聖水洞&首爾林Cafe總整理

Hello，大家好，我哋係由韓國人每日提供最新韓國旅行資訊嘅Creatrip。

首爾「聖水洞」係韓國最大手工鞋產業區，起因係70年代，工廠開始移往房地價相較平嘅聖水洞，手工鞋產業就喺嗰時開始，所以喺度會見到好多工作坊同各式個人品牌店，唔知係唔係因為咁，多咗好多人會去行街，同時出現好多利用舊有建築物，重新裝修成打卡Cafe！

聖水站附近餐廳/體驗推薦

聖水洞&首爾林Cafe總整理

Standard Bread_{(스탠다드 브레드)}

• 地址：서울 성동구 성수이로18길 37
• 營業時間：09:00-21:00（Last Order 20:30）
• 前往方法：聖水站（성수역）3號出口行10分鐘

Standard Bread顧名思義，係一間專賣麵包嘅Cafe，每30分鐘就有一批麵包出爐！因為最近越嚟越多人知道呢度，所以weekend或者高峰時段好有可能要等一段時間先入到去。

小編上次去就食咗呢度最出名嘅牛油鹽麵包同紅遍韓網嘅黑松露紙巾麵包，唔單止影得仲玩得又食得（撕麵包嘅時候幾正XD），味道唔差，而且仲可以配埋呢度自家製嘅醬食，不過要注意醬料味道偏甜，一次過唔好搽太多啊！

Cafe Far Ben_{(카페 파벤)}

• 地址：서울 성동구 성수이로 65
• 營業時間：
  • 星期一至五 10:00-20:30
  • 星期六及日 11:00-20:30
• 前往方法：聖水站（성수역）3號出口行5分鐘

如果你係ARMY，咁就一定唔可以唔去RM妹妹開嘅呢間Cafe Far Ben啦！Cafe內部夠闊落，而且裝修行復古懷舊倉庫風，小編個人幾鍾意！

而且呢度嘅嘢飲同嘢食都唔錯，可以同朋友坐低chill吓吹吓水幾寫意~（可能有朝一日仲可以喺度見到BTS成員添啊！

Newmix_(뉴믹스)

• 地址：서울 성동구 연무장3길 3
• 營業時間：11:00-20:00（逢星期一休息）
• 前往方法：聖水站（성수역）4號出口行7分鐘

喺韓國即溶咖啡叫做「믹스커피」（mix coffee譯音），而「newmix coffee」顧名思義就係新式即溶咖啡專門店！「newmix coffee」最特別嘅地方係直接用預先調配好嘅即溶咖啡粉加熱水快速攪拌，唔洗好耐就可以嘆到一杯香濃咖啡，而且價錢方面比起一般咖啡平，一杯大約只需要₩2,500至₩3,500不等！

「newmix coffee」仲有賣自家製韓國傳統米菓（오란다），冬甩形狀好特別！另外仲有杯裝嘅蜂蜜餅乾（건빵 크런치）同年糕窩夫（떡와플），睇落全部都好吸引！

Rain Report Croissant_{(레인 리포트 크루아상)}

• 地址：서울 성동구 성수이로16길 32 주3
• 營業時間：11:00 - 22:00（Last Order 21:00）
• 前往方法：聖水站（성수역）3號出口行11分鐘

「Rain Report」係一間最近喺Instagram超多人share過嘅Cafe，最大特色係Cafe出面有個area會落假雨，勁有mood！而裝修就主要行高級型格路線，以黑色同植物為主調，影相一流！

聖水洞呢間分店最出名食酥皮麵包同牛角包，如果大家有機會去記住要試！小編都建議大家早少少去，如果唔係就好難搵位㗎啦！

Nudake Seongsu_{(누데이크 성수)}

• 地址：서울 성동구 성수이로7길 26
• 營業時間：11:00 - 21:00（Last Order 20:45）
• 前往方法：聖水站（성수역）4號出口行6分鐘

「Nudake」係韓國超紅太陽眼鏡牌子Gentle Monster旗下嘅Cafe，只可以話不愧係潮牌，呢度嘅裝修同甜品都超特別，同平時喺普通Cafe見到嘅好唔同！

Nudake最出名嘅係上面嗰款抹茶流心牛角包，最近仲推出咗幾款新甜品，如果你鍾意比較新奇有趣嘅Cafe，好推薦大家去！

想試NUDAKE蛋糕？👇🏻

大林倉庫_{(대림창고)}

• 地址：서울 성동구 성수이로 78
• 營業時間：11:00 - 22:00
• 前往方法：聖水站（성수역）3號出口行6分鐘

「大林倉庫」原本只係一個倉庫，而家改造成現代Cafe，保留過去真實樣貌，呢種工業風格好近現代韓國年青人口味，係呃Like嘅好地方。同時呢度仲係一個畫廊，可以欣賞同買入各種藝術品。

雖然呢度價錢偏貴，不過可以喺咁有feel嘅地方坐低休息，都真係幾正。

Saltbread In Seaside_{(자연도 소금빵)}

• 地址：서울 성동구 연무장길 56-1 1층
• 營業時間：09:00 - 22:00
• 前往方法：聖水站（성수역）3號出口行4分鐘

有留意開韓國流行嘅朋友應該都知道，韓國呢一兩年勁流行食鹽麵包，幾乎每間Cafe而家都有賣！而韓國最出名嘅鹽麵包brand一定唔少得呢間「Saltbread In Seaside（자연도 소금빵）」

呢度嘅鹽麵包外脆內軟，而且勁香牛油味~ 不過要注意呢度冇得堂食，只可以買走。如果大家想食到最新鮮出爐嘅麵包，可以喺09:00、12:30、14:00、15:30、17:00、18:30呢幾個時間去！

Camel Coffee_{(카멜커피)}

• 地址：서울 성동구 성덕정19길 6
• 營業時間：09:00 - 17:00
• 前往方法：聖水站（성수역）3號出口行14分鐘

「Camel Coffee」裝修好特別，有一種復古魅力！

嚟到呢度，推薦大家一定要飲佢哋主打Camel Coffee，真係一試難忘。

Dior Seongsu_{(디올성수)}

• 地址：서울 성동구 연무장5길 7
• 營業時間：11:00 - 20:00
• 前往方法：聖水站（성수역）4號出口行5分鐘

好多香港人嚟韓國玩都會想去位於聖水嘅呢間Dior Cafe朝聖，BTS Jimin、BLACKPINK Jisoo、NewJeans Haerin仲曾經嚟過參加活動，就算唔入去坐，喺出面打卡影相都係一個唔錯嘅選擇！

Naver Map

Cafe入面裝修以花園為主題，四周圍都好有春天氣息！而餐點方面，Menu會不定期更新，雖然餐點價錢偏貴，但仍然人氣不減、超受歡迎！

Onion(어니언 성수점)

• 地址：서울 성동구 아차산로9길 8
• 營業時間：
  • 星期一至五 08:00 - 22:00
  • 星期六及日 09:00 - 22:00
• 前往方法：聖水站（성수역）2號出口行2分鐘

大家都可能有聽過「Onion」呢個大名，原址係1970年代初建，將近50年歲月，曾經係超市、餐廳、維修所或工廠等，每次轉換經營模式，唔需要嘅部分會被拆毀，需要部分就再擴建，令呢度保留歲月痕跡。

「Onion」嘅招牌甜品係Pan d'Or，人氣好高，上面撒上糖粉，就好似一座被白雪覆蓋嘅山，望落好獨特。

Scène_(쎈느)

• 地址：서울 성동구 연무장5길 20
• 營業時間：10:00 - 22:00
• 前往方法：聖水站（성수역）4號出口行5分鐘

以全面超大落地玻璃窗吸引眾人目光嘅「Scène」，有兩層好多位，除咗可以喺室內坐之外，天氣好都可以坐戶外區。

食完甜品之後，記得行埋附近地方，除咗影靚相仲可以欣賞一下老闆嘅藝術品擺設。

GLOW_(글로우)

• 地址：서울 성동구 아차산로9길 8
• 營業時間：星期一至五 09:00 - 22:00、星期六及日 10:00 - 22:00
• 前往方法：聖水站（성수역）2號出口行4分鐘

GLOW就喺Onion隔離，係一間好溫暖嘅Cafe，裝修得好現代，傢俬同配件整體配搭好和諧，令人會愛上呢度嘅氣氛。

喺度嘆住甜品同咖啡，之後嚟坐底休息過返個溫馨下午啦！

Lowide_{(로와이드)}

• 地址：서울 성동구 서울숲2길 22-1
• 營業時間：
  • 星期一至五 10:00-20:00
  • 星期六及日 11:00- 21:00
• 前往方法：纛島站（뚝섬역）8號出口行9分鐘

Lowide係一間喺韓國IG好多人討論嘅Cafe，雖然唔似其他Cafe咁話真係好有特色，不過呢度嘅氛圍同環境夠舒服，係喺忙碌生活當中可以暫時停低休息嘅好去處。

而呢度最出名嘅仲有佢哋嘅麵包同甜品，唔少韓國人同遊客都會專程嚟食！

SEOUL ANGMUSAE_{(서울앵무새)}

• 地址：서울 성동구 서울숲9길 3 B1F
• 營業時間：08:00 - 23:00
• 前往方法：纛島站（뚝섬역）1號出口行4分鐘

SEOUL ANGMUSAE最近成為大熱，因為Cafe入口有一個彩色牆，大家都嚟呢度打卡，呢種風格同店名「앵무새」（鸚鵡）好似。

呢度嘅甜品一樣都係色彩繽紛，打卡好睇之外亦都好好味，另外呢度仲有提供素食菜單，所以素食主義者去到都可以放心食用。

Mat Cha Cha_(맛차차)

• 地址：서울 성동구 서울숲2길 18-11
• 營業時間：11:00 - 19:00（逢星期一及二休息）
• 前往方法：首爾林站（서울숲역）5號出口行9分鐘

如果你係抹茶控，小編推薦大家去呢間「Mat Cha Cha」，喺度可以享受安靜氣氛、度過只屬於自己嘅空間，加埋杯甜忌廉抹茶鮮奶，簡直就係人間天堂。

抹茶鮮奶味道濃郁，好甜好好味，配搭今日甜點，絕對係完美。

Sweden Picnic_{(스웨덴 피크닉)}

• 地址：서울시 성동구 왕십리로5길 9-20 2F
• 營業時間：11:30 - 23:00
• 前往方法：首爾林站（서울숲역）5號出口行4分鐘

Sweden Picnic由首爾林行過去只係需要3分鐘，呢度有種錯覺令人好似去咗野餐咁，如果想同朋友拎吓酒杯傾偈嚟呢度都唔錯。

呢度好闊落，用咗暖黃色去裝修，俾人一種好溫暖同清爽嘅感覺，加上有一個超大嘅窗，有陽光射入嚟更加有去咗野餐嘅感覺。而且所有餐點都係用新鮮食材去整，大家可以食得安心。

Fine Waffle_{(파인와플)}

• 地址：서울 성동구 서울숲4길 16-1
• 營業時間：14:00 - 22:00
• 前往方法：纛島站（뚝섬역）8號出口行5分鐘

Fine Waffle位於首爾林咖啡街，係一間出售各種鬆餅嘅名店，價錢都幾平，只睇店面仲以為去咗一間花店咁。更特別嘅係，呢度仲提供野餐設備，等各位可以方便去首爾林野餐。

大家可以直接喺Fine Waffle外賣鬆餅、飲品，再帶去首爾林野餐！

以上係小編整理好嘅聖水洞、首爾林一帶韓國人最鍾意嘅Cafe，唔知大家最鍾意邊一種風格呢？如果大家會安排行程去聖水，記住睇埋下面呢篇blog啦！

如果有更多想知嘅內容，都可以隨時留言或者dm話俾我哋知：）

✨Instagram：creatrip.hk

🔎Facebook：Creatrip 帶你認識韓國每一面

Mail：help@creatrip.com