韓國中秋飲食文化
韓國中秋節到底食啲咩？同想像中完全唔同嘅韓國中秋文化
Hello，大家好，我哋係由韓國人每日提供最新韓國旅行資訊嘅Creatrip。
韓國最大嘅節日「中秋節」，喺傳統韓文入面又叫做「한가위」，意思係農曆八月嘅滿月，亦都有「喺秋天入面月亮最靚嘅一日」、「月亮又圓又光嘅好節日」等嘅意義。小編今日就要介紹韓國中秋節嘅食物，其實有好多都係大家估唔到㗎，快啲來睇下啦！
韓國中秋食物
松片/松糕/松餅（송편）
華人社會普遍喺中秋節會食月餅，象徵團圓嘅意思。不過韓國人就唔係食月餅，韓國中秋節嘅代表食物就係「松餅（송편）」。將麵粉攪拌成為麵團之後，搓成圓形，喺入面塞啲芝麻、花生、栗子內餡，整成半月嘅形狀，再擺松葉做襯底蒸熟嘅糕餅。
好多人會喺麵粉入面加入蔬菜汁，等麵皮轉換成可愛啲嘅顏色，從而做出靚靚嘅松餅。
但係點解松餅係半月形嘅呢？因為韓國係以農業起家，佢哋認為代表陰曆嘅月亮係最重要嘅，而滿月形狀嘅餡，包入皮入面之後，折起就會變成半月形。咁就令松餅包含咗月亮形狀變化嘅意義。
另外都有個講法，就係只要韓國女仔識搓出靚嘅松餅，大個之後就可以嫁個好人家。所以屋企有女仔嘅韓國家庭，喺個女仔生性之後，每年都會叫佢練習下搓松餅，等佢之後可以搵到個好歸宿。
煎餅
韓國人喺中秋節祭祀嘅時候，檯上面一定會擺煎餅。除咗常見嘅豬肉煎餅之外，仲有其他口味好似辣椒、蛋煎什錦串、明太子、牛肉、南瓜煎餅等等，真係講起都流曬口水啊。
煎餅嘅種類每個家庭都會有少少唔同，但基本上每個屋企都會做明太子煎餅、牛肉煎餅、蛋煎什錦串、肉煎餅等等，呢啲可以話係中秋飲食嘅必備款式。
韓國煎餅嘅製作方式一啲都唔簡單，首先要將蛋液倒入麵粉入面慢慢攪勻，跟住就均勻咁倒入平底鑊，記住要用細火慢慢剪成金黃色，如果一次過整太多煎餅，陣油膱味分分鐘會令人作嘔。
正正因為製作煎餅好晒工夫，所以都有唔少韓國人會直接去市場買就算。
祭祀咗祖先之後，就係成個家族一齊食飯嘅時間，同傳統華人社會好相似，大家聚埋一齊傾下計、重新感受難得見一次面嘅家族情懷。
炒粉絲
韓國喺大時大節嘅時候，絕對唔少得嘅食物之一就係雜菜（잡채）。將韓式粉絲煮熟之後加入菠菜、紅蘿蔔、菇、洋蔥或者肉類一齊撈混，係一種好傳統嘅韓式麵類料理。
大時大節同婚宴喜慶都唔少得嘅雜菜，其實唔止重要時刻會食，有時候小編同朋友聚餐，喺啲傳統嘅餐廳或者布帳馬車到，都會嗌呢款雜菜來食，味道真係相當之唔錯（都幾餸飯）。
不過大家知唔知？雜菜睇落好似幾健康，其實超級高熱量，好多家庭都會警告佢哋減緊肥嘅仔女，千祈唔好食太多雜菜，如果唔係第二日就好易會水腫。
韓菓
韓菓同油果（유과）都係中秋節祭祀檯上面會預備嘅食物，同時都係最具代表性嘅韓國糕餅之一。咬落軟綿綿又好鬆脆，味道香甜但唔會油膩，小編有時候都會買幾包擺定喺屋企，一個唔小心就會好快全部食晒。
喺呢幾年，好多糕餅店為咗吸引客人，都會將呢啲菓子做得又精緻又靚。所以，而家嘅油果同韓菓其實已經無特定嘅形狀或者顏色，不過最為人所知嘅，都係嗰種整成長條形，出面會灑咗啲穀物嘅菓子。
甜米釀
唔止喺中秋節，過年嘅時候韓國人都會準備呢種用米同麥芽整成嘅飲品，小編自己都好鍾意飲。我諗大家喺汗蒸幕都有飲過呢種甜米釀，用嚟補充啱啱消耗咗嘅熱量。
甜米釀嘅魅力就在於佢嘅甜味，與此同時仲有米粒嘅咬口，可以幫助消化。唔止原味嘅甜米釀，有南瓜香氣嘅「南瓜甜米釀」亦相當受歡迎，大家搵到嘅話記得要試下。
韓國嘅中秋係唔係同大家想像嘅好唔同呢？
以上呢啲食物都可以喺大型超級市場買到，大家下次嚟韓國旅行嘅時候，就千祈唔好錯過呢啲特色嘅韓國本地食物，個喼有位嘅話，就帶啲返香港啦。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
