2026首爾明洞美食推薦 | 10間明洞必食餐廳及真實探訪記

Hello，大家好，我哋係由韓國人每日提供最新韓國旅行資訊嘅Creatrip。

2026年明洞街頭多咗好多新鋪頭同餐廳，問題就係選擇太多，反而更容易中伏。有啲餐廳喺IG或者Threads度睇落好吸引，實際去到先發現價錢唔平，味道又未必有想像中咁好。

所以今次我哋一班喺韓國住咗平均5年以上嘅小編就以「值得再次幫襯嘅明洞美食」為主題，幫大家整理咗10間必去嘅明洞餐廳，希望可以幫到大家安排行程！

明洞有咩好食？明洞美食推薦懶人包

※本文價錢以2026年5月為準，另外營業時間有機會更改，前往時請再次確認。

※註) ○：適合、△：視乎情況

今次小編按照餐點類型、價錢等因素，幫大家整理咗呢份明洞美食推薦list，無論係大家去韓國玩必食嘅燒肉同醬油蟹，抑或係韓國料理都有，大家可以按照自己喜好，參考以下詳細介紹同實地探訪記，安排明洞行程。

居韓小編團隊最推薦去邊10間餐廳？(2026年最新版)

1. 明洞餃子(명동교자)

明洞1號店

• 地址：서울 중구 명동10길 10
• 營業時間：10:30 - 21:00（Last Order 20:30）
• 前往方法：明洞站（명동역）8號出口行4分鐘

新館明洞站店

• 地址：서울 중구 퇴계로 129
• 營業時間：10:30 - 21:00（Last Order 20:30）
• 前往方法：明洞站（명동역）8號出口行1分鐘

講到明洞最有代表性嘅老字號餐廳，一定唔少得「明洞餃子」。呢間連續多年榮獲《米芝蓮指南》提名嘅刀削麵專門店相當受韓國人同外國人歡迎，基本上飛過一次韓國都應該會食過！

雖然菜式唔多亦都唔花巧，但味道夠經典同大眾化。每次小編屋企人嚟韓國玩嘅時候如果會去到明洞，小編都會帶佢哋去「明洞餃子」。

呢度刀削麵湯底味道濃郁，帶有鮮味同蒜香，但唔會好膩，而且冬天食會即刻變得暖笠笠。另外嚟到小編推薦一定要食佢哋嘅蒸餃，裡面包嘅係豬肉餡，每一粒都超大，皮唔會太厚，幾乎每一檯都會叫；鐘意食辣嘅朋友們亦都可以挑戰食辣拌冷麵！

😋為食小編小貼士：因為呢度刀削麵味道比較大眾化又唔辣，所以如果係一家大細去，或者同行朋友唔食得辣，小編會推薦大家去明洞餃子食返餐！不過正餐時間通常都有好多人排隊，建議避開最繁忙時段！

2. 咸草醬蟹(함초간장게장)

• 地址：서울 중구 명동8가길 27 B1F
• 營業時間：11:30-22:00（Last Order 21:30）
• 前往方法：明洞站（명동역）8號出口行2分鐘

醬油蟹係好多香港朋友嚟韓國都會想試嘅韓國特色美食之一，如果大家行程會比較集中喺明洞，咁就推薦大家去明洞站附近嘅「咸草醬蟹」。

小編上次帶香港朋友嚟食，第一個印象係味道同普通醬油蟹唔太一樣。因為呢度會用到自家調配嘅鹹草醬油去醃蟹，所以食落唔會太鹹或者有腥味，反而更加有層次、比較容易入口。

韓國人食醬油蟹都會先將蟹腳啲蟹肉擠落白飯，然後淋少少醬油上去一啖食；或者直接將白飯放落蟹蓋，撈埋入面啲蟹膏一齊食。推薦大家可以叫埋醬油蝦食，蝦肉爽口之餘非常入味送飯！

😋為食小編小貼士：因為鋪頭喺B1/F，所以小編上次去都唔係好搵到入口係邊。大家記住喺商場前面落樓梯入去，然後認住「咸草醬蟹(함초간장게장)」呢幾個字，跟住指示牌行就會去到！

3. 一片里脊(일편등심)

• 地址：서울 중구 명동10길 18 3F
• 營業時間：12:00-24:00
• 前往方法：明洞站（명동역）8號出口行3分鐘

一片里脊係明洞區行高級路線嘅韓牛燒肉店，如果旅程中想安排一餐食得好啲、環境舒服啲、服務完整啲嘅晚餐，小編會推薦大家嚟「一片里脊」！

餐廳門口有一個大型雪櫃，之後問職員先知道原來呢度會嚴選A++等級韓牛，然後再進行21日低溫熟成先再提供俾客人。

之前同朋友去就叫咗個名牌Set，大約係兩至三人份。最特別係除咗平時食開嘅西冷之外，仲會有幾款特殊部位同韓牛大醬湯飯。全程都會有職員幫手燒，確保所有客人都可以食到最嫩滑最juicy嘅韓牛。

雖然「一片里脊」價錢偏貴，不過無論係服務定餐點品質都有保證，想食韓牛嘅話不妨可以考慮呢度！

😋為食小編小貼士：呢度晚市時段會特別多人，建議大家事先book枱，避免要等成1-2個鐘先入到去食飯！

4. 太初排骨(태초갈비)

• 地址：서울 중구 명동10길 18 6F 601호
• 營業時間：12:00-23:00
• 前往方法：明洞站（명동역）8號出口行3分鐘

想食燒肉嘅話，另一間小編可以推薦俾大家嘅餐廳係「太初排骨」！如果話上面介紹嘅「一片里脊」係行高級熟成韓牛燒肉路線，「太初排骨」主打嘅就係超誇張嘅碳燒原條韓牛牛仔骨！

「太初排骨」嘅韓牛套餐都會包括牛仔骨，新鮮juicy得嚟夠惹味。而且職員全部都好熟手，包你可以食到熟度最完美嘅牛肉！呢度仲有各種主食，想試韓式料理都可以一次過食埋。

而家透過Creatrip預約，填寫評論之後仲可以免費得到一份五花肉，可以令呢餐變得更豐富滿足！

😋為食小編小貼士：「太初排骨」第一次落單時必須叫套餐，可以之後再加幾份肉、排骨或者主食！另外弘大都有分店，大家如果有機會去弘大都可以去食！

5. Bbandak Bbandak辣炒雞(빤닭빤닭닭갈비)

• 地址：서울 중구 명동4길 46 2F
• 營業時間：10:30-23:00
• 前往方法：明洞站（명동역）6號出口行2分鐘

Bbandak Bbandak辣炒雞同樣位於明洞站附近，之前上過唔少韓國本地電視台嘅節目。呢度顧名思義招牌菜係辣炒雞，不過亦都有提供一隻雞同炸雞等其他雞肉料理，選擇夠多，適合一班人叫嚟share。

餐廳環境乾淨企理，氣氛幾舒服又夠chill。落單可以用枱面嘅平板電腦就得，就算唔識韓文都唔洗擔心溝通唔到。

小編最推薦嘅係芝士辣炒雞排，鐵板一半係微辣辣炒雞排，另一半就鋪上韓國產天然芝士，賣相好震撼。而且因為用嘅係雞髀肉，所以特別嫩滑多汁。除咗可以點芝士食，推薦大家可以挑戰用醃蘿蔔片包住食，食落會更加清新。

😋為食小編小貼士：原味都有少少辣，如果唔食得辣嘅話推薦揀醬油味或者忌廉玫瑰醬味！

6. 君子大韓烤腸 明洞店(군자대한곱창 명동점)

• 地址：서울 중구 명동 7길 18-1
• 營業時間：11:00 - 01:40
• 前往方法：明洞站（명동역）8號出口行5分鐘

自從MAMAMOO成員華莎喺韓綜《我獨自生活》食烤腸食到舔舔脷之後，「君子大韓烤腸」爆紅，越開越多分店，而家喺全韓國有成60幾間，而喺大家經常去嘅明洞都有！

大韓烤腸套餐係「君子大韓烤腸」主打Menu之一，裏面有牛小腸、雪花大腸、牛皺胃、牛肚、牛心等，職員會一直幫手燒，大家只要等食就可以，烤腸勁香口，送酒一流。

😋為食小編小貼士：韓國人食完燒肉或者烤腸之後都會叫多個炒飯，呢度炒飯更加會吸收曬烤腸精華，推薦大家一定要叫！

7. 以南場(이남장)

• 地址：서울 중구 명동9길 39
• 營業時間：08:30-22:00
• 前往方法：乙支路入口站（을지로입구역）5號出口行3分鐘

如果住宿位於明洞，朝早想食個早餐先再開始一日行程，推薦大家可以去「以南場」食碗暖笠笠嘅雪濃湯！雪濃湯其實就係用牛骨熬製而成嘅奶白色湯品，而「以南場」嘅雪濃湯以傳統配方熬足46個鐘，係韓國其中一間出名嘅雪濃湯專門店。

之前同朋友去分別叫咗普通雪濃湯同特雪濃湯，普通版其實都已經有唔少肉，但特雪濃湯會有三款牛肉（牛腩、牛舌、牛肩腹肉），價錢就相差6,000~7,000韓幣左右。

枱面有鹽、葱同胡椒，可以按照個人口味加落湯入面。到中途想轉口味都可以加少少辣辣地嘅調味醬。小編同朋友一致認為唔加調味醬嘅原味版比較好食，清淡得嚟夠暖胃，而且肉分量都好多，朝早食完夠滿足！

😋為食小編小貼士：韓國雪濃湯通常都要自己加鹽同胡椒調味，建議大家先試一啖原味再慢慢加，以免太鹹或者太淡。另外飯、麵同小菜都可以喺自助區任添！

8. 瑞源粥店(서원죽집)

• 地址：서울 중구 퇴계로 141 B1F
• 營業時間：
• • 星期一至六 07:00-16:30
  • 星期日 07:00-14:00
• 前往方法：明洞站（명동역）9號出口一出就會見到

另一間好啱當早餐食，或者覺得連續幾日都食太多重口味嘅韓國料理，想食得清淡少少嘅時候推薦大家可以去嘅餐廳係「瑞源粥店」！呢間傳統韓國粥專門店上過唔少電視美食節目，由1986年屹立至今！

呢度雖然有好多款韓國粥，但最受歡迎嘅一定係鮑魚粥！因為係用最頂級鮑魚，完全唔會韌。而且大家見到粥底青青地色，係因為用咗鮑魚內臟去煮，唔需要另外調味，齋食都好好味。另外蝦仁粥同蘑菇粥都好食，唔鍾意鮑魚嘅話都冇問題！

而配菜方面小編最推薦大家試紅色嘅醃魷魚，辣辣地夠鹹香，好多人都會另外買返屋企送飯食。而餐廳都好貼心咁會用保溫袋幫大家封好，就算要放落行李都得。

😋為食小編小貼士：呢度朝早7點就會開門，大家可以去食早餐；但要注意星期日只會開到下晝2點！

9. Isaac Toast(이삭토스트)

• 明洞聖堂店地址：서울 중구 명동10길 17-1
• 營業時間：07:00-20:00
• 前往方法：明洞站（명동역）8號出口行3分鐘

Isaac Toast可以話係無人不知嘅韓國小食之一，而小編自己以前去明洞都會去明洞聖堂店買一份食。一出明洞站8號出口就會見到有條巷仔，入去之後大約行3分鐘就會到。

餐牌上面有齊中英文，而且落單直接用英文講號碼店員都會聽得明，唔識韓文都可以輕鬆叫嚟食。

小編平時會食最基本嘅火腿芝士薯餅多士，但之前跟朋友叫咗個煙肉薯餅Pizza多士，入面有雞蛋、粟米、水牛芝士、車打芝士、薯餅、煙肉、醃青瓜同Isaac Toast特製醬汁，鹹鹹甜甜之餘口感多層次。

不過要注意因為呢種多士三文治唔會幫你切，如果有需要可以喺收銀前面拎把即棄膠刀切開，可以同朋友share之餘唔洗咁狼狽。另外可以透過Creatrip預先落單，出發前叫定就唔洗專登去排隊等，更加有效率。

😋為食小編小貼士：因為呢間分店只係做外賣生意，所以大家買完之後可以企側邊食，邊行邊食，或者買上酒店住宿食都得！

10. 小雞紫菜飯捲(병아리김밥)

• 地址：서울 중구 명동10길 19-3 B1F
• 營業時間：09:00-21:00
• 前往方法：明洞站（명동역）8號出口行3分鐘

呢間裝修以小雞做主題嘅餐廳其實係一間街邊小食專門店，專賣辣炒年糕、紫菜飯捲、腐皮壽司等等。

如果你當日行程好趕，或者想買嘢食返酒店做宵夜，都好推薦大家嚟。呢度紫菜飯捲同腐皮壽司選擇多，如果有選擇困難就可以直接叫set。小編自己就鍾意叫幾件紫菜飯捲再加辣炒年糕同魚糕湯，將飯捲點落辣炒年糕醬汁之後食會更加惹味！

😋為食小編小貼士：鋪頭入面有自助點餐機，不過就只可以用信用卡俾錢，想用現金嘅話就記住直接去收銀處叫嘢食啦！

去明洞餐廳前有咩要注意？

明洞係外國遊客好多嘅區域，所以有唔少鋪頭都可以用英文（甚至係中文）溝通，不過大家仍然要注意以下幾樣嘢：

□ 付款方法

明洞一帶大部分食肆都可以用信用卡（推薦VISA、Mastercard）付款。不過，好似街邊檔呢類地方有時只收現金，所以建議帶定大約2至3萬韓幣現金。

□ 服務語言

因為呢區遊客多，好多餐廳都有中英韓對照餐牌，而且簡單英文都可以溝通到，用手指指住落單就可以！

□ 餐廳預約

如果係下晝3點至5點左右呢啲比較清閒嘅時段，好多時唔使預約都入到去，但因為明洞係好多外國遊客嘅地區，所以基本上全日好多人。所以好似燒肉同醬油蟹餐廳等人氣餐廳建議要預先訂位。透過Creatrip就可以用繁體中文訂枱，仲會有獨家折扣或者送飲品/餐點等優惠，記住唔好錯過！

明洞美食常見問題FAQ

| Q1. 喺明洞餐廳消費可唔可以用信用卡？

A：大部分餐廳都可以用Visa、Mastercard、JCB。不過有啲街邊檔之類可能只收現金，所以建議帶定幾萬韓幣現金旁身。

| Q2. 明洞有冇可以一個人食飯嘅餐廳？

A：有，以南場、ISAAC TOAST、小雞紫菜飯捲、明洞餃子都屬於相對容易一個人去食嘅類型；韓牛燒肉、辣炒雞等餐點通常都需要由2人份開始叫，唔太推薦自己一個旅行嘅時候去食。

| Q3. 明洞早餐有咩推薦？

A：如果想簡單食會推薦ISAAC TOAST；如果想食得清淡暖胃，可以考慮瑞源粥店或者以南場雪濃湯。

| Q4. 明洞有冇唔辣但好食嘅韓國料理？

A：有，推薦去明洞餃子、以南場、瑞源粥店、一片里脊，呢幾間餐廳都有提供唔辣餐點，就算唔食得辣都可以享受韓國美食。

| Q5. 明洞燒肉推薦邊幾間？

A：如果想食高級韓牛，可以揀一片里脊；如果偏好厚切、賣相同味道俱全嘅燒肉，太初排骨會更啱你。

| Q6. 想食更有韓國特色嘅料理，應該揀邊幾間？

A：咸草醬蟹、Bbandak Bbandak辣炒雞、君子大韓烤腸都係幾有韓國特色、而且風格分明嘅選擇！

| Q7. 明洞嘅美食店入面，有冇啲帶住小朋友都容易入去食嘅舖頭？

A：以南場同Bbandak Bbandak辣炒雞座位都比較闊落，對家庭客嚟講算幾方便。至於高級韓牛店，因為環境通常比較安靜同偏正式，如果帶住年紀比較細嘅小朋友，未必會係最理想嘅選擇。

| Q8. 一個人去燒肉店會唔會被拒絕？

A： 唔一定，不過要視乎餐廳規定同繁忙時間而定。明洞部分燒肉店會要求最少點2人份，所以就算可以一個人入座，都有機會要點兩份肉先可以用餐；亦有啲店因為座位安排或者晚市太多人，會優先安排2位或以上客人。如果有一間餐廳你好想去，但怕唔接受一個人去，建議事先透過官網渠道查詢。

本文內容由居韓編輯團隊根據2026年5月基準資訊、實際探訪經驗以及Creatrip平台內預約資料及用戶評價整理而成；餐廳營業時間、價格同優惠有機會因店舖安排而有所變動，出發前建議再次確認最新資訊。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！