韓國各地方言特色

Hello，大家好，我哋係由韓國人話你知每日最新韓國旅行資訊嘅Creatrip。

有睇開韓劇嘅朋友，一定有聽過韓國方言（사투리），特別係「回答吧」系列入面就有唔同地區嘅方言！今日小編就會簡單介紹下韓國唔同地區嘅方言嘅分別，等大家對韓文有深一步嘅了解。

韓國方言點樣分

朝鮮半島經歷過「三國時期」，高句麗（前37年－668年）、百濟（前18年－660年）、新羅（前57年－935年）三國鼎立，以自然景態，好似山、河等等做「國界」。

最大嘅自然「國界」係太白山脈，佢將半島一分為二。

東邊即係而家嘅慶尚道，過去係新羅嘅國土；西邊過去係百濟嘅國土，即係而家嘅全羅道；江原部分地方同埋而家嘅北韓，就屬於高句麗嘅國土。

即使之後新羅統一三國，每個地區仍然保留住自己嘅特色，尤其係語言方面。

雖然大多嘅方言已經混埋一齊嚟用，唔少字詞都可以全國通用，但每個地方仍保留住特別嘅表現方或同語調。

呢啲地區語言特色，令韓文與眾不同，一齊睇下唔同嘅方言有咩特色啦！

全羅道方言

全州韓屋村

全羅道方言，係韓國西南邊嘅方言，更係韓國兩大主要方言之一，全羅南、北道同光州都會用。

1. 全羅道方言結尾

全羅道方言聽落去比其他方言輕柔，因為佢哋有特別嘅結尾。

佢哋會加 잉 (ing)、랑께 (rang-gae)或者 당께 (dang-gae) 係句子嘅結尾。ing 同 ang 結尾係全羅道方言嘅一大特色。

基本上，每句結尾都可以加잉 (ing)，例如平時用嘅 ~했다（做咗～），全羅道方言會變成~했다잉。

랑께 (rang-gae)或者 당께 (dang-gae)可以取代 ~니까。

~니까係用嚟強調前面嘅句子，好似～했다니까（都話做咗～），意思同~했다差唔多，但語氣會有啲唔同。

喺全羅道方言入面，本身用～다니까就會變成당께、 라니까就會變成랑께。

例如想講아니라니까（都話冇囉）就會講成아니랑께 (anirang-ge)。

2. 全羅道方言特色

全羅道方言有好多唔同嘅感嘆詞。

如果大家喺講嘢之前加呢啲感嘆詞，一定會更加似真正嘅全羅道人。

例如 아따 (adda), 오메 (ome), 겁나게 (geomnage), 허벌나게 (heobeollage) ，有強調嘅意思。

大家加埋頭先介紹過嘅結尾，就可以講得更加傳神，例如아따 아니랑께 (adda anirang-ge) （真係唔係囉）。

3. 全羅道藝人

1. 瑜鹵允浩

允浩嚟自光州，影片可以見到佢到朋友傾計用方言係點嘅～真係好自然。

2. 都凞

都凞嚟自麗水，佢喺《請回答1994》入面就施展佢嘅方言實力。

慶尚道方言

慶尚道

慶尚道方言係另一個韓國好重要嘅方言。

一開始聽會覺得好粗聲粗氣嘅感覺，但聽耐咗都幾有魅力。

1. 慶尚道方言語調

唔同廣東話，韓文冇特定嘅聲調，即使完全冇語調高低咁講韓文，大家都會聽得明。

不過慶尚道方言就有好重嘅語調高低，好多慶尚道人即使喺首爾住咗好多年，都改唔到呢個習慣，所以先會有咁多藝人講嘢仍然帶有方言口音。

例如「가가 가가?」慶尚道方言入面係指「嗰個係咪佢？」，講嘅時候要配合話調「ga↗ ga↘ ga↗ ga↘ 」，語調唔啱就聽唔到正確意思。

2. 慶尚道方言疑問句

用慶尚道方言講疑問句，有唔同嘅配搭。

用가結尾，係「問一樣嘢『係』或者『唔係』（Y/N問句）」，例如이게 그것이가?（i-gae gue-geo-si-ga? / 呢個係唔係嗰個啊？）；但一般韓文通常會用야?做結尾（半語）。

如果問題變成「點解一樣嘢『係』呢個」呢種問句，就會變成～고結尾，例如왜 그것이고?（wae geu-geo-si-go? / 點解係呢個啊？）；一般韓文半語都係用야做結尾比較多。

至於係述語嘅部分「～나」，就會帶住「確定嘅想法，但再確認Yes或者No問句」嘅問法，例如오늘 머 하나?（o-neul meo ha-na? / 今日有啲咩做啊？），但呢個好容易同一般用法撈亂。

最後係노嘅部份，呢個好特別，可以話係聽到就會知道係慶尚道方言嘅部份，用法就係「需要解釋動作」嘅問句，例如오늘 머 하노?（o-neul meo ha-no?），意思就係「今天要做啲咩？」，同頭先嘅머 하나感覺就唔太一樣。另外，呢個韓國人嚟講，有啲偏向老人會用嘅語法。

3. 慶尚道特有嘅「맞나」

맞나（mat-na）喺慶尚道地區用嘅話，就表示「嗯嗯，我聽緊」嘅意思，同一般맞나요?（請問啱唔啱啊？）用法唔同。

4. 慶尚道藝人

1. 鄭恩地

喺《請回答1997》入面，恩地都有展現到佢完美嘅慶尚道方言，真係好可愛。

2. Simon D

Simon D都係嚟自釜山，佢成日都會喺電視節目度展現佢嘅方言，真係好有魅力。

江原道方言

Sokcho

江原道距離首爾好近，加上越嚟越多人都會去首爾返工，所以呢個地方嘅口音，其實冇咩太大分別。

不過如果仔細啲聽嘅話，就可以發現江原道部分城市嘅方言其實都幾特別。

1. 江原道方言結尾

好多人都話江原道人會喺結尾度加드래요（deu-rae-yo）其實係誤解嚟，正確嚟講佢哋係用래요（rae-yo）做結尾。

喺一般嘅標準韓文入面，래요係用嚟轉達其他人講過嘅嘢，但係喺江原道就係用嚟表述自己講過嘅嘢。

所以如果喺江原道問人呢度係邊度，你會問거기 어디에요?（geo-gi eo-di-ye-yo? / 嗰度係邊度？），但係江原道人會講거 어디래요?（geo eo-di-rae-yo?），通常佢哋都會答여 강릉이래요（yeo gang-leung-i-lae-yo / 呢度係江陵）。

2. 마카 (Maka)

마카（ma-ka）嘅意思就係韓文入面嘅全部모두咁解（mo-du）；而마세요（ma-se-yo）就係代表맛있어요（masisseo-yo / 好食）。

3. 江原道藝人

1. 金希澈

金希澈喺江原道橫城郡出世，不過佢已經喺首爾生活咗一段好長嘅時間，所以而家都唔係幾聽得出佢有口音，但如果睇返比較早期嘅綜藝節目嘅話，就可以聽到一啲希澈嘅口音。

忠清道方言

泰安

同江原道一樣，忠清道因為離首爾好近，所以失去咗好多明顯嘅語言特色。

每次聽到忠清道口音，都唔會覺得奇怪，反而覺得好有特色，一齊嚟睇下係咩感覺啦。

1. 忠清道方言語速

忠清道方言嘅特點就係慢，雖然對好多年輕人嚟講，已經冇咗呢樣特點，但係喺之前，忠清道係嘅口音係最柔軟、最慢、最舒適，所以好多忠清道方言聽起嚟，都好似好慈祥、溫柔嘅祖父母咁，相當溫暖。

2. 忠清道方言結尾

忠清道嘅方言結尾，通常會用여（yeo）、유（yoo）或者야（ya）

喺一般韓文入面，야（ya）就係半語，但係喺忠清道方言入面，會轉用여（yeo），聽起嚟會更加溫柔。

例如「咩啊」嘅韓文係뭐야（muo-ya），但係喺忠清道會變成뭐여（muo-yeo），係唔係聽落都冇咁惡呢？

另外，如果敬語結尾通常會用요（yo），但係喺忠清道會用유（yoo），亦都係相當溫柔嘅語法。

最後一個係啱啱提到嘅忠清道方言야（ya），呢個就比較棘手。

簡單嚟講，如果句子結尾係ㅐ（ae）結尾，喺忠清道會用야（ya）做結尾，例如왜 그랬대?（wae geu-raess-dae? / 點解咁講啊？），忠清道會講왜 그랬댜?（wae geu-raess-dya?）。

3. 忠清道方言「기」

기（gi）喺忠清道方言入面「正確」嘅意思。如果你喺忠清道問人哋呢個啱唔啱啊（맞아요?）會講기여（gi-yeo? / 기여 안 기여?），忠清道嘅人會覺得好親切。

4. 忠清道藝人

1.姜河那

姜河那雖然係釜山人，但佢喺《山茶花開時》飾演忠清道嘅一個小警察，喺戲入面嘅口音可以話係連忠清道人都讚。

2. 朴寶英

朴寶英都係忠清道人，喺佢早期嘅戲劇《熱戀年代》入面，都完美扮演咗一位忠清道女孩嘅角色。

濟州方言

濟州島方言喺韓國人心入面，可以話係聽落完全係另一個國家嘅語言，一樣都係韓文，但對首爾人嚟講聽落完全唔一樣、亦都理解唔到，大家一齊嚟睇下有幾唔同啦。

1. 濟州島方言詞彙

濟州島方言同慶尚道方言好似，但係就有更多特別嘅新單字，喺其他地區嘅人係完全唔知。

例如爸爸（아버지 / a-beo-ji）喺濟州島就會變成아방（a-bang）；媽媽（어머니 / eo-meo-ni）就變成어멍（eo-meong）。

2. 濟州島方言結尾

好多濟州島人都會喺結尾用엔（en）。舉個例子嚟講，我走喇（난 간다 / nan gan-da），喺濟州島方言就會變成난 가멘（nan ga-men）。

如果表示自己想要做嘅嘢係（ㄹ래），喺濟州島就會變成젠（jen）；例如我要瞓覺喇（나 잘래 / na jal-rae），濟州島方言就會變成나 자젠（na ja-jen）。

其實仲有其他，例如켄（ken）嘅用法，但因為太過複雜，大家之後學韓文都可以問下濟州島人。

3. 濟州島方言的歡迎

大家係唔係都有聽過呢？入到去韓國餐廳，就會聽到店員打招呼講어서 오세요（eo-seo o-se-yo），但係喺濟州島可以話係完全唔同。

濟州島嘅歡迎光臨係혼저옵서예（hon-jeo-ob-seo-yae）。

不過呢個由來就比較複雜，原本喺韓文入面，有個發音係ᄒᆞᆫ，但係而家已經唔再用喇。

佢嘅發音好類似han（한）同hun（훈），目前只係淨返濟州島仲有保留呢個發音（但冇呢個字）。

4. 濟州島藝人

1. 夫勝寛

勝寬係嚟自濟州嘅孩子，而且佢都因為咁而感到自豪，佢喺好多節目入面，將歌詞改成濟州島方言，都掀起唔少話題同濟州人嘅認同感。

首爾方言（？）

大家一定會諗，唔係所有人都係講標準嘅首爾話咩？首爾仲有方言咩？

其實喺比較老嘅首爾地區，仲是可以聽到一啲啲方言嘅口音，但已經越嚟越少，甚至都同鄰近嘅京畿道口音撈埋一齊。

1. 首爾方言變化

呢個講法嘅來源可以話係眾說紛紜，有老首爾人話呢啲係佢哋嘅方言，但亦都有京畿道水原一帶嘅人認為係佢哋嘅口音，雖然而家好多年青人都會講，但比較多係為咗扮可愛。

例如「真係㗎」，我哋會講진짜로（jin-jja-ro），但係口音會變到講成진짜루（jin-jja-roo）。

講「要做啲咩」，會由하라고（ha-ra-go）變成하라구（ha-ra-goo）。

有時睇節目或者係新聞都可以聽到呢種不自覺嘅發音變化。

2. 首爾方言使用者

其實都冇特定嘅使用者，可以話全部韓國人或者只要係識韓文嘅人，都會有首爾方言（？）口音。

唔知大家又有冇對方言多咗了解呢？大家又有冇鍾意邊個地區嘅方言，歡迎大家可以留言話俾小編聽。

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購