全州生活介紹
首爾以外嘅城市係點？小編現居嘅城市——全州，介紹韓屋村、韓式拌飯以外嘅全州生活！
Hello，大家好，我哋係由韓國人話你知每日最新韓國資訊嘅Creatrip。
唔知大家有冇計劃過要嚟韓國生活呢？其實韓國除咗首爾之外，仲有好多好適合生活嘅地區。今日小編就要介紹下自己喺全州嘅生活。
全州生活
全州位於韓國嘅西南邊，係韓國第16大城市，由首爾坐KTX去大約要2個鐘、坐巴士就要3個鐘，城市同鄉郊嘅景貌都可以睇到。
1. 氣氛
講起韓國，可能好多朋友都諗起弘大、明洞呢啲咁熱鬧嘅地方。全州正正相反，呢度係一個好安靜、悠閒嘅地方。
小編個人好鍾意呢度安靜嘅氣氛，好似可以平靜落嚟一樣。特別係要嚟讀書嘅朋友，嚟到全州唔會有太多分散注意力嘅事物。一切都好安靜，可以放慢我哋急促嘅生活步伐。
2. 交通
雖然由首爾去全州可以坐巴士或者KTX，但去到全州市內，就只有巴士可以揀。韓國只有首爾、釜山、大邱、光州、大田有地鐵，其他城市都係以巴士為主要交通工具。
首爾嘅巴士會有通宵巴，但全州有唔少巴士去到夜晚10點就會停駛，大夜嘅話，就只可以坐的士。不過，全州冇首爾咁多人、咁逼，搭巴士個陣就會舒服啲。
3. 住屋支出
全州嘅住屋比首爾平好多！喺首爾月租達60萬won（4200港紙）嘅單人房型喺全州一個月先要20萬won（1400港紙），平足3倍！（香港小編表示：⋯⋯比香港兩邊都唔貴）
小編住緊喺兩房一廳一廁嘅屋，同室友分租，一個月一共50萬won，平均每人25萬won（1750港紙），喺首爾絕對租唔到。
4. 飲食支出
小編覺得全州同首爾嘅物價唔會差太遠，主要睇你去食咩同去邊食。小編平時平平地4000won（28港紙）都可以食到一餐。
5. 娛樂
全州一樣有百貨公司同各種娛樂場所，不過可能冇首爾咁多。大家想嚟全州shopping，一樣冇問題，好多牌子喺全州都一樣搵到。
如果大家習慣喺大城市生活，可能嚟到全州會有啲唔慣。全州冇首爾咁繁華，好似小編大學附近咁，一間club都冇，只有餐廳同酒吧。
6. 兼職
唔少學生都會做兼職賺下外快，但喺全州可以做吧兼職唔多。小編嘅朋友多數都係喺餐廳打工或者去農場幫手。
小編建議如果大家想一邊返兼職、一邊賺錢交學費嘅話，去首爾會比較多工作機會，但首爾嘅生活支出會多啲。
小編介紹咗喺全州住喺一啲基本資料。大家打算嚟韓國讀書、生活嘅話，一定要考慮清楚各方面嘅因素啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
