2026景福宮韓服租借推薦 | 10間人氣韓服店比較

Hello，大家好，我哋係由韓國人每日提供最新韓國旅行資訊嘅Creatrip。

如果你諗住喺景福宮附近租韓服，唔好淨係睇價錢平唔平，仲要一齊比較埋韓服款式種類、髮型set頭、交通方唔方便，同埋影相出唔出片先係重點。呢篇文章會以2026年5月為準，將我哋確認過嘅人氣10間店逐間對比整理，就算第一次去旅行都可以更易揀到啱你嗰間。

點解去景福宮要租韓服？

首先景福宮本身就係最受歡迎嘅韓服打卡地之一，古色古香嘅宮殿建築，加上韓服造型，影出嚟嘅相會特別有氣氛，無論係同朋友、情侶，定自己旅行，都好值得留念。

除咗因為可以影相留念，對遊客嚟講另一個優點係首爾多個古宮，例如景福宮、昌德宮、德壽宮同宗廟，只要穿韓服入場就可以免費參觀。如果想令今次首爾行程特別，推薦大家去景福宮前租返套韓服！

✏️小編小貼士：特別係每年得兩次嘅景福宮夜間開放期間，外國人只要著韓服就可以免費入場，唔洗再去搶飛或者俾多比錢入去，記住唔好錯過！

2026年景福宮人氣韓服租借店比較表

景福宮附近嘅韓服租借店睇落好似大同小異，但其實喺距離地鐵站遠近、韓服款式、會唔會包髮型設計、店舖整潔度，以及容唔容易影到靚相等方面，都有明顯分別。

尤其係第一次喺韓國體驗韓服租借嘅人，揀店舖時唔好只睇款式夠唔夠靚，仲建議一併比較預約方唔方便、還衫方唔方便等實際因素，會更容易揀到適合自己嘅選擇。

建議大家可以先睇下面嘅比較表，瞭解每間韓服租借嘅特色，再按自己嘅需要慢慢篩選！

喺景福宮附近揀韓服租借店時，唔好只睇邊間最平，仲要一齊比較易唔易揀、影相效果、整潔度，以及體驗夠唔夠正統，咁樣會更唔容易揀錯。

如果仲未有頭緒，第一次租韓服可以考慮 YES韓服 同 In Korea韓服；想走可愛打卡風，可以揀 韓服少女 同 Ari韓服；如果偏好正統韓服體驗，就推薦 藝仁房 同 今純堂。從自己最重視嘅條件入手，通常會比單純睇價錢更容易揀到啱自己嘅店。

另外，各店喺租借時長同韓服等級加價方面都可能唔一樣，而價格亦有機會因時段或方案調整，所以預約前記得先去商品頁面睇清楚最新收費。

租韓服前有咩需要注意？

韓服種類及價錢

大家平時預約韓服可能都會見到一般韓服、高級韓服等等唔同嘅名，但完全唔知道有咩唔同。

每間鋪頭分級可能唔通，不過韓服常見類型包括：

• 一般韓服：傳統感較重，設計簡約
• 高級韓服：現代風，蕾絲、刺繡等細節較多
• 國王/王妃韓服：整體更華麗，有正式韓國宮廷風感覺

另外公主韓服、世子韓服、童裝韓服同流行韓服等款式都常見，推薦大家可以參考租借網頁或者韓服租借鋪官網。

✏️小編小貼士：韓服種類唔同，租借價錢通常亦會唔一樣，預約前最好先確認清楚！

揀韓服租借鋪要留意嘅5大重點

① 同目的地（景福宮）嘅距離

由於着住平時唔慣著嘅韓服移動，其實會比想像中更攰，所以距離地鐵站或者景福宮較近嘅店舖會更加方便。

② 記得睇清楚有咩免費服務

預約前建議先確認店舖有冇包以下服務，例如：

• 頭髮造型
• 襯裙
• 手袋、扇等配飾
• 儲物櫃費用

表面價錢差唔多，但如果提供嘅免費服務比較多，整體CP值會更高。

③ 尺碼選擇夠唔夠齊全

韓服著得好唔好睇，同尺碼啱唔啱身好有關係，所以預約前最好先確認店舖有冇提供適合自己身形嘅尺寸。

④ 可以租幾耐

韓服租借時間會因店舖而異。一般嚟講，多數店舖都可以由2小時起租，但亦有部分店提供全日租借等更長時間方案，建議按自己行程安排去揀會更實際。

⑤ 有冇頭髮造型服務

韓服造型唔止係服裝本身，髮型都會大大影響整體感覺。因為有髮型配搭，成個造型會更有氣氛，所以揀店時亦建議留意韓服租借鋪有冇提供頭髮造型服務。

有啲店雖然會包基本髮型，但可選款式未必多。最好事前先諗下自己想行咩風格，再揀返可以配合到你想要造型嘅店舖。

韓服租借鋪休息日

因為景福宮本身逢星期二會休息，所以好多景福宮韓服租借店鋪星期二都唔會開門，大家安排行程同預約之前記住要注意！

當日準備小貼士

想著住韓服舒舒服服去景福宮打卡，建議當日準備：

□ 好行嘅鞋（最好係白色等唔太搶眼嘅顏色）
□ 白色/膚色打底衫（韓服上衣比較透）
□ 輕便小型隨身物品
□ 冬天一定要著Heattech等薄身保暖內衣

✏️小編小貼士：部分韓服鋪頭冬天會為客人準備暖包或者毛毛披肩，但如果比較怕凍嘅話建議自備，或者避免冬天租韓服！

10間必去景福宮韓服租借鋪推薦

1. YES韓服(예스한복)

• 地址：서울 종로구 사직로 133-6
• 營業時間：09:00-18:00
• 前往方法：景福宮站（경복궁역）4號出口

YES韓服位於景福宮附近，可能係大家最經常見到有人介紹嘅韓服租借店！優點係近地鐵站、款式多，同埋尺碼選擇夠齊。由景福宮站行過去大約1分鐘，去景福宮亦只係5分鐘，交通方便，對第一次租韓服嘅人嚟講會輕鬆好多。

店內有超過1,000套韓服，提供女裝、男裝同童裝，適合唔同年齡同組合嘅旅客。韓服上下裝可以自由配搭，揀衫時比較容易按自己喜好配出想要嘅風格。現場亦有參考相可以睇，方便一邊揀、一邊想像着上身後嘅效果，對第一次體驗韓服嘅人嚟講會更加安心。

另外，YES韓服喺尺碼方面選擇比較多，所以無論係家庭旅遊定朋友一齊去，都比較容易搵到合適款式。店內亦設有較多試身室，加上儲物櫃、手袋 等基本用品都準備得幾齊全，整體體驗相對方便。

✏️小編小貼士：YES韓服近景福宮站4號出口，位置幾容易搵，就算第一次去都唔會盪失。如果想喺朝早去景福宮影相，建議可以早少少去，通常會比較少人！

更多參考圖片&預約詳情👇🏻

2. 日月韓服(해와달한복)

• 地址：서울 종로구 사직로 127-14 3F
• 營業時間：星期一、三至日 08:30-18:30
• 前往方法：景福宮站（경복궁역）3-1號出口

日月韓服係一間以店內整潔、韓服狀態較好見稱嘅韓服租借店。對於會在意租借服裝有冇明顯使用感嘅人嚟講，呢間鋪頭應該會啱你心水。

從評價同整體印象嚟睇，店內嘅韓服同配飾擺放得幾整齊，環境亦比較明亮乾淨。尤其係店內有唔少較新淨嘅韓服，而且清潔打理方面做得幾仔細。鋪頭入面亦都設有化妝台同提供風筒、捲髮器等美髮工具，方便客人自己整理頭髮，令整體造型更完整，影相都靚啲！

✏️小編小貼士：日月韓服可以直接加購妝髮服務，男士女士都可以，所以如果想化一個襯返韓服嘅妝推薦揀呢間韓服租借鋪！不過建議大家要預留多少少時間，以免行程太緊迫。

更多參考圖片&預約詳情👇🏻

3. In Korea韓服(인코리아한복)

• 地址：서울 종로구 자하문로2길 20
• 營業時間：星期一、三至日 09:00-19:00
• 前往方法：景福宮站（경복궁역）3號出口

In Korea韓服提供超過1,000套韓服，包括女裝、男裝同童裝，選擇好齊全。比較特別嘅係呢度韓服會按顏色同種類分開整理，一眼就比較容易睇到邊度有咩款。對第一次租韓服嘅人嚟講，揀衫時會輕鬆好多，亦比較唔容易亂。

另外呢度亦都提供免費手袋租借，透過Creatrip預約亦可享有免費頭髮造型服務，記住唔好錯過！

✏️小編小貼士：呢度韓服按顏色、款式分門別類咁整理好，就算第一次嚟都好易揀。小編會推薦想同朋友夾同色系韓服影相嘅朋友嚟租韓服！

更多參考圖片&預約詳情👇🏻

4.今天一天韓服(오늘하루한복)

• 地址：서울 종로구 자하문로2길 16 2F
• 營業時間：星期一、三至日 09:00-19:00
• 前往方法：景福宮站（경복궁역）3號出口

今天一天韓服係一間幾容易配合景福宮行程安排嘅韓服租借店，整體配置平均，適合想輕鬆體驗景福宮韓服行程嘅人。

店內提供主題韓服、公主韓服、王妃韓服、世子韓服等多種款式，想體驗比較經典、常見嘅韓服造型會幾方便。由寄存物品、揀韓服、整理髮型，到換好衫出發，整個流程都非常系統化，就算第一次租韓服都唔會手忙腳亂。

另外，梳妝位置附近亦有髮型參考圖，換好韓服之後可以自行整理造型。不過透過 Creatrip預約就可以享有免費頭髮造型服務同用儲物櫃，滿意度更高。

✏️小編小貼士：今天一天韓服本身冇提供化妝服務，不過而家大家可以透過Creatrip預約獨家優惠套餐，直接去附近呢間嘅韓服妝髮Studio執好成個造型！

更多參考圖片&預約詳情👇🏻

5. Ari韓服(아리한복)

• 地址：서울 종로구 자하문로 20 3F
• 營業時間：星期一、三至日 10:00-20:00
• 前往方法：景福宮站（경복궁역）3號出口

Ari韓服係一間擅長幫客人揀到適合自己色系韓服嘅租借鋪。喺眾多韓服店之中，佢比較特別嘅地方在於唔止可以揀到靚韓服，仲會因應個人氣質同顏色感覺，提供更適合自己嘅配色方向。

從評價嚟睇，店內有唔少漸變色、花紋款等女裝韓服，設計同顏色選擇都相當豐富。而當中最有特色嘅地方，就係可以透過Personal Colour分析，幫你揀出更襯自己膚色同氣質嘅韓服顏色。

另外除咗韓服本身之外，喺配飾挑選同一啲細節位上都睇得出幾有心思，例如店內亦有帶出精緻感嘅裝飾配件同韓式髮帶等，整體造型會更完整。

✏️小編小貼士：透過簡單Personal Colour診斷同職員推薦就可以揀到最襯自己嘅韓服，對唔太熟韓服、又唔知自己着咩色會更好睇嘅人嚟講特別有幫助！建議大家可以預約埋攝影服務，影返輯靚相。

更多參考圖片&預約詳情👇🏻

6. 藝仁房(예인방)

• 地址：서울 종로구 삼일대로32길 55-3
• 營業時間：09:00-21:00
• 前往方法：鐘路3街站（종로3가역）6號出口

藝仁房係一間比較適合想深入感受韓國古裝氛圍嘅韓服租借店。相比一般觀光客常見嘅韓服款式，呢度更適合想揀一套感覺特別啲、古裝味更濃嘅人。

從評價嚟睇，店主本身係曾參與韓劇韓服製作同協助設計嘅設計師，令人對韓服本身嘅質感同完成度更有信心。店內除咗有一般高級韓服之外，仲有步步驚心公主、大長今、高級王妃等其他鋪頭比較少見嘅古裝劇韓服，非常有特色。

另外髮型方面亦可以按你想要嘅感覺作調整，完成後整體造型會更完整，就好似韓國古裝劇男女主角咁！

✏️小編小貼士：如果之後打算去昌德宮或者昌慶宮影相，整體環境通常會比景福宮更寧靜，影出嚟嘅相亦會有另一種比較沉穩、細緻嘅感覺。

更多參考圖片&預約詳情👇🏻

7. 韓服少女(한복소녀)

• 地址：서울 종로구 자하문로2길 8 2F
• 營業時間：09:00-19:00
• 前往方法：景福宮站（경복궁역）3-1號出口

韓服少女主打可愛感、潮流感同CP值，鋪頭位於景福宮站3-1號出口附近，交通方便，而且去景福宮都唔遠，整體上幾易安排行程。店內韓服款式由簡約款到較有個性嘅設計都有，而且會定期加入新款，所以如果想揀一套感覺比較新、比較貼近近年流行審美嘅韓服，會幾容易搵到適合自己嘅款。

店內主要提供一般韓服、特色韓服同高級韓服三種，揀衫時店員亦會一齊協助配搭，對唔太熟韓服嘅旅客嚟講會比較安心。另外店內亦提供免費頭髮造型服務、襯裙同 儲物櫃等配套，成個體驗更輕鬆方便！

✏️小編小貼士：推薦大家要配埋髮飾、手袋等配件，影相會更上鏡！

更多參考圖片&預約詳情👇🏻

8.NAYE娜藝韓服(나예한복)

• 地址：서울 종로구 사직로 133-10
• 營業時間：星期一、三至日 09:00-18:00
• 前往方法：景福宮站（경복궁역）4號出口

NAYE娜藝韓服主打韓服狀態好、分類清晰、比較易揀，適合想租得安心、又唔想第一次就揀到太亂嘅人。店內韓服按顏色同風格整理，女裝、男裝同童裝都陳列得幾清楚。

款式方面有粉彩色、鮮色、刺繡款、漸變色等多種選擇，亦可參考穿著示範相去揀。加上店員會幫你著韓服同整理髮型，就算係第一次去租韓服都唔需要擔心。

✏️小編小貼士：因為款式相對上多，建議大家可以參考預約頁面入面嘅範例圖片，睇定自己想著咩款式同顏色嘅韓服，到時候就唔會咁煩惱！

更多參考圖片&預約詳情👇🏻

9. 今純堂(금준당)

• 地址：서울 종로구 북촌로5가길 33 2F
• 營業時間：09:00-21:00
• 前往方法：安國站（안국역）2號出口

今純堂係一間主打高級韓服同專業拍攝體驗嘅店。相比一般偏向輕鬆打卡嘅韓服租借，呢度會更適合想認真影一輯相、好好留低旅行回憶嘅人。

好多網友都話無論係戶外外景拍攝定韓屋棚拍，由揀衫、着裝、髮型整理到正式拍攝，整個流程都安排得幾仔細。尤其係店內提供嘅服裝入面，有唔少例如唐衣、婚禮韓服等款式，整體感覺會比一般觀光用韓服更正式，亦更有份量。無論係布料質感、剪裁線條，定係着上身後嘅輪廓，都比較突出。

✏️小編小貼士：攝影師會按景福宮或者韓屋攝影棚嘅環境，設計構圖同教你擺pose，影出嚟嘅相整體完成度會更高，想影返輯高級韓服相（甚或係結婚相）都推薦揀今純堂！

更多參考圖片&預約詳情👇🏻

10.大韓韓服(대한한복)

• 地址：서울 종로구 사직로 133-2 2F
• 營業時間：09:00-19:00
• 前往方法：景福宮站（경복궁역）4號出口

大韓韓服係一間以款式選擇非常多同地點方便見稱嘅韓服租借店。如果你本身想喺好多款式之中慢慢比較，再揀到最適合自己嗰套，呢間店會幾啱你。

店舖位置近景福宮站4號出口，一出站行幾步就到，對第一次去嘅旅客嚟講都比較易搵。店內提供超過1,500套韓服，由傳統韓服到高級花款韓服都有，整體選擇相當多。再加上店內環境明亮，揀衫時會比較容易睇清楚韓服本身嘅顏色同質感，小編個人覺得呢點都幾加分。

✏️小編小貼士：因為款式真係比較多，去到現場有時反而會更容易揀到花多眼亂。建議去之前可以先諗好自己想要嘅方向，例如可愛風、斯文風，定係古典感較重，咁樣現場揀起上嚟會更快。

更多參考圖片&預約詳情👇🏻

租韓服之後可以去邊度玩同影相？

1. 去景福宮等宮殿參觀

景福宮、昌德宮、德壽宮、宗廟等首爾古宮只要著韓服就可以免費入場參觀。換上韓服行入古宮，成個氣氛就好似置身韓國古裝劇場景一樣。一邊散步、一邊影相，好容易就可以影到充滿韓國古風嘅照片。

2. 去北村韓屋村

喺北村韓屋村可以見到一整片充滿歷史感嘅傳統韓屋住宅。呢度而家仍然有人居住，所以比起單純觀光景點，會更有真實生活感。加上位置就喺景福宮附近，地勢亦稍高，景觀唔錯，所以一直都係人氣影相位之一。如果想喺充滿韓國傳統氣氛嘅背景下影相，呢度會係好適合嘅地方。

3. 去韓屋Cafe 打卡

喺北村韓屋村同仁寺洞一帶，有唔少由韓國傳統房屋改建而成嘅韓屋Cafe，推薦大家揀一間氣氛舒服嘅韓屋Cafe坐低休息同影相打卡。

4. 去照相館正式影一輯相

既然都租咗一套靚韓服，不妨考慮去照相館正式影返一輯相，將今次體驗更完整咁留低。韓國喺修圖同人像整理方面一向都幾出名，影完之後通常可以收到修整過嘅照片，作為旅行紀念亦會特別有收藏價值。

景福宮韓服租借常見問題FAQ

| Q1. 著住韓服入景福宮，真係可以免費入場？

A：包括景福宮在內嘅首爾宮殿，大部分日子都會俾著傳統韓服嘅人士免費入場。不過詳細條件同適用準則都有機會更改，韓服款式規定亦都可能隨時有變，建議參考官方公告。

| Q2. 韓服租借係咪最好事先預約？

A：週末、連假，同櫻花、紅葉旺季都好容易多人，尤其係朝早熱門時段好快就滿，建議你預先預約，避免因為太多人而無辦法正常體驗。

| Q3. 髮型造型係咪包喺基本收費入面？

A：視乎唔同店舖安排，有啲舖頭會免費包基本嘅簡單髮型造型，但如果想整得更華麗，可能就要另外加錢。建議你預約之前先確認清楚基本收費到底包到邊一部分。

| Q4. 一般韓服同高級韓服有咩分別？

A：一般韓服多數都係偏傳統同簡約設計為主，價錢通常會相對抵玩啲。高級韓服就主打蕾絲、刺繡同更華麗嘅用色，影相特別上鏡，但有時可能要另外加錢。

| Q5. 有冇男裝或者童裝韓服？

A：有。今次介紹嘅景福宮附近好多人氣韓服鋪頭除咗女裝之外，亦都有男裝同童裝嘅韓服可以揀，好適合一家大細或者情侶一齊去租。

| Q6. 需要護照或者身份證明文件嗎？

A：每間舖頭嘅做法都唔同，建議你先喺預約頁面確認清楚。有啲可能會要求交按金或者出示身份證明，建議大家隨身帶備護照同韓幣現金。

| Q7. 如果遲咗還衫時間會點？

A：大部分店舖如果過咗還衫時間，都有機會要收延長費。因為去景福宮或者行埋北村韓屋村，有時會比想像中用多咗時間，所以建議你先安排好觀光路線。

| Q8. 除咗景福宮之外，仲有邊啲地方著韓服影相好出片？

A：除咗景福宮之外，北村韓屋村、西村、昌德宮、韓屋Cafe附近一帶都好受歡迎。如果想影啲氣氛比較靜、舒服啲嘅相，可以去昌德宮或者韓屋區，想熱鬧啲、順便感受下觀光氣氛，就推薦去景福宮周邊。

※ 營業時間、店鋪優惠等資訊以2026年5月資料為準；建議參考實際預約頁面，確認最新資訊。
※ 景福宮等古宮韓服免費入場條件有機會更改，最新資訊建議參考官方公告。

本文由長期更新首爾旅遊資訊嘅Creatrip編輯團隊整理，並以2026年5月各店預約頁面、商品資訊及平台內評價為準。

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！