語學堂比較
2020年6間韓國語學堂比較，到底揀邊間先係最好？邊間學費最平？邊間實力最平均？
Hello，大家好，我哋係由韓國人每日提供最新韓國旅行資訊嘅Creatrip。
想留喺韓國生活，除咗可以有結婚簽同移民簽之外，唔少人都會關心學生簽，所以早前小編就邀請咗唔同學校學生上嚟同我哋分享，各學校嘅優點同缺點，想之後嚟韓國留學嘅你，都可以參考下呢篇文章。
Q&A
1. 點解會想嚟韓國讀語學堂？
當日有唔少同學都表示，嚟韓國讀語學堂好多時都係為升上大學，畢完業之後想繼續留喺韓國返工，亦有同學表示想學多種語言，之後搵工可能都會有幫助，甚至有同學話比起留喺台灣學，嚟韓國學可以快啲上手，3個月就可以讀完一個課程，當然亦有同學係因為KPOP嘅影響，而嚟咗韓國讀書。
2. 推唔推薦而家讀緊嘅語學堂？
이데일리
首爾大學語學堂學生表示：一星期會有分3個老師去教，文法、聽、寫、讀、講都好平均。
5級嘅時候，每日都有單字測驗同短講練習。6級每日朝早都要聽新聞，老師會再出問題以MC方式去答，最特別係6級口語考試係以跨班形式考（2對2），總括嚟講，係一間幾唔錯嘅語學堂。
경희대학교
慶熙大學語學堂學生表示：讀緊2級嘅同學就表示慶熙大語學堂幾唔錯，首先學校為咗可以俾大家有多啲互動同練習機會，一個禮拜會有一次發表（唔計成績）。
功課都係一星期一個主題，做完之後老師會對，錯咗會話俾大家知正確答案，然後大家再去改，同時一個學期會有一次文化活動，連上堂嘅筆記簿老師都好貼心咁準備埋。
대학저널
高麗大學語學堂學生表示：同學話覺得高麗大語學堂算係中規中矩，老師都對學生好好，唔識嘅可以隨時問，老師會好親切咁教大家。
서강대학교
西江大學語學堂學生表示：一直大受好評嘅西江大學，相信唔少人都聽過西江大係重視口語，但唔知係唔係而家因為受疫情影響，學生都話好失望，口語練習機會少咗，老師態度唔太好，唔少學生都話想退學，考試唔合格都好都冇得補考，小編覺得可能係因為網上溝通，大家會唔多唔少會有誤會。
시립대학교
市立大學語學堂學生表示：由2級讀到5級嘅市立大學語學堂嘅同學就好推薦，佢最大賣點就係學費平，老師好，一個學期會有3次戶外教學（學費已包）。學校外國人多，大多都係香港同台灣學生，大家都可以方便有個照應，學校仲提供跳舞同唱歌班，甚至為咗想同學可以考好Topik（韓國語文能力測試），更設有Topik班。
월간조선
梨花女子大學語學堂學生表示：唔少外國人都會揀嘅梨花女子語學堂，同學表示如果讀低級（1-3級）會推薦，高級（4-6級）就唔太推薦。
唔少大學語學堂一日可能會學2個文法，相反梨大高級班係兩日學一個文法，進度有啲太慢，加上討論時間少，甚至有老師有取笑同學嘅發音。
同學比較推薦學校宿舍（所有人都可以租），冇門禁仲會有人清潔公共空間，行返學都唔洗5分鐘，另外如果同學讀到6級再升上大學，學校會俾1百萬獎學金（約HKD 6,452左右）。
*以上內容唔代表所有老師都係咁，只作參考
3. 正規課程學費
學校 | 報名費 | 學費 | 書簿費 | 保險費 |
| 首爾大學語學堂 | ￦60,000 | 上晝班：￦1,730,000 下晝班：￦1,580,000 | / | / |
| 慶熙大學語學堂 | ￦60,00 | ￦1,500,000 | ￦50,000 ~ ￦60,000 | ￦150,000 |
| 高麗大學語學堂 | ￦60,000 | 上午班：1,660,000 下午班：1,500,000 | / | / |
| 西江大學語學堂 | ￦60,000 | ￦1,780,000 | ￦50,000 ~ ￦80,000 | / |
市立大學語學堂 | ￦50,000 | ￦1,350,000 | / | / |
梨花女子大學語學堂 | ￦60,000 | ￦1,720,000 | ￦53,000 ~ ￦60,000 | / |
*每個學期費用都有可能會變
4. 生活費
每個人生活洗費都唔一樣，不過平均大家都係40-60萬左右（唔計租）。
高麗大學生表示：平時洗費係50-60萬左右，有時shopping或者食太多就會到100萬左右。
用得最少嘅係市立大學生，一個月大約用28萬左右，基本上都係慳係食同交通費方面（行返學多）。
小編覺得有一個同學嘅分享都幾啱，生活費要洗幾多，好睇你嘅budget有幾多。
本身預算可以洗嘅錢少啲嘅朋友，好自然就會出少啲街、煮多啲飯；預算多啲嘅朋友，就會出去玩多啲。
唔知大家睇完之後，心目中有冇邊間語學堂想讀呢？有更多疑問歡迎大家留言話俾小編聽！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
