2023韓國預計櫻花開花日期
2023年韓國櫻花幾時開？睇準時機買機票，嚟轉快閃旅行啦！
Hello，大家好，我哋係由韓國人話你知每日最新資訊嘅Creatrip。
因為疫情影響，大家已經有好幾年冇得嚟賞櫻，不過自從上年年尾世界各地開始逐漸開關，大家終於可以周圍去旅行！想知道2023年韓國櫻花幾時會開就記住睇埋落去啦！
2023韓國預計櫻花開花日期
同上年一樣，韓國越嚟越早入春，2月同3月嘅氣溫亦都比往年高，所以估計櫻花開花時間亦都會提前。濟州島西歸浦櫻花預測將會喺3月20號左右開花，而韓國中部同南部地區將會喺3月尾陸續開花，另外京畿道、首爾、江原道北部同山區，就會喺接近4月頭嘅時候開。
而櫻花通常都係開花之後大約一個禮拜就會完全盛開，所以南部地區同北部地區賞櫻最佳時機分別會係3月底同4月頭。
櫻花開花時間比較 | |||
|---|---|---|---|
| 地區 | 2022年 | 2021年 | 往年平均 |
| 西歸浦 | 03.20 | 03.18 | 03.24 |
| 釜山 | 03.24 | 03.22 | 03.28 |
| 昌原 | 03.21 | 03.18 | 03.29 |
| 大邱 | 03.26 | 03.23 | 03.31 |
| 仁川 | 04.03 | - | 04.13 |
| 光州 | 03.22 | 03.18 | 04.02 |
| 水原 | 04.01 | 03.29 | 04.10 |
| 全州 | 03.22 | 03.18 | 04.05 |
| 江陵 | 03.31 | 03.28 | 04.05 |
| 首爾 | 03.28 | 03.24 | 04.10 |
韓國近幾年櫻花開花時間變得越嚟越早，代表冬天漸短、入春得早，近兩年數據同往年平均值比較，就可以睇得出有好大差異。
2023韓國櫻花慶典
釜山鎮海軍港櫻花節
- 地址：경상남도 창원시 진해구 평안동 10
- 舉辦日期：2023.03.24（星期五）- 2023.04.03（星期一）
「鎮海軍港節」係韓國最具代表性櫻花慶典，每年3、4月「余佐川」就會變身成為一條櫻花隧道，真係勁靚勁浪漫！呢個櫻花節停辦咗4年，今年適逢61週年終於重新舉辦，相信一定會超熱鬧超墟冚！
首爾汝矣島櫻花慶典
- 地址：서울 영등포구 여의도동 8-1
- 舉辦日期：2023.04.04（星期二） - 2023.04.09（星期日）
首爾最大櫻花慶典「汝矣島春花慶典」由2019年開始因疫情取消，上年時隔三年再次開放櫻花路，今年終於都要重新舉辦啦！今年嘅主題係“Spring Again”，相信到時候將會有超多慶典活動，例如舉辦開幕典禮同Busking表演、設置各種美食車同攤位等等，真係好令人期待啊！
石村湖櫻花慶典
- 地址：서울 송파구 잠실로 180
- 舉辦日期：2023.04.05（星期三）- 2023.04.09（星期日）
「石村湖櫻花慶典」今年終於要重新舉辦啦！蠶室石村湖不嬲都係一個韓國賞櫻熱點，大家可以一邊沿住湖邊散步，一邊享受浪漫氣氛。
慶州櫻花慶典
- 地址：경상북도 경주시 첨성로 140-25
- 舉辦日期：未定（2022年：03.25 - 04.16）
경주시청
2017年首次舉辦慶州櫻花慶典，喺2018、2019年吸引65萬名以上旅客，更連續三年指定為「慶尚北道優秀慶典」，雖然因為疫情而停辦，不過喺上年時隔三年再次舉辦，吸引超多人去玩。
濟州大櫻花節
- 地址：제주도 제주시 전농로 & 애월읍 장전리
- 舉辦日期：未定
濟州「大櫻花節」被視為韓國春天第一炮櫻花重頭戲，不過上年因為行政安全部決定取消慶典，令唔少人都覺得可惜。唔知道今年防疫方針放鬆，會唔會久違地重新舉辦呢？
以上係2023年韓國櫻花花期預測，大家可以參考一吓，如果想百分百享受韓國春日氣氛，可以考慮參加我哋嘅櫻花一日遊，留低一個美好回憶！
人氣櫻花團
如果有更多想知嘅內容，都可以隨時留言或者dm話俾我哋知：）
Instagram：creatrip.hk
