Hello，大家好，我哋係由韓國人每日提供最新韓國旅行資訊嘅Creatrip。
韓劇同韓國電影喺香港熱播之後，唔少朋友可能都留意到戲入面成日都會做有關婆媳問題嘅劇情。新抱被為難嘅場面，就好似同全天下女性講：「唔好結婚」咁。究竟現實生活入面，韓國嘅婆媳問題係咪真係好似韓劇一樣唔好呢？今日就要同大家講呢啲真相啦！
韓國婆媳俚語
SBS《快樂姊妹》
韓國有一句：「시월드에 오신 것을 환영합니다」，意思就係「歡迎嚟到婆家世界」。好多韓劇都有出現시월드（婆家世界），由시（婆家）加上월드（世界）合成，意思係指女性婚後喺婆家受到嘅精神、肉體傷害，總之就係個有負面意思嘅詞彙。
韓國都有人話，只要有시嘅字都唔係好嘢，甚至有人講笑話，佢哋應該連시금치（菠菜）都唔鍾意。其實，韓國最常點新抱做嘢嘅唔係奶奶，而係仲喺婆家住緊嘅姑仔、叔仔，呢啲人會令新抱倍感壓力。
因為比起鬧人嘅奶奶，其他婆家未出嫁嘅女性反而更令人唔自在。韓文仲有個諺語話「比起打人嘅奶奶，阻止嘅姑仔更令人討厭」。
韓國仲有另一句諺語，係關於婆家生活：啞三年、聾三年、盲三年。意思即係即使婆家做咗咩反感行為，都要好似盲咗咁扮睇唔到；聽到對方「哦」你，都要好似聾嘅一樣聽唔到；被鬧或被干涉，都要好似啞嘅一樣唔可以回嘴。三年後，就會被訓練到應對自如，就咁聽落係咪好不可思議呢？
韓國婆媳問題案例
導致韓國夫妻離婚嘅一個主要原因，就係婆家問題。比起同老公鬧交，無法容忍婆家生活嘅人更多。畢竟對多數韓國人嚟講，婚姻唔係兩個人嘅事，而係兩個家庭。小編舉一哦韓國嘅真實案例同大家解釋。
奶奶責備新抱冇準備早餐
多數奶奶比較傳統，當佢哋問新抱「食咗早餐未？今日食咗咩啊？」並唔係真係想知先問，而係想睇下新抱有冇好似自己當年一樣，早起為老公同小朋友準備早餐。似乎好多奶奶都仲未習慣呢個世代嘅生活。
有啲奶奶唔鍾意女強人新抱
有啲比較傳統嘅奶奶，對身為上班族又比自己個仔賺得多嘅新抱講「反正之後都要辭職，點解要因為工作疏忽家務？」，或者「唔可以因為妳比我個仔想搵錢，就想喺屋企大晒，令佢冇尊嚴」。
雖然好不可理喻，但呢啲係韓國確實發生過嘅事，要呢啲責備、打壓消失，大概就只可以好似奶奶所講，辭職或者轉工。不過有唔少案例話，新抱辭咗職，奶奶比更多說話佢哋聽，認為佢一味洗個仔嘅辛苦錢。
睇唔起新抱嘅奶奶
如果新抱有咩唔識嘅地方，有啲奶奶會話「你連呢個都唔知？」，但反之如果新抱識得多，婆婆又會寸「好叻喎」、「依家你要教我點做？」之類嘅話。
永遠無法接納媳婦嘅奶奶
即使新抱為婆家付出好多努力，有啲奶奶就一啲都唔心領。如果係新抱想帶奶奶去食飯，仲會被鬧「我話妳方便就好，有話要喺出面食咩？」，或者「你哋屋企咁有錢真係好」、「我個仔咁辛苦搵錢，竟然咁奢洗係啲咁嘅地方？」。
唔生小朋友嘅新抱
如果結婚之後冇生育計畫，奶奶就會係咁催新抱快啲生。有時明明係男方問題，怪罪落新抱到嘅奶奶都唔少。
中秋、新年等大節日
婆媳問題去到最高峰嘅時間，就為韓國人最重要嘅新年同中秋。返到男方屋企準備祭祀，通常就係奶奶同新抱負責，其他男性就會喺一邊玩，未出嫁嘅姑仔都順理成章唔洗入廚房。
如果老公想幫手，有啲奶奶仲會話「呢啲嘢叫你做咩，我嚟就得」，新抱聽到就要即刻起身幫手。所以對好多韓國女性嚟講，中秋、新年呢類節日前後可以會有啲「都市痛」（頭痛、肚痛之類），甚至離婚率會短暫升高。照法院資料，重要節日後申請離婚調解嘅案件數量比平時多兩倍。
韓國婆媳問題嘅原因
婆媳問題最大原因，就係韓國倫理入面，奶奶為上，新抱為下。而且好多奶奶做新抱個陣都係咁被對待，佢哋認為咁對自己新抱，佢哋都要吞聲忍氣，冇意識到女權意識已經抬頭，新抱都係人哋個女。不過當世代之間嘅價值觀差異，加諸喺奶奶同新抱關係上面，就似乎更難以避免兩者嘅衝突。
好多奶奶甚至會覺得「好唔容易將個仔養大，就被新抱搶走」嘅諗法，而且韓國男尊女卑嘅傳統概念，令媽媽覺得生「仔」係令自己得到社會承認嘅手段之一。
因為韓國深受儒家影響，相當重視能夠傳宗接代嘅男性。韓國傳統社會入面，比起女，更想新抱生仔，唔只新抱冇面，更令已經成為奶奶嘅自己可以繼續被承認。
直到依家，仲有好多新抱喺網上抱怨奶奶，話自己生咗個女，奶奶只話辛苦啦，但其他新抱生仔，奶奶就包咗封大利是。雖然呢種思想逐漸消失緊，但喺鄉下地區，或者比較傳統嘅人心中，仍然有「生仔」先會「被重視」嘅執念。所以，好多奶奶對「搶走個仔」嘅新抱懷有敵意。
韓國婆媳關係正在緩和
如同前面同大家講到，依家嘅韓國婆媳問題已經冇好似以前咁誇張。女性意識抬頭，好多女性都唔會死忍，畢竟男女平等，已經冇咗嗰種「新抱先要做嘅諗法」。甚至有好多奶奶反而會睇新抱面色，怕別人話係「點人做嘢嘅惡奶奶」，加上好多奶奶會同個仔一齊住，幫手湊孫，變得親力親為，相當親切。
比起婆媳兩人爭吵，丈夫夾喺中間更加難受，雖然通常只要丈夫強硬阻止一方，就可以結束，但夾喺中間又的確好難做。因此多數韓國男性會揀咩都嗰講、咩都唔解決，韓劇入面嗰種咩都唔問嘅丈夫，可以話係真實存在。畢竟不論對阿媽講「媽，妳對ㅇㅇ太過分」，定對老婆講「ㅇㅇ呀，妳忍下啦」都好似唔太好。
婆媳問題反面，就係越嚟越多男性提出「丈婿問題」，意思就係丈夫同娘家嘅接觸越嚟越頻繁，而衍生出嚟嘅問題。好多岳母會關心自己個女嫁去人哋到，會重演自己當年被奶奶鬧嘅生活，所以會有意無意咁干涉女婿好多嘢。
韓國有句俗語話「百年客人」，意指女婿就係永遠嘅客人，唔可以向佢要求太多，但最近似乎呢句說話慢慢消失緊！
小編個人覺得，婆媳問題大概最多只會發生喺現今二十代後半嘅結婚女性，過咗呢個分水嶺，因觀念唔同而衍生嘅婆媳問題應該就會消失。
多數20、30代韓國女性認為自己所處嘅世代，係一個過渡期，就算自己因為婆媳關係感到痛苦，但會希望自己嘅下一代唔洗承受呢種苦楚。有啲人會選擇吞聲忍氣，但都有人會企出嚟對抗。
今日嘅韓國文化大家睇得開唔開心呢？比起過去嘅生活，依家真係好咗好多。雖然韓劇入面唔少都係誇大咗嘅對白，但小編身邊已婚嘅朋友，唔少偶爾都會同我抱怨婆婆點……令小編都有少少怕咗結婚，哈哈。
大家有咩諗法，不妨留言同我哋討論下啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
