Hello，大家好，我哋係由韓國人每日提供最新韓國旅行資訊嘅Creatrip。
睇韓劇好多時都會見到啲結婚嘅畫面，見到劇入面嘅女主角影結婚相同結婚，係咪覺得好夢幻呢？不過大家有冇諗過其實喺韓國結婚嘅預算都頗大㗎！如果想喺韓國結婚究竟要預幾多錢？等小編一齊同大家睇睇啦！
韓國結婚預算
韓國最大嘅婚宴協會「DUOWED」今年針對新婚夫婦結婚需要嘅洗費出咗一份「2022年結婚預算表」，結果顯示原來一對新人結婚大約需要 ￦287,390,000 (約港幣$176萬）。
呢筆鉅額主要會用喺買樓、準備嫁妝、籌備婚禮、影結婚相、買結婚戒指、同埋Honeymoon等等嘅地方，通常都係由男家負責6成，女家負責4成。
結婚佔最大嘅成本就係買樓，而隨住韓國嘅樓價不斷上升，新一代嘅新人結婚最少都會預7至8成嘅budget用嚟買樓。根據統計結果，有大約4成嘅韓國人都會選擇買Apartment，有2成半嘅人就會選擇買villa（類似香港嘅村屋），亦都有接近2成嘅人會選擇買Officetel（類似酒店式公寓）。
韓國人都算係偏向鍾意買樓多過租樓，不過小編就覺得其實韓國樓價比起香港真係平好多><
除咗買樓之外，其餘嘅費用多數就係用嚟籌備婚禮。不過時下年青人都認為婚禮唔使搞得好大，喺可以減低花費嘅情況吓，搞一個得體嘅婚禮就OK !
睇到以上情況，唔知大家覺得又覺得喺韓國結婚買樓貴唔貴呢？小編就覺得雖然喺度結婚算貴，但如果計埋買樓，同香港比起上嚟就一啲都唔貴啦！大家又點睇呢？歡迎留言話俾小編知你嘅諗法~
如果有更多想知嘅內容，都可以隨時留言或者dm話俾我哋知：）
Instagram：creatrip.hk