係自己母語，有時都會犯錯，例如廣東話嘅「啊、喎、咩」，或者一啲單字總會成日打錯。小編今日整理出連韓國人都會成日犯嘅小錯誤，雖然口語聽落去差唔多，但只要係打字就會睇到錯得好明顯。到底有咩字，大家一齊嚟睇下啦！

韓國人常犯韓文錯誤

1. 안 되 / 안 돼

「되」係原形（되다），而根據字尾、時態嘅唔同會變成「돼（되어）」。所以好多人打「硬爹」，好多韓國人會好順手打成「안 되」，但其實正確寫法係「안 돼」。

2. 뵈요 / 봬요 / 봐요

「보다」係睇或望嘅意思，所以喺韓劇裡面成日會聽到「내일 봐（聽日見）」、「또 봐요（再見）」，亦即係由「보아요」→「봐요」嘅文法。

如果係喺韓國職場、同長輩講「再見」嘅話，就要用「뵈다」呢個字。同第一個介紹嘅되다用法一樣，「뵈어요」→「봬요」先啱，只寫뵈요係錯㗎。

3. 몇일 / 며칠

有學過韓文嘅朋友，應該知道「幾日」韓文就係「며칠」，雖然實際上「幾（몇）」「日（일）」發音「몇일」同正確用法「며칠」一樣。不過書寫要寫「며칠」先係正確，但都係會有韓國人誤寫成「몇일」。

4. 설레임 / 설렘

「설레다」係指心動或激動，但好多韓國人會寫成「설레임」，但其實正規韓文裡面並冇「설레이다」呢個字。正確寫法只得「설레다」，所以要表示心動嘅時候，用「설렘」先啱。

5. 바라요 / 바람 / 바래요 / 바램

韓文嘅希望（動詞）係「바라다」，韓國好多歌詞或者韓國人口語結尾，都會寫/講「바래(요)」，但其實寫「바라(요)」先啱。

除此之外，名詞嘅希望「바람」先係正寫，「바램」係錯㗎。

6. 인마 / 임마

如果成日有睇韓國綜藝嘅朋友，應該都會成日聽到主持人講笑咁講「你呢個衰仔（야 인마）」之類嘅說話。呢個字聽就聽得多，但如果叫韓國人寫，10個可能有8個都會寫錯。

正確寫法係인마（in-ma），而唔係임마（im-ma）。兩者發音好相似，好多綜藝節目出字幕嘅時候，好多時都係錯。雖然聽同睇嘅人都會理解，不過最緊要「正」字啊嘛！

7. 매다 / 메다

呢個係好多人都會搞錯嘅單字，而且亦有韓國人喺韓文辭典網站上問對於「매다（mae-da）」同「메다（me-da）」用法邊個先啱？發音上呢兩個單字幾乎係一樣，聽落去可能都聽唔清，不過只要一寫就會分得好清。大家只要記得「매다（mae-da）」呢個動詞係「綁、打結」意思，而「메다（me-da）」係「孭」嘅意思。

8. 어떻게 / 어떡해 / 어떻해

大家都識嘅「屙篤茄」韓文意思有「點算（어떡해）」同「如何（어떻게 / 副詞，後需加動詞）」兩種解釋。事實上係冇「어떻해」呢種用法，但仲係有好多媒體會寫錯。

大家只要記住，「（點算）어떡해」係正確用法，而「（點做）어떻게 해」係相同就得啦。

以上韓文用法，雖然都好簡單，但就係因為簡單所以打字嘅時候，好易會出錯。比起身為母語使用者嘅韓國人，學緊韓文嘅外國人出錯機會反而仲會少啲。唔知大家鍾唔鍾意呢類主題呢？如果有其他疑問，亦可以留言同我哋分享。

如果有更多想知嘅內容，都可以隨時留言或者dm話俾我哋知：）

   Instagram：creatrip.hk

  Facebook：Creatrip 帶你認識韓國每一面

   韓國代購