Hello，大家好，我哋係由韓國人每日提供最新韓國旅行資訊嘅Creatrip。
去韓國旅行好買又好玩，好多人都會抱住「難得嚟一次，洗多少少都冇所謂」嘅心態，一不小心就碌多咗卡。不過其實有好多位，只要出發前做多少少準備，就已經可以幫你慳返唔少。
到底韓國旅行點樣玩先最抵？根據居韓小編住喺韓國咁耐+以前成日飛韓國嘅經驗，今次幫大家整理咗10個實用嘅慳錢秘笈，由買機票、換錢，到離開韓國前一秒都可以慳到最盡，等你今次旅程可以玩得更開心！
韓國旅行慳錢攻略
1. 韓國機票幾時買最平？
・越早買通常會越平
・避開韓國公眾假期（因為韓國人都會去旅行，機票更貴！）
由香港飛韓國一向都幾方便，首爾、釜山、濟州都有唔少航班選擇。想慳機票錢嘅話除咗要喺機票格價網站比較各大航空公司機票價錢，早啲訂同埋避開韓國旅遊旺季同公眾假期都係一個慳錢方法。
如果你一早已經決定出發日期，越早買機票價錢通常會越靚，就近出發日先訂嘅話機票會突然變貴。如果你想買嘅時段係熱門時段，就更加需要提早買，可以順便避免發生賣曬冇位嘅問題。
另外就算香港假期未必特別貴，一撞正韓國公眾假期、聖誕、新年，甚至週末連假，當地機票價錢都好容易一齊升，整體旅行預算自然就會變高。
如果時間安排上可以比較有彈性，建議避開以下時段：
- 韓國農曆新年連假（通常會放年三十、初一、初二）
- 韓國中秋連假
- 聖誕節、除夕、元旦（1月1號）前後
- 5月同10月嘅韓國連假旺季
特別係新年同中秋連假好多韓國鋪頭都會休息，可能會影響到行程安排！不過如果真係一定要喺旺季出發，咁就更加要提早比較唔同航空公司、出發時段同寄艙條件。有時早機、夜機，或者平日出發/返程，都可以同熱門時段差一截價錢，買機票前不妨參考以下有關2026年韓國公眾假期嘅文章！
[블로그] 2026年韓國&香港公眾假期總整理
2. 換韓幣現金定直接碌卡會比較抵？
・如果信用卡海外簽賬回贈高、手續費低 → 直接碌卡更方便
・韓國碌卡時記住揀用韓幣付款，避免要俾多筆匯率差價
・建議換定少少現金以備不時之需
去韓國旅行，唔少人都會煩惱到底應該帶多啲現金去換韓幣，定係直接喺韓國碌卡好。其實冇一個方法適合所有人，重點係要睇返你自己張卡嘅條件同當時匯率。
大家出發前可以先比較幾樣嘢：
- 明洞大使館等人氣找換店匯率（撳我睇Creatrip即時匯率）
- 信用卡海外簽賬手續費、外幣消費回贈
- 自己大概需要用到幾多現金
如果你張卡本身海外簽賬回贈高、手續費又唔算高，咁部分消費直接碌卡可能更方便；但如果張卡手續費比較貴，咁換少少韓幣現金旁身會比較穩陣。
另外大家喺韓國碌卡嘅時候，如果遇上叫你揀用咩貨幣嘅情況，記住一定要揀用韓幣付款。如果唔係就有機會遇上 DCC（動態貨幣轉換），變相要俾多筆匯差。
如果大家已經有計劃飛韓國旅行，但見到而家匯率靚，怕之後又跌咗會蝕咗筆錢，可以事先透過Creatrip預約仁川機場換錢服務，會直接用預約當日嘅匯率幫你換錢，去到仁川機場之後帶同港幣現金去換就得。
[스팟] 仁川機場外幣→韓幣換錢服務（送BELLYGOM聯名交通卡）
3. 住宿要揀邊度先唔貴又夠方便？
・住旺區隔離一兩個站隨時更抵
・留意住宿附近有冇地鐵站、機場巴士站等等
・如果會喺韓國留一段長時間，建議考慮預約服務式公寓
第一次去首爾好多人都會想住明洞、弘大、東大門，因為夠方便同熱鬧。不過呢啲地區同時亦係住宿價錢最容易浮動嘅地方，尤其旺季、weekend或者臨近地鐵出口嘅酒店，價錢通常都唔平。
如果想控制住宿預算，其實唔一定要住正核心地段。有時住喺主要地區隔離一兩個站，只要交通唔差、附近生活機能齊全，整體住宿體驗未必輸蝕，房價仲可能平一截。
有啲住宿睇落好似平，但落機後要轉幾程車、又要拉住行李行斜路上樓梯，最後未必真係最抵。根據小編經驗，揀住宿時最好揀符合以下條件嘅地方：
- 行路去地鐵站時間最好控制喺10分鐘內
- 睇清楚係咪真係方便拖行李（多唔多斜路）
- 附近有冇機場巴士/機場快綫站等等
如果會留喺韓國一段長時間，可以考慮預約服務式公寓！最近好多人都會喺韓國住返一兩個月旅居，體驗本地生活，呢個時候比起book酒店或者租屋，服務式公寓配套更加齊全，而且唔需要俾一大筆保證金。
大家而家可以透過Creatrip用繁體中文同港幣直接預約高質服務式公寓，可以根據自己活動範圍同預算揀：
[스팟] 韓國短期住宿 | Come&Stay 江西
[스팟] 韓國短期住宿 | Weave Suites 仙遊島Sunyu Parkside
[스팟] 韓國短期住宿 | Weave Place 江南站
[스팟] 韓國短期住宿 | 東大門 Weave Studios Dongdaemun East
[스팟] 韓國短期住宿 | WECO STAY 明洞
[스팟] 韓國短期住宿 | WECO STAY 仁寺洞
4. 點可以用更抵價錢預約更多韓國體驗？
・訂閲Creatrip尊貴會員制可享50%折扣等專屬禮遇
・加購Creatrip Care後就算臨時去唔到都可以退返60%
尊貴會員制專屬價錢
如果你去韓國前已經打算預約幾樣嘢，例如醫美、接送、體驗、一日遊、門票或者餐廳，咁就可以留意各大平台會員優惠同額外保障方案。而我哋Creatrip而家推出咗尊貴會員制，等大家去韓國有更抵、更聰明嘅選擇。
訂閱Creatrip尊貴會員制就可以得到最高50%專屬優惠，填寫評論同旅韓遊記仲可以得到雙倍積分回贈！對淨係買一樣產品嘅人，感受可能未必好明顯；但如果你會預約多個項目，通常會更容易回本。
[블로그] Creatrip尊貴會員制獨享禮遇
Creatrip Care
去旅行好多時真係估唔到，可能航班延誤、身體唔舒服、天氣變差，或者原本計劃去到最後改咗行程，Creatrip Care就特別適合怕行程有變嘅旅客！預約時如果有加購Creatrip Care，就算已經過咗可以申請退款嘅日期，臨時去唔到都仲可以拎返部分退款，唔洗擔心會蝕咗筆錢。
5. 機場去首爾市區搭咩車最慳最方便？
・需要視乎你住嘅地方附近有咩公共交通工具站
・一大班人一齊去建議預約機場接送包車服務
仁川機場去首爾市區嘅方法好多，包括機場巴士、AREX、地鐵、的士，甚至機場接送服務，車票價錢/車費如下：
機場交通 | 價錢 |
機場巴士 | ₩17,000~18,000 (17000~18000) |
AREX機場快綫(直通車) ※只停仁川機場T1、T2及首爾站 | 仁川機場T1→首爾站 ₩11,600 (11600) |
機場鐵路(站站停) ※停靠金浦機場、弘大入口站等 | 仁川機場T1→首爾站 ₩4,750 (4750) |
的士 | 仁川機場T1→首爾站 ₩53,590 (53950) |
機場接送服務 | ₩97,750起 (97750起) |
※上述金額為2026年3月更新，實際請按現場價錢為準
就咁睇價錢好似站站停嘅機場鐵路最平，但因為由出發到尾站需要接近70分鐘，計埋時間未必咁有效率。加上揀搭咩車仲要考慮住宿地點，如果搭地鐵要不斷轉車，或者需要爬上爬落，咁可能機場巴士甚至係的士會更加方便同抵搭。
所以book住宿嘅時候記住睇清楚附近有咩公共交通工具站，如果住宿附近有機場巴士站，咁就當然搭機場巴士比較抵（唔需要轉其他交通工具或者住行李周圍走）；如果住宿附近有機場快綫站或者1號線、4號線地鐵站，就可以揀搭機場快綫/機場鐵路。
但如果你係一大班friend一齊去、一家大細同行、帶住大件行李、BB車或者長輩，甚或乎係凌晨到韓國，未有公共交通工具可以搭住，咁就推薦大家預約機場接送服務。人多時平均分攤返車費之後，其實未必真係貴好多，甚至有時比起機場鐵路再轉地鐵、再拖行李行一段路更加實際！
6. 一定要買交通卡？氣候同行卡真係會抵啲？
・用韓國交通卡搭車會有折扣同轉乘優惠
・如果主要喺首爾活動，會經常搭地鐵/巴士，推薦買氣候同行卡短期乘車券
・交通卡同氣候同行卡都可以喺便利店同地鐵站買到
喺韓國如果會以公共交通工具代步，記住要買定T-Money、Cashbee等交通卡，可以唔洗摷散子之餘，用交通卡搭車會平過買單程地鐵車飛，而且轉乘巴士或者換路線轉乘亦會有優惠。
另外如果唔小心搭錯方向，出閘後15分鐘內喺同一車站出閘再入閘都唔會扣多筆錢。
如果你今次主要喺首爾市區活動，而且一日之內會搭好多次地鐵同巴士，咁大家值得考慮買氣候同行卡（Climate Card）！氣候同行卡係一張無限地鐵巴士乘車券，喺指定日數內可以無限搭地鐵、巴士，甚至係租借共享單車，而家仲有推出短期乘車券，啱曬嚟韓國玩嘅朋友們！
短期乘車券選項及價錢 | |
1日券 | ₩5,000 (5000) |
2日券 | ₩8,000 (8000) |
3日券 | ₩10,000 (10000) |
5日券 | ₩15,000 (15000) |
7日券 | ₩20,000 (20000) |
而家大家仲可以用海外信用卡（Visa、Mastercard）喺指定自助售票機器幫交通卡/氣候同行卡充值，更加方便！
[블로그] 韓國交通卡總整理
[블로그] 首爾無限地鐵巴士乘車券「氣候同行卡/Climate Card」
7. 2026最新韓國退稅制度點先最抵玩？
・認住Tax Refund標示，消費滿₩15,000就可以進行退稅
・參加Creatrip醫美積分回贈活動即賺最多15%積分！
退稅一直都係韓國旅行最基本嘅慳錢方法之一。一般喺參與退稅嘅商店購物，而家只要消費滿₩15,000，旅客持護照就可以辦理退稅。所以去買美妝、服飾、手信或者部分生活雜貨時，記得留意店內有冇Tax Refund標示。
[블로그] 韓國退稅總整理
如果你本身係為咗做醫美先去韓國，就一定要留意最新變動。由2026年1月1日起，韓國醫美退稅制度正式結束，喺韓國做醫美、牙科療程等美容項目就冇得再退稅啦！
不過唔需要擔心，Creatrip為咗幫大家可以賺得更多、可以用更少錢玩得更盡興，推出醫美積分回贈活動！Creatrip網站集合咗幾十間首爾、釜山口碑好嘅醫美、牙科診所同韓醫院，你喺醫美診所消費幾多，我哋就會回贈返最多15%，等大家冇退稅都可以慳番一筆。
重點係可以同時享用診所現場優惠價，回贈積分更加可以用嚟預約韓國一日遊、韓服體驗、照相館、機場接送、餐廳訂位、DIY工作坊等等，直接幫你補貼旅費！
💡小編小貼士：訂閲尊貴會員制可以得到15%積分回贈，變相85折就做到高質醫美療程！
即刻撳下面張圖睇吓邊間醫美診所適用啦👇🏻
8. 首爾有咩景點可以免費入場？
・推薦景點：清溪川、漢江公園、天空公園、首爾林等
・逢星期三係文化之日，可以免費入場部分宮殿同用優惠價買展覽館、電影門票等
去首爾玩，唔係一定日日都要買門票去玩先玩得盡興。如果想慳旅費，其實可以將樂天世界、南山塔等收費景點集中安排喺一兩日，其餘時間多啲去免費景點，一樣可以玩得好充實。
小編喺韓國住咗咁耐都有幾個最鍾意嘅景點，而且因為韓國春夏秋冬風景都非常唔同，大家可以參考以下呢個表安排行程！
春天 (櫻花季) | 南山公園 韓屋村 石村湖 |
夏天 | 漢江公園噴泉匯演 清溪川 弘大街頭表演區 |
秋天 (紅葉季) | 天空公園 清溪川 首爾林 奧林匹克公園 |
冬天 | 清溪川冬季燈飾 北村韓屋村 首爾廣場 明洞、光化門聖誕燈飾/市集 |
另外韓國本身每個月最後一個星期三係文化之日，由2026年4月開始擴展至每個星期三！文化之日部分宮殿可免費入場，亦都有部分博物館、展覽廳、話劇/音樂劇門票可以用優惠價購買，大家可以出發前去官方頁面確認相關資訊！
💡小編小貼士：著韓服去景福宮等傳統宮殿都可以唔洗買飛免費入場，如果想順便去影靚相推薦大家可以租埋韓服！
9. 外國人都可以下載店鋪優惠券？
・Creatrip提供各大餐廳、Cafe、商店獨家優惠券，出發前記住要搵清楚！
想慳到盡，除咗退稅，仲可以參考Creatrip網站提供嘅優惠券，由折扣、送餐贈品直到消費時嘅額外回贈，都可以喺Creatrip網站搵到！
10. 各大韓國品牌幾時會搞優惠/促銷？
・韓國便利店寫嘅1+1、2+1就等於買一送一、買二送一
・大型超市閂門前生鮮同熟食會減價
・Olive Young等連鎖店會定期舉辦優惠活動，記住mark低！
- 便利店經常有 1+1、2+1優惠
- 大型超市臨近關門前，熟食、生鮮有時會減價
- Olive Young、連鎖美妝店同服飾品牌會舉辦大減價活動
- 部分品牌有會員價、套裝價或者加送小樣活動
[블로그] Olive Young優惠總整理
以上係小編整理出嚟嘅10個韓國省錢旅遊方法，俾大家參考，希望可以令你哋嘅行程更順利、更抵玩！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
