韓國婚禮文化
韓國婚禮文化大剖析！去婚禮仲有表演睇？
Hello，大家好，我哋係由韓國人話你知每日最新韓國資訊嘅Creatrip。
小編身邊開始有朋友步入結婚階段，聽佢哋講結婚酒席要幾多錢，又要化妝set頭，又要請planner、MC，真係頭都大埋。不過，都有朋友鍾意簡簡單單咁，唔大搞，甚至旅行結婚。到底一個韓國婚禮會有咩程序呢？今日就等小編帶大家睇下啦！
想喺韓國影婚紗相？
韓國婚禮順序
隨住自助、簡約婚禮越嚟越受歡迎，韓國嘅婚禮都漸漸變得簡單。不過，大部分嘅婚禮仍然依照原有形式進行。以下先為大家介紹一般韓國婚禮嘅順序。
1. 婚禮開幕詞
由婚禮主持人話畀大家知婚禮即將開始。婚禮正式開始前，會播放一啲新人嘅影片俾賓客欣賞。主持人會講一啲簡單嘅開場致詞，婚禮就會喺賓客嘅掌聲下正式開始。
2. 華燭點火
雙方母親入場後點蠟燭（男方母親先、而後女方母親）。華燭點火嘅意思係，點起嘅火光將照亮黑暗嘅地方，並帶嚟幸福。點完蠟燭後，雙方母親互相行禮，代表兩家正式成為一家人。
3. 介紹主婚人
簡單介紹為新娘、新郎證婚嘅主婚人，冇主婚人個陣會省略。
4. 新郎進場
當主持人話「新郎進場！」，新郎就會沿住紅地氈行入會場。通常新郎會一邊行、同賓客打招呼。不過好多新郎都會太緊張，行到好似機械人咁 新郎行到台前，會先向主證婚人行禮，再嚟會轉身向賓客行禮，最後就等新娘進場。
5.新娘進場
新娘係韓國婚禮入面真正嘅主角！大部分新娘都會由樓梯行落嚟，披上頭紗登場。大家嘅目光都聚焦喺新娘身上。通常新娘登場，會拖住爸爸慢慢向新郎行去，而新郎同岳父行禮後，爸爸就會將新娘嘅手交付到新郎手上（通常呢個時候最感人，通常會見到女方家屬喊，尤其係媽媽）。
6. 新郎新娘互相行禮
新郎、新娘會先向證婚人行禮，然後喺屋企人同賓客面前互相行禮。新郎、新娘會保持一定距離，慎重咁向對方以45度角行禮。
新娘、新郎會當住證婚人面宣誓會永遠愛對方、尊重對方。證婚人接到婚姻誓約書後，就會朗讀成婚宣言，成婚宣言朗讀完就代表呢段婚姻已經成立。 喺冇證婚人嘅情況下，新人會交換朗讀自己準備嘅婚姻誓約書，成婚宣言就會交由雙方父親或者主持人代為朗讀。
8. 證婚詞
證婚人將為兩位新人日後嘅婚姻生活講一啲祝福；冇證婚人嘅情況下，就會由雙方父親向兩位新人講祝福，或者省略。
9. 祝歌及祝賀表演
新人嘅朋友為咗恭喜兩位結婚，會唱歌、跳舞或者演奏樂器。有時候，充滿表演天分嘅新郎或者新娘會親自唱歌或者跳舞。相信大家應該都見過自己支持嘅偶像，喺婚禮唱祝賀歌曲呢？呢個部分可以話係呢場婚禮嘅高潮，因為可以睇到好好睇嘅演出！
首先，新人會向新娘嘅父母親行禮，然後再向新郎嘅父母親行禮（順序係女方親人→男方親人）。行禮嘅時候，通常新郎會行大禮，新娘因為著住婚紗，只會點頭行禮。向父母親行完禮後就會向賓客行禮，感謝賓客參加婚禮，並向賓客表示：自己以後會幸福過生活，賓客就回以熱烈嘅掌聲。
11. 退場 & 活動
當主持人講「新郎、新娘退場！」，新郎同新娘就會喺賓客嘅祝福退場。有時候，主持人會喺退場前搞下氣氛，可能要新人錫錫，或者為咗確認新郎飲完酒仲可以返到屋企，而叫佢轉圈圈行直線。
12. 閉幕詞及影相
婚禮開始嘅時候係由開幕詞揭開序幕，結束個陣就以閉幕詞畫上句號。婚禮結束後新人會同屋企人、親戚、朋友、同事等影相，有時新娘都會喺呢個時候拋花球俾朋友。
13. 韓國傳統拜禮
呢個儀式入面，新郎同新娘會換上韓服，一同接住由新郎親戚所掉出嚟嘅大棗同栗子。大棗象徵兒子，栗子象徵女兒，希望兩位新人可以連生貴子。通常親戚除咗丟大棗同栗子之外，仲會俾零用錢，俾新人去蜜月旅行個陣用。不過韓國傳統拜禮只有男方親戚先可以參加，為求男女平等，加上婚禮形式好多時都簡化，而逐漸被省略。
證婚人、主持人、祝歌
1. 證婚人
證婚人一般而言都係由新郎、新娘所屬宗教嘅相關人士（神父、僧侶、牧師）或者新郎、新娘平時尊敬嘅人擔任。證婚人通常都會請自己所認識嘅人入面，地位最高嘅人嚟擔任。不過如果搵唔到證婚人嘅話，有啲新人都會去請專門嘅證婚人嚟證婚。
2. 主持人
通常新郎或者新娘都會直接請朋友嚟做主持人。不過隨住冇證婚人嘅婚禮越嚟越多，更加凸顯咗主持人嘅重要，所以最近好多人都會去請專業嘅婚禮主持人。主持人嘅口才好壞可以決定整個婚禮嘅氣氛，所以做一個好嘅主持人一啲都唔容易。
3. 祝歌及祝賀表演
大部分新人都會搵朋友入面，識唱歌或者跳舞嘅朋友嚟表演。不過如果真係搵唔到人嘅時候，都有人會去請專業嘅歌手、樂團或者舞團嚟表演。
韓國婚禮花球
一開始婚禮花球係由新郎喺結婚前親自摘花、做成花束後俾新娘嘅禮物。依家嘅捧花就變成喺婚禮突顯新娘必備嘅物品。
亦都有傳說話接到花球嘅朋友將花球整成乾花保管一百日之後，燒咗佢，或者送返俾新人嘅話，呢對新人就會過得好幸福。最近都好流行將花球整成乾花LED燈、相框、蠟燭等物品收藏。
今天為大家詳細介紹咗韓國嘅婚禮文化，希望幫到大家進一步了解韓國啦！
想體驗韓國傳統婚禮？
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
