韓國最高學府首爾大學爆發N號房事件？
事隔4年後韓國大學發生N號房事件？仲運用到Deepfake技術咁高科技？
Hello，大家好，我哋係由韓國人每日提供最新韓國旅行資訊嘅Creatrip。
2020年發生咗一件震驚全韓國嘅性犯罪事件——「N號房事件」，當時主犯威脅受害者拍攝色情影片，然後用呢個做賺錢嘅途徑，吸引其他人俾錢睇“完整版”。根據推測當時有起碼26萬人有加入過呢啲群組，規模超大。而最近韓國再次被爆出發生類似事件，而且更加係喺大學入面發生...
首爾大版N號房事件
연합뉴스
根據韓國媒體報道，首爾大學畢業生朴某（40歲）同姜某（31歲）由2021年7月開始到今年4月，一共用咗61位女性嘅畢業相同社交平台上嘅相，製作出虛假裸照同色情影片，然後透過Telegram分享出去。事件當中涉及到12位首爾大學生同佢哋嘅朋友，令社會大感震驚。
조선비즈
今次N號房事件同原先唔同嘅係，幾年前N號房入面流傳嘅影片都係由受害者喺受威脅下自己進行拍攝，不過今次主犯們運用到Deepfake技術，將女性嘅相片同色情影片合成，整到好似真嘅咁。另外今次亦都冇任何金錢交易，只係單純希望滿足性需求。
而根據調查，朴某總共開創咗200個Telegram聊天室，而1個聊天室入面最多更加有成50人，透過呢啲聊天室被分享出去嘅影片同相片檔案更加超過1,800個！
據聞嫌疑犯朴某同姜某喺現實生活中冇見過面，只係透過Telegram認識同溝通，所以其實唔係專登以首爾大學為目標進行上述行為。而通常相片同影片係由姜某製作，然後姜某會連同受害者嘅個人資料將影片同相send俾朴某，再由朴某透過聊天室公開同流通。朴某亦都會send message俾受害者威脅同侮辱佢哋。
연합뉴스
部份受害者發現自己相片被盜用同整成色情相片/影片之後，分別向首爾西大門、江南、冠岳區同世宗市警署報案，不過警察就以因為Telegram會加密，匿名性高，所以無辦法追蹤到嫌疑犯為理由停止進行調查。
연합뉴스
上年12月開始，韓國警察國家搜查本部下令再次調查上述事件，至今總共查到有2個主犯同3個共犯。而搵到+捉到主犯朴某嘅最大功臣係當初舉報2020年N號房事件嘅團體，入面其中一個成員用咗2年時間潛伏，同朴某變熟之後引佢出嚟見面，最後喺上個月頭成功拘捕朴某。
首爾大N號房事件被爆出後，有好多韓國女仔都諗緊要唔要delete曬聊天軟件嘅icon同社交平台上面嘅相，怕自己嘅相會好似今次咁被盜用。
중앙일보
隨住科技發達，網路性犯罪亦都越嚟越盛行，雖然韓國有一條俗稱“濫用Deepfake刑罰”嘅法例，如被揭發即會被判處5年以下徒刑或者5000萬韓幣以下罰款，但係因為網路性犯罪好難即時搵到犯人，調查難度極高，法例效用存疑。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
